E Diesdos Spionnan

E israelitanan a bai for di seru Sinaí. Nan a kana den desierto di Paran, i nan a yega un lugá ku tabata yama Kádes. Einan, Yehova a bisa Moises: ‘Skohe 12 hende hòmber, esta, un hòmber di kada tribu, i manda nan bai spioná Kánan, esta, e pais ku lo mi duna e israelitanan.’ Pues, Moises a skohe 12 hende hòmber, i el a bisa nan: ‘Bai Kánan, i wak si e pais tin bon tera pa planta kos di kome. Wak si e hendenan ta fuerte òf suak, i wak si nan ta biba den tènt òf den stat.’ Anto, e 12 spionnan a bai Kánan. Hosue i Kálèb tabata dos di e spionnan ei.

Despues di 40 dia, e spionnan a bai Kádes bèk. Nan a trese figu, granatapel i drùif. Nan a bisa: ‘E ta un pais bunita, pero e hendenan einan ta fuerte, i e statnan tin muraya haltu.’ Kálèb a bisa: ‘Nos por konkistá e pais. Ban aworakí mes!’ Bo sa dikon Kálèb a bisa esei? Pasobra e i Hosue tabata konfia den Yehova. Pero e otro dies spionnan a bisa: ‘Nò! E hendenan einan ta masha grandi mes; nan ta gigante. Kompará ku nan, nos ta chikitu manera dalakochi.’

E israelitanan a haña miedu. Nan a kuminsá keha i reklamá, i nan a bisa otro: ‘Laga nos skohe un otro lider i bai Egipto bèk. Dikon nos tin ku bai Kánan? Pa nan mata nos?’ Hosue i Kálèb a bisa: ‘No desobedesé Yehova, i no tene miedu. Yehova lo protehá nos.’ Pero e israelitanan no kier a tende di nan dos. Nan kier a asta mata Hosue i Kálèb!

Bo sa kiko Yehova a hasi? El a bisa Moises: Mi a hasi asina tantu kos bon pa e israelitanan; tòg nan no ke obedesé mi. P’esei, nan lo keda 40 aña den desierto. I nan lo muri den desierto. Nan yunan so i tambe Hosue i Kálèb lo bai biba den e pais ku mi a primintí di duna e israelitanan.’