Kaha di Pregunta

◼ Te na ki grado un publikadó no batisá mester asistí na e reunionnan i partisipá den sirbishi pa e por batisá?

E desishon di mas importante ku un hende por tuma ta di batisá. P’esei, promé ku un publikadó por batisá, e mester por komprondé, te na un grado rasonabel, kiko Dios ta rekerí di dje. Ademas, mester ta bisto ku e ta determiná pa biba segun Dios su rekisitonan.

Beibel ta animá kristiannan pa no keda sin bai e reunionnan, pues, un publikadó no batisá mester asistí regularmente na e reunionnan di kongregashon. (Heb. 10:24, 25) Por lo general, e ta partisipá tambe den e reunionnan ku su komentarionan. I probablemente lo e ta inskribí den e Skol di Ministerio Teokrátiko, aunke esei no ta un rekisito.

Ademas, kristiannan a haña e tarea di prediká e bon notisia i hasi disipel. Pues, un publikadó no batisá mester partisipá regularmente den sirbishi promé ku e batisá. (Mat. 24:14; 28:19, 20) Pa kuantu tempu e mester ta un publikadó promé ku e batisá? Lo ta bon pa dun’é sufisiente tempu p’e por duna prueba di su determinashon di partisipá ku zelo riba un base regular den e trabou di prediká. (Sal. 78:37) E tempu ei no tin nodi di ta hopi largu sí. Kisas djis algun luna despues ku e bira publikadó lo e por bini na remarke pa batisá. Kuantu ora di sirbishi e tin ku raportá? No tin un regla estrikto pa esaki. E ansianonan tin ku tene kuenta ku e sirkunstansianan di kada publikadó i ser rasonabel.—Luk. 21:1-4.

E ansianonan (òf den kongregashon ku tin tiki ansiano, e sirbidónan ministerial) ku ta reuní ku un kandidato pa boutismo tin ku tene kuenta ku kada persona ta diferente. Pues nan tin ku usa sano huisio pa determiná si e ta kualifiká pa boutismo òf nò. E ansianonan ta ferwagt ku e publikadó tin deseo di ta un Testigu di Yehova, ta mustra apresio pa e privilegio di asosiá ku Yehova su organisashon i ta partisipá den e trabou di prediká. Nan ta komprondé sí ku ainda e no a krese na madures spiritual ni no tin e abilidatnan di un publikadó eksperensiá. Si e ansianonan ta haña ku e kandidato no ta kumpli ku e rekisitonan pa batisá, nan mester splik’é na un manera amoroso kiko ta e motibunan bíbliko ku a pone nan yega na e desishon ei i sòru p’e haña e yudansa spiritual ku e tin mester.