Capítulo 23

Mas milagro den Capernaum

E DIA di sabat despues cu Jesús a yama su promé cuater disípel—Pedro, Andrés, Santiago i Juan—nan tur a bai ne sinagoga local den Capernaum. Ei Jesús a cuminza siña, i e pueblo a keda asombrá pasobra el a síñanan como un hende cu autoridad i no manera scriba.

Riba e dia ei di sabat un homber endemoniá tabata presente. Despues di poco, el a grita cu boz fuerte: “Kico mi tin cu ber cu bo, Jesús nazareno? Bo a bini pa destruínos? Mi sa exactamente ken bo tá, e Santo di Dios.”

E demoño cu a domina e homber realmente tabata un angel di Satanás. Jesús a squal e demoño, bisando: “Keda ketu, i sali foi dje!”

Wel, e demoño a dal e homber un djimbi i a grita cu tur su forza. Pero el a sali for dje homber sin hacié daño. Tur hende a keda asombrá mes! Nan a puntra, “Kico esei tá? . . . Cu autoridad e ta manda asta riba spiritu impuro, i nan ta obedecé.” Noticia di esei a plama den tur e tera alrededor.

Saliendo for dje sinagoga, Jesús i su disípelnan a bai ne cas di Simón, of Pedro. Ei e suegra di Pedro tabata mashá malu cu cayentura halto. Nan a roga, ‘Haci fabor di yudé.’ P’sei, Jesús a bai cerca dje, a tuma su man, i a lanté. El a bira sano un bez i a cuminza prepara cuminda pa nan!

Mas Tardi, despues cu solo a drenta, hende di tur parti a cuminza yega ne cas di Pedro cu nan hendenan enfermo. Pronto e stad henter a reuni dilanti di porta! I Jesús a cura tur nan hendenan enfermo, no a importa cua maleza nan tabatin. E asta a libra hende cu demoño a domina. Ora nan a sali, demoño cu el a saca a grita: “Bo ta Yiu di Dios.” Pero Jesús a squal nan i no a permitínan papia pasobra nan tabata sa cu e ta Cristo. Marco 1:21-34; Lucas 4:31-41; Mateo 8:14-17.

▪ Kico a sosode den e sinagoga ne dia di sabat despues cu Jesús a yama e cuater disípel di dje?

▪ Unda Jesús a bai despues di a sali for dje sinagoga, i cua milagro el a haci ei?

▪ Kico a sosode mas tardi e mesun anochi?