Un Esklabo Ku Tabata Obedesé Dios

Yósef tabata yu hòmber di Yákòb. Yósef su ruman hòmbernan mas grandi a ripará ku nan tata tabata stima Yósef mas. Kon bo ta kere nan lo a sinti nan? Wèl, nan tabata yalurs riba Yósef, i nan tabata odi’é. Yósef a soña algun kos straño, i el a konta su ruman hòmbernan loke el a soña. Nan a pensa ku e soñonan ei tabata nifiká ku un dia nan lo mester a bùig pa Yósef. Esei a pone nan odia Yósef mas.

Un biaha, Yákòb a bisa Yósef pa bai serka su ruman hòmbernan pa wak kon ta bai ku nan. E ruman hòmbernan di Yósef tabata kuida karné banda di un stat ku tabata yama Síkèm. Ora Yósef su ruman hòmbernan a mira Yósef ta bini djaleu, nan a bisa otro: ‘Ata e soñadó ta bini. Ban mat’é!’ Nan a gara Yósef i bent’é den un pos hundu. Su ruman hòmber Huda a bisa nan: ‘No mat’é. Laga nos bend’é komo esklabo.’ E ora ei, nan a bende Yósef. Nan a bende Yósef pa 20 pida plata. Algun komersiante di Mádian ku tabata riba kaminda pa bai Egipto a kumpra Yósef.

Yósef su rumannan a dòp e paña largu di Yósef den sanger di un kabritu i manda e paña pa nan tata. Nan a bisa nan tata: ‘No ta paña di Tata su yu esaki ta?’ Ora Yákòb a wak e paña, Yákòb a pensa ku ta un bestia salbahe a mata Yósef. Yákòb a bira masha tristu mes. Niun hende no por a konsol’é.

Na Egipto, e ismaelitanan a bende Yósef komo esklabo. Un hòmber ku tabata yama Pótifar a kumpr’é. Pótifar tabata un hòmber importante. Pótifar tabata traha pa Fárao. Asina, Yósef a bira esklabo di Pótifar. Pero Yehova tabata yuda Yósef. Pótifar a mira ku Yósef tabata un hende konfiabel i un bon trahadó. No a dura muchu, ku Pótifar a pone Yósef na enkargo di tur su kosnan.

E esposa di Pótifar a ripará ku Yósef tabata un mucha hòmber fuerte i un nèchi yònkuman. Tur dia, e esposa di Pótifar tabata bisa Yósef pa drumi kuné. Bo sa kiko Yósef a hasi? Yósef a nenga. Yósef a bisa e esposa di Pótifar: ‘Nò! Loke bo ke hasi no ta bon. Mi doño ta konfia mi, i abo ta su kasá. Si mi drumi ku bo, mi ta peka kontra Dios!’

Un dia, e esposa di Pótifar a purba di fòrsa Yósef pa drumi kuné. El a kohe Yósef su paña tene, pero Yósef a kore bai. Ora Pótifar a yega kas, su kasá a bis’é ku Yósef a purba di abusá di dje, pero ta gaña el a gaña. Pótifar a rabia masha pisá. El a laga nan sera Yósef den prizòn, pero Yehova no a lubidá riba Yósef.