Hosé Será Den Prizon

HOSÉ tabatin 17 aña di edat so ora nan a hib’é Egipto. Nan a bend’é ku un hòmber yamá Potifar. Potifar a traha p’e rei di Egipto, yamá Fárao.

Hosé a traha duru pa su doño Potifar. P’esei, ora Hosé a bira mas grandi, Potifar a pon’é na enkargo di henter su kas. Pakiko, anto, nan a sera Hosé den prizon? Debí na e esposa di Potifar.

Hosé a krese bira un hòmber masha nechi mes, i e esposa di Potifar tabata ke pa e drumi kuné. Pero Hosé tabata sa ku esei ta malu i el a nenga. E kasá di Potifar a bira masha rabiá. P’esei, ora su kasá a yega kas, e muhé a gaña riba Hosé i a bisa: ‘E Hosé malbado ei a purba drumi ku mi!’ Potifar a kere su esposa, i el a bira masha rabiá ku Hosé. P’esei el a manda pa ser’é den prizon.

E hòmber enkargá ku prizon pronto a mira ku Hosé ta bon hende. P’esei el a pon’é na enkargo di tur otro prizonero. Despues Fárao a rabia ku su kopero i su panadero, i a sera nan den prizon. Un anochi kada un a haña un soño spesial, pero nan no tabata sa loke nan soño ta nifiká. Su siguiente dia Hosé a bisa: ‘Bisa mi kiko boso a soña.’ I despues ku nan a bis’é, Hosé a splika nifikashon di nan soño ku ayudo di Dios.

Hosé a bisa e kopero: ‘Denter di tres dia nan lo laga bo sali for di prizon, i lo bo bira kopero di Fárao atrobe.’ Anto Hosé a sigui bisa: ‘Despues ku bo sali, konta Fárao tokante mi, i yuda mi sali for di e lugá aki.’ Pero Hosé a bisa e panadero: ‘Denter di tres dia so Fárao lo kap bo kabes afó.’

Riba e di tres dia a sosodé nèt manera Hosé a bisa. Fárao a kap kabes di e panadero afó. Pero e kopero a sali for di prizon i a kuminsá sirbi e rei atrobe. Pero e kopero a lubidá Hosé kompletamente! E no a konta Fárao tokante dje, i Hosé tabatin ku keda den prizon.