Jehova Su Carnenan Tin Mester di Cuido Tierno

“Sabi cu Jehova ta Dios. . . . Nos ta su pueblo i e carnénan di su sabana.”—SALMO 100:3.

1. Con Jehova ta trata su sirbidornan?

JEHOVA ta e Gran Wardador. Si nos ta su sirbidornan, e ta mira nos como su carnénan i e ta cuida nos tiernamente. Nos Tata celestial ta consolá i refrescá nos i ta guia nos den “e camindanan di husticia pa causa di su nomber.” (Salmo 23:1-4) E Wardador Excelente, Jesucristo, ta stima nos asina tantu cu el a entregá su alma pa nos.—Juan 10:7-15.

2. Den ki condicion e pueblo di Dios ta haña su mes?

² Como esnan cu ta ricibí cuido tierno, nos por bisa huntu cu e salmista: “Sirbi Jehova cu alegria. Drenta dilanti dje cu un gritu gososo. Sabi cu Jehova ta Dios. E ta esun cu a traha nos, i no nos mes. Nos ta su pueblo i e carnénan di su sabana.” (Salmo 100:2, 3) Sí, nos ta gososo i protehá. Ta como si fuera nos a ser protehá contra ‘roofdier’ malicioso den un curá di carné cu tin murayanan fuerte di piedra.—Númeronan 32:16; 1 Samuel 24:3; Sofonías 2:6.

Wardadornan di Buena Gana dje Tou

3. Con ancianonan cristian nombrá ta trata e tou di Dios?

³ Nada straño cu nos ta gososo como carnénan di Dios! Ancianonan nombrá ta hiba delantera meimei di nos. Nan no ta “hunga como prins,” dominá riba nos, of purba di ser doño di nos fe. (Númeronan 16:13; Mateo 20:25-28; 2 Corintionan 1:24; Hebreonan 13:7) Mas bien, nan ta wardadornan amoroso cu ta aplicá e conseho di apostel Pedro: “Pastoreá e tou di Dios bou di boso cuido, no obligá, sino di buena gana; tampoco pa amor pa ganashi desonesto, sino cu empeño; tampoco como dominando riba esnan cu ta herencia di Dios, sino birando ehempel p’e tou.” (1 Pedro 5:2, 3) Apostel Pablo a bisa co-ancianonan: “Presta atencion na boso mes i na henter e tou, entre cua e spiritu santu a nombra boso como superintendente, pa pastoreá e congregacion di Dios, cua el a cumpra cu e sanger di su propio Yu.” I ki gradicidu e carnénan ta cu e hombernan aki nombrá pa spiritu santu ta “trata e tou cu ternura”!—Echonan 20:28-30.

4. Pa ki clase di relacion cu e tou Charles T. Russell tabata bon conocí?

⁴ Jesus a duna e congregacion “don den hombernan,” algun como “pastor,” of wardador, cu ta trata e tou di Jehova den un manera tierno. (Efesionan 4:8, 11; King James Version) Un dje hombernan aki tabata Charles T. Russell, e promé presidente dje Sociedad Watch Tower. El a ser yamá Pastor Russell debí na su actividadnan amoroso i compasivo den pastoreá e tou bou dje Wardador Principal, Jesucristo. Awe, ancianonan cristian ta ser nombrá dor dje Cuerpo Gobernante di Testigonan di Jehova, i nan ta tene cuidou pa no usa términonan manera “pastor,” “anciano,” of “maestro” como título. (Mateo 23:8-12) Sin embargo, ancianonan djawe ta haci un trabou di pastoreo, esta como wardador p’e beneficio dje carnénan di Jehova su sabana.

5. Pakico esnan nobo mester bira familiarisá cu e ancianonan nombrá den e congregacion cristian?

⁵ Como wardadornan, ancianonan ta hunga un papel vital den e progreso spiritual di esnan nobo. P’esei, e buki nobo Conocimentu cu Ta Hiba na Bida Eterno ta bisa na página 168: “Familiarisá cu e ancianonan nombrá den e congregacion. Nan tin hopi experencia den aplicá e conocimentu di Dios, pasobra nan a cumpli cu e cualificacionnan pa superintendente establecí den e Bijbel. (1 Timoteo 3:1-7; Tito 1:5-9) No vacilá pa acercá un di nan si bo tin mester di yudansa spiritual pa vence un hábito of un cualidad cu ta na conflicto cu Dios su rekisitonan. Lo bo haña cu e ancianonan ta sigui e spiertamentu di Pablo: ‘Papia di un manera consolador cu e almanan deprimí, sostené esnan débil, tene gran pacenshi pa cu tur.’—1 Tesalonicensenan 2:7, 8; 5:14.”

Ora Esnan Nobo Kier Predicá

6. Ki procedura ta ser siguí si un studiante di Bijbel kier bira un publicador di Reino?

⁶ Despues cu un studiante di Bijbel a gana conocimentu i a asistí na reunionnan pa un tempu, lo e por tin deseo di bira un publicador di Reino, un predicador dje bon nobo. (Marco 13:10) Si ta asina, e Testigo cu ta conducí e studio di Bijbel cuné mester tuma contacto cu e superintendente presidente, kende lo haci areglo pa un dje ancianonan dje Comité di Sirbishi di Congregacion i un otro anciano reuní cu e studiante di Bijbel i su maestro. E consideracion lo ta basá riba e buki Organisá pa Cumpli cu Nos Ministerio, página 98 i 99. Si e dos ancianonan aki mira cu e persona nobo ta kere e siñansanan básico di Bijbel i a armonisá su bida cu e principionan di Dios, nan lo bis’é cu e ta cualificá pa participá den e ministerio público.a Ora e raportá su ministerio entregando un raport di sirbishi di veld, esei lo ser poné riba un karchi di Registro di Publicador di Congregacion cu su nomber ariba. E persona nobo awor por raportá su actividad di duna testimonio huntu cu e miyones di otronan cu gososamente ta ‘publicá e palabra di Dios.’ (Echonan 13:5) Un anuncio cu e ta un publicador no-bautisá lo ser hací n’e congregacion.

7, 8. Den ki maneranan por duna un publicador no-bautisá yudansa necesario den e ministerio?

⁷ Un publicador no-bautisá tin mester di yudansa dje ancianonan i otro cristiannan maduro. Por ehempel, su progreso spiritual ta un asuntu di interes p’e conductor dje Studio di Buki di Congregacion na cua e ta asistí. E publicador nobo por haña cu ta difícil pa papia di un manera eficas den e trabou di cas-pa-cas. (Echonan 20:20) Pues probablemente lo e tin gana di ricibí yudansa, specialmente di esun cu ta conduciendo studio di Bijbel cuné den e buki Conocimentu. Tal yudansa práctico ta apropiado, pasobra Jesucristo a prepará su disipelnan p’e ministerio.—Marco 6:7-13; Lucas 10:1-22.

⁸ Pa nos ministerio ta eficas, bon preparacion delantá ta esencial. P’esei, e dos publicadornan lo por bini huntu promé pa practicá e presentacionnan sugerí den e edicionnan mensual di Nos Ministerio di Reino. Ora nan cuminsá nan sirbishi di veld, esun mas experenciá por papia n’e promé par di casnan. Despues di un introduccion amigabel, ámbos publicador por participá den duna un testimonio. Trahando huntu den e ministerio pa un par di siman por hiba na rebishitanan excelente i asta un studio di Bijbel na cas den e buki Conocimentu cu Ta Hiba na Bida Eterno. E publicador mas experenciá lo por conducí e studio pa un tempu i despues pas’é over p’e proclamador di Reino nobo. Ki contentu ámbos publicador lo ta si e studiante di Bijbel manifestá aprecio p’e conocimentu di Dios!

9. Ki areglonan ta ser hací ora un publicador ta deseá pa ser bautisá?

⁹ Segun cu un publicador no-bautisá ta progresá spiritualmente, e por haci un dedicacion na Dios den oracion i deseá pa ser bautisá. (Compará cu Marco 1:9-11.) E mester haci su deseo pa bautismo conocí n’e superintendente presidente dje congregacion, kende lo haci areglo pa ancianonan repasá cu e publicador e preguntanan na página 175 te cu 218 di Organisá pa Cumpli cu Nos Ministerio. E cuater partinan den cua e preguntanan ta dividí por ser cubrí den tres sesion pa tres diferente anciano si ta posibel. Si nan ta di acuerdo cu e publicador no-bautisá tin un comprendimentu razonabel di siñansanan di Bijbel i ta cualificá den otro maneranan, nan lo bis’é cu e por bautisá. Como resultado di su dedicacion i bautismo, e ta bira ‘marcá’ pa salbacion.—Ezekiel 9:4-6.

Percurando pa Necesidadnan Special

10. Despues di completá su studio dje buki Conocimentu i ser bautisá, con un persona lo aumentá su conocimentu bíblico?

¹⁰ Despues cu un individuo a completá su studio di Bijbel for dje buki Conocimentu i a ser bautisá, kisas no ta necesario pa tene un studio formal cuné for di un di dos buki, manera Uní den adoracion dje único Dios berdadero.b Naturalmente, e persona recien bautisá lo siña hopi segun cu e ta prepará pa reunionnan cristian i ta asistí na nan regularmente. Tambe lo e gana conocimentu adicional segun cu su sed p’e berdad ta impuls’é pa lesa i studia publicacionnan cristian privadamente i pa considerá cosnan spiritual cu compañeronan creyente. Pero kico si surgi necesidadnan special?

11 (a) Con Apólos a ser yudá dor di Priscila i Akila? (b) Ki yudansa por ser duná na un adulto hóben recien bautisá cu ta pensa riba casamentu?

¹¹ Asta Apólos, cu “tabata bon versá den e Scritura” i cu a siña otronan tocante Jesus cu exactitud, a saca beneficio ora e cristiannan mas experenciá Priscila i Akila a “tum’é den nan compania i a exponé e caminda di Dios cu mayor exactitud na dje.” (Echonan 18:24-26; compará cu Echonan 19:1-7.) P’esei, suponé cu un adulto hóben recien bautisá ta pensa riba enamoracion i casamentu. Un cristian mas experenciá lo por yud’é haña informacion riba e temanan aki den publicacionnan di Watch Tower. Por ehempel, material práctico riba e tópiconan aki ta aparecé den e buki Loke hovenan sa puntra—Contesta práctica, seccion 7.c E publicador cu a conducí e studio di Bijbel cuné lo por considerá e material aki cu esun nobo, aunke esei lo no enbolbé un studio regular.

12. Ki yudansa por ser percurá pa partnernan casá recien bautisá cu tin problemanan?

¹² Considerá un otro ehempel. Tal bes partnernan casá recien bautisá ta experenciando problemanan den aplicá principionan piadoso. Nan lo por consultá cu un anciano, kende lo por dedicá algun anochi pa considerá e Scritura cu nan i dirigí nan atencion na informacion hañá den publicacionnan di Watch Tower. Sin embargo, e anciano lo no bolbe establecé un studio regular di Bijbel cu e pareha.

Ora un Persona Recien Bautisá Faya

13. Pakico ancianonan di congregacion mester mustra misericordia na un persona recien bautisá cu ta faya pero cu ta repentí?

¹³ Ancianonan ta imitá e Gran Wardador, Jehova, kende ta bisa: “Ami mes lo alimentá mi carnénan, . . . esun kibrá lo mi mara cu verband i esun cu ta sufri di dolor lo mi fortalecé.” (Ezekiel 34:15, 16; Efesionan 5:1) Na armonia cu e spiritu ei, disipel Hudas a urgi pa mustra misericordia na cristiannan ungí cu tabatin duda of cu a cai den picá. (Hudas 22, 23) Ya cu nos tin motibu pa spera hopi mas di cristiannan experenciá, siguramente mester mustra misericordia na un persona recien bautisiá—un mero lamchi—cu ta faya pero cu ta repentí. (Lucas 12:48; 15:1-7) P’esei, ancianonan, cu ta ‘husga pa Jehova,’ ta cuida e carnénan ei tiernamente i ta reahustá nan cu un spiritu di suavedad.—2 Crónicanan 19:6; Echonan 20:28, 29; Galationan 6:1.d

14. Kico mester ser hací ora un publicador recien bautisá cometé un picá serio, i con e por ser yudá?

¹⁴ Suponé, anto, cu un publicador recien bautisá ántes tabatin un problema cu bebementu i a sufri un recaida bebiendo di mas na un of dos ocasion. Of tal bes el a vence un custumber di hopi tempu di usa tabaco pero a cede n’e tentacion pa huma privadamente algun biaha. Aunke nos ruman nobo a pidi Dios pordon den oracion, e mester busca e yudansa di un anciano p’e picá no bira un custumber. (Salmo 32:1-5; Santiago 5:14, 15) Ora e mencioná su eror na un dje ancianonan, e anciano ei mester purba reahustá esun nobo na un manera misericordioso. (Salmo 130:3) Conseho bíblico por ta suficiente pa yud’é stret su camindanan pa su pianan despues di esei. (Hebreonan 12:12, 13) E anciano aki lo considerá e circunstancianan cu e superintendente presidente dje congregacion pa determiná ki yudansa mas lo mester ser duná.

15 Den algun caso, kico por ta necesario ora un persona recien bautisá peca?

¹⁵ Den algun caso mas por ta necesario. Si escándalo público, un peliger pa e tou of otro problemanan serio ta enbolbí, e cuerpo di anciano lo asigná dos anciano pa investigá e asuntu. Si e ancianonan aki haña cu e asuntu ta asina serio cu un comité hudicial ta necesario, nan lo informá e cuerpo di anciano di esaki. E cuerpo di anciano e ora ei lo apuntá un comité hudicial pa yuda esun cu a faya. E comité hudicial mester trata cuné den un manera tierno. Nan mester haci esfuerso pa reahust’é usando e Scritura. Si e reaccioná faborablemente na e esfuersonan bondadoso dje comité hudicial, anto nan lo por determiná si lo tin cualkier beneficio si e no ser usá pa partinan riba plataforma na reunionnan cu ta ser tené den Salon di Reino of si mester permitié duna comentario na reunionnan.

16. Kico ancianonan por haci pa yuda e persona cu a faya?

¹⁶ Si e persona cu a faya reaccioná faborablemente, un of dos anciano dje comité hudicial lo por haci areglo pa haci bishita di pastoreo cu e meta pa lanta su fe i edificá su aprecio p’e normanan hustu di Dios. Cada un di nan por traha cuné den e ministerio di veld de bes en cuando. Nan por tene algun consideracion bíblico cuné, posiblemente usando artículonan apropiado di E Toren di Vigilancia i Spierta! pero sin establecé un studio regular di Bijbel. Cu tal cuido tierno, e persona cu a faya por ser fortalecé pa resistí debilidadnan di carni den e dianan padilanti.

17. Ki pasonan ta ser tumá si un malechor bautisá no repentí i no bandoná su curso pecaminoso?

¹⁷ Naturalmente, siendo recien bautisá no ta excuus pa practicá picá sin repentí. (Hebreonan 10:26, 27; Hudas 4) Si cualkier malechor bautisá no repentí i no bandoná su curso pecaminoso, lo e ser expulsá for dje congregacion. (1 Corintionan 5:6, 11-13; 2 Tesalonicensenan 2:11, 12; 2 Juan 9-11) Ora e accion aki ta parce necesario, e cuerpo di anciano lo scoge un comité hudicial. Si expulsion tuma lugá, e anuncio breve aki lo ser hací: “. . . a ser scomulgá.”e

Yuda Nan “Avansá na Madures”

18. Pakico nos por ta sigur cu cristiannan recien bautisá i otronan semper lo tin mas pa siña tocante Jehova i su boluntad?

¹⁸ E mayoria inmenso di sirbidornan di Dios lo permanecé den e tou. Afortunadamente, tambe, cada un di nos lo por hala cada bes mas cerca nos Tata celestial pasobra nos semper lo por siña mas tocante dje i su boluntad. (Eclesiástes 3:11; Santiago 4:8) E miles di personanan cu a ser bautisá na Pentecoste na 33 E.C. siguramente tabatin mas pa siña. (Echonan 2:5, 37-41; 4:4) E gentilnan tambe, kendenan no tabatin conocimentu bíblico. Por ehempel, esaki tabata e caso di esnan cu a ser bautisá despues dje discurso di Pablo riba Areópago na Aténas. (Echonan 17:33, 34) Awe, tambe, esnan recien bautisá tin mas pa siña i mester di tempu i yudansa pa fortalecé nan determinacion pa sigui haci loke ta bon den bista di Dios.—Galationan 6:9; 2 Tesalonicensenan 3:13.

19. Con esnan cu ta ser bautisá por ser yudá pa “avansá na madures”?

¹⁹ Tur aña miles di persona ta ser bautisá i mester di yudansa di manera cu nan por “avansá na madures.” (Hebreonan 6:1-3) Mediante palabra, ehempel i yudansa práctico den e ministerio, lo bo por yuda algun bisti e personalidad nobo i “sigui cana den e berdad.” (3 Juan 4; Colosensenan 3:9, 10) Si bo ta un publicador experenciá, e ancianonan lo por invitá bo pa yuda un compañero creyente nobo den sirbishi di veld of pa considerá cierto puntonan bíblico cuné pa un par di siman afin di fortalecé su fe den Dios, su aprecio pa reunionnan cristian, etcétera. E relacion di wardadornan cu e tou ta manera esun di un tata cu ta spierta i un mama cu ta amabel. (1 Tesalonicensenan 2:7, 8, 11) Sin embargo, un par di anciano i sirbidor ministerial no por percurá pa tur loke ta necesario den un congregacion. Nos tur ta manera un famia kende su miembronan ta yuda otro. Nos cada un por haci algu pa yuda nos co-adoradornan. Abo mes tambe lo por ofrecé animacion, consolá esnan deprimí, apoyá esnan débil.—1 Tesalonicensenan 5:14, 15.

20. Kico bo por haci pa plama e conocimentu di Dios i duna cuido tierno na e carnénan di Jehova su sabana?

²⁰ Humanidad tin mester dje conocimentu di Dios, i como un Testigo di Jehova, bo por tin un participacion gososo den plama esei. Jehova su carnénan mester di cuido tierno, i bo por hunga un papel amoroso den yuda percurá esaki. Cu Jehova bendicioná bo ministerio, i cu e recompensá bo pa bo esfuersonan sincero pa yuda e carnénan di su sabana.

[Nota]

Con Lo Bo Contestá?

◻ Con Jehova ta trata su carnénan?

◻ Kico ta ser hací ora esnan nobo kier predicá?

◻ Con compañeronan creyente por yuda esnan nobo cu tin necesidadnan special?

◻ Ki yudansa ancianonan por duna esnan cu ta faya pero cu ta repentí?

◻ Con bo por yuda un persona recien bautisá “avansá na madures”?

[Plachi na página 16]

Charles T. Russell tabata bon conocí como un wardador amoroso dje tou

[Plachi na página 18]

Wardadornan compasivo ta trata e tou di Dios cu ternura