Reunion Final ku Kandidato pa Boutismo

Por lo general, boutismo ta tuma lugá na asamblea i kongreso di Testigunan di Yehova. Na konklushon di e diskurso di boutismo, e oradó lo pidi e kandidatonan pa boutismo pa lanta para i kontestá e siguiente dos preguntanan ku un stèm fuerte i kla:

1. Bo a arepentí di bo pikánan, a dediká bo mes na Yehova i a aseptá ku Dios ta duna salbashon solamente mediante Hesukristu?

2. Bo ta komprondé ku ora bo batisá bo ta demostrá públikamente ku bo ta Testigu di Yehova i ku bo ta forma parti di Yehova su organisashon?

Ora e kandidatonan pa boutismo kontestá sí na e preguntanan akí, nan ta hasi un “deklarashon públiko” ku nan a pone fe den e sakrifisio di reskate i ku nan a dediká nan mes sin reserva na Yehova. (Rom. 10:9, 10) Di antemano, e kandidatonan di boutismo mester hasi orashon i pensa bon riba e preguntanan akí pa nan por kontestá di akuerdo ku nan konvikshon.

Bo a hasi orashon na Yehova i a dediká bo mes na dje? Bo a primintí Yehova ku lo bo adorá e so i ku lo bo pone hasimentu di su boluntat na promé lugá den bo bida?

Bo ta kompletamente konvensí ku bo mester batisá na e promé oportunidat ku presentá?

Kon ta e manera apropiá pa bo bisti ora bo ta bai batisá? (1 Tim. 2:9; Huan 15:19; Flp. 1:10)

Nos mester bisti ku “modestia i sano huisio” pa asina demostrá ku nos ta “deboto na Dios.” Pues, e personanan ku ta bai batisá lo no bisti trahe di baño indesente òf provokativo. Ademas, ta bon pa evitá di bisti paña ku dicho òf propaganda. Nan mester bisti paña desente, limpi i ku ta pas pa e okashon.

Kon un persona mester komportá su mes durante e boutismo? (Luk. 3:21, 22)

E boutismo di Hesus ta sirbi komo ehèmpel pa tur kristian awe. Hesus a komprondé ku boutismo ta un paso serio i su aktitut i echonan a reflehá esei. P’esei, e lugá di boutismo no ta kaminda pa hasi wega, hunga, landa òf hasi kualke otro kos ku ta minimisá e seriedat di e okashon. Un kristian ku a kaba di batisá lo no komportá su mes komo si fuera el a logra un gran viktoria. Boutismo ta un okashon alegre, i nos mester ekspresá nos goso na un manera digno.

Kon asistensia regular na reunion i kompania ku bo rumannan di kongregashon lo yuda bo kumpli ku bo dedikashon na Yehova?

Dikon ta bon pa despues ku bo batisá, bo keda mantené un bon programa di estudio personal i sigui partisipá regularmente den sirbishi di vèlt?

INSTRUKSHON PA E ANSIANONAN DI KONGREGASHON

Ora un publikadó no-batisá laga sa ku e ta deseá di batisá, nan lo anim’é pa repasá e sekshon “Pregunta pa un Persona Ku Ta Deseá di Batisá,” na página 185-207 di e buki akí. Mester mustr’é e informashon “Mensahe pa Publikadó No-Batisá” ku ta kuminsá na página 182, i ku ta splika kon e por prepará pa e reunion ku e ansianonan. Manera e paragrafnan ei ta mustra, un kandidato pa boutismo por usa su notanan personal i e por tene e buki habrí ora e ansianonan ta trata e preguntanan kuné. Sinembargo, no ta nesesario pa un persona repasá e preguntanan ku e kandidato promé ku e ansianonan reuní kuné.

Kualke persona ku ta deseá di batisá mester informá e koordinadó di e kuerpo di ansiano di su deseo. Despues ku e persona ku ta deseá di batisá haña oportunidat di lesa e sekshon: “Pregunta pa un Persona Ku Ta Deseá di Batisá,” e koordinadó di e kuerpo di ansiano lo puntra e persona si el a dediká su mes na Yehova pa medio di orashon i ku el a primintí Yehova di hasi Su boluntat. Si e persona a hasi e dedikashon akí, e ora ei, e koordinadó di e kuerpo di ansiano lo hasi areglo pa dos ansiano trata e informashon di e sekshon “Pregunta pa un Persona Ku Ta Deseá di Batisá” kuné. Pa kada un di e dos sekshonnan, mester asigná un otro ansiano. No ta nesesario pa warda te ora ku anunsiá ku lo tin un asamblea òf kongreso pa kuminsá trata e preguntanan ku e kandidato.

Por trata e dos sekshonnan den dos seshon di un ora kada un, aunke no tin nada kontra pa usa mas tempu si ta nesesario. Mester habri i sera kada seshon ku orashon. Ni e kandidato ni e ansianonan no mester pasa purá den e preguntanan. E ansianonan ku ser asigná pa trata e preguntanan ku e kandidato mester pone esei komo prioridat den nan programa.

Por lo general, ta mihó pa trata e preguntanan ku kada kandidato di boutismo individualmente i no ku un grupo di kandidato. Ora e ansianonan permití e kandidato kontestá kada pregunta, nan por haña un bon bista di e grado di su komprondementu, i asina nan por saka afó si e ta kla pa batisá. Ademas, e kandidato pa boutismo lo sinti su mes mas liber pa papia den un ambiente asina. Den kaso di pareha kasá, nan por trata e preguntanan huntu.

Den kaso ku e kandidato pa boutismo ta un ruman muhé, mester tene e seshonnan den pleno bista di otro hende, pero na un kaminda ku otro hende no ta tende. Si ta nesesario pa bai ku un ruman mas, esaki mester ta un ansiano òf sirbidó ministerial, dependiendo di e sekshon ku mester trata, manera e siguiente paragraf ta mustra.

Den e kongregashonnan ku no tin sufisiente ansiano, un sirbidó ministerial kapas ku a demostrá di tin bon huisio i disernimentu lo por trata e preguntanan di boutismo di sekshon “Parti 1: Kreensia Kristian” ku e kandidatonan. Solamente e ansianonan mag trata “Parti 2: Bida Kristian.” Si un kongregashon no tin sufisiente ruman hòmber kualifiká, por tuma kontakto ku e superintendente di sirkuito, kende na su turno lo pidi yudansa di un kongregashon den serkania.

Ora e kandidato pa boutismo ta menor di edat, su mayornan ku ta Testigu tambe mester ta presente ora ta trata e seshonnan di pregunta kuné. Si su mayor(nan) no por ta presente, e ora ei, dos ansiano (òf un ansiano i un sirbidó ministerial, dependiendo di e sekshon ku boso ta tratando) mester ta presente durante kada seshon.

E ansianonan lo hasi sigur ku e persona ku ta deseá di batisá a haña un komprondementu rasonabel di e siñansanan básiko di Beibel. Ademas, nan mester hasi sigur ku e kandidato pa boutismo tin un apresio profundo pa e bèrdat i ta mustra debido rèspèt pa Yehova su organisashon. Si e persona no ta komprondé e siñansanan básiko di Beibel, e ansianonan lo sòru pa e risibí e yudansa personal nesesario di manera ku despues e por kualifiká pa boutismo. Kisas tin otro publikadó ku tin mester di mas tempu pa demostrá mas apresio pa e sirbishi di vèlt òf sumishon na e areglonan di e organisashon. E ansianonan mester usa diskreshon durante e ora ku nan ta dediká na kada seshon pa diserní klaramente si e persona ta kla pa boutismo. Maske kisas por dediká mas tempu na sierto pregunta i ménos na otro, mester trata tur e preguntanan.

E ansianonan asigná pa trata e preguntanan lo reuní despues di e di dos seshon i lo disidí si e persona por batisá òf nò. E ansianonan lo tene kuenta ku e background, abilidat, kapasidat i sirkunstansia di kada persona. Nos ta interesá pa sa si e persona a kultivá un amistat ku Yehova i ku e ta komprondé e bèrdatnan básiko di Beibel. Debí na boso yudansa amoroso, e personanan ku ta bai batisá lo ta debidamente prepará pa kumpli ku nan asignashon komo predikadó di e bon notisia.

Despues, un òf tur dos di e ansianonan asigná lo reuní ku e persona i inform’é si e ta kualifiká pa boutismo òf nò. Si e persona ta kualifiká, e ansianonan lo trata kuné “Reunion Final ku Kandidato pa Boutismo,” na página 206-207. Si e kandidato pa boutismo no a kaba di studia e bukinan Beibel Ta Siña i “Amor di Dios,” e ansianonan mester anim’é pa hasi esei despues di su boutismo. Informá e kandidato ku lo pone fecha di su boutismo riba su Registro di Publikadó di Kongregashon. Kòrd’é ku e ansianonan ta warda e informashon personal akí di dje pa e organisashon por sigui perkurá pa e aktividatnan religioso di Testigunan di Yehova i pa e por partisipá na e aktividatnan spiritual i haña animashon i guia di e ansianonan. Ademas, e ansianonan por kòrda e publikadónan nobo ku lo trata kualke informashon personal di akuerdo ku e Maneho Global di Uso di Dato Personal di Testigunan di Yehova, ku tin riba jw.org. Generalmente, e reunion akí no mester dura mas ku 10 minüt.

Un aña despues di e publikadó su boutismo, dos ansiano mester reuní ku e publikadó batisá pa anim’é i dun’é sugerensia útil. Un di e ansianonan mester ta e publikadó su superintendente di grupo di sirbishi. Den kaso di un menor di edat, un di su mayor(nan) ku ta Testigu mester ta presente. E ambiente di e reunion mester ta animante i positivo. E ansianonan lo papia kuné tokante su progreso spiritual i lo dun’é konseho práktiko pa e sigui ku su bon kustumber di lesa Beibel tur dia, hasi estudio personal, partisipá den adorashon komo famia, asistí i partisipá fielmente na e reunionnan i prediká den sirbishi di vèlt tur siman. (Efe. 5:15, 16) Si e no a kaba di studia e bukinan Beibel Ta Siña i “Amor di Dios,” e ansianonan mester hasi areglo pa un ruman kaba di studia e publikashonnan kuné. E ansianonan mester kòrda pa duna elogio amoroso. Por lo general, konseho i sugerensia riba un òf dos punto ta sufisiente.