E 12 Spionnan

WAK e frutanan ku e dos hòmbernan ta karga. Mira kon grandi e tròshi di drùif ei ta. Mester di dos hòmber pa karg’é riba un palu. I mira e figunan i e granatapelnan. Di unda e frutanan bunita ei a bini? Di e tera di Kánaan. No lubidá, Kánaan ta e tera unda Abraham, Isaak i Jakòb a biba promé. Pero debí na e hamber ku tabatin einan, Jakòb i su famia a bai biba na Egipto. Awor, rònt di 216 aña despues, Moisés ta hiba e israelitanan bèk na Kánaan. Nan a yega na un lugá den desierto yamá Kades.

Mal hende tabata biba den e tera di Kánaan. P’esei Moisés a manda 12 spion, i a bisa nan: ‘Buska pa sa kuantu hende ta biba einan, i kon fuerte nan ta. Buska pa sa si e tera ta bon pa planta. I hasi sigur di trese fruta ora boso bolbe.’

Ora e spionnan a bolbe na Kades, nan a bisa Moisés: ‘Esei realmente ta un bon tera.’ I pa duna prueba, nan a mustra Moisés algun di e frutanan. Pero 10 di e spionnan a bisa: ‘E hendenan ku ta biba ei ta grandi i fuerte. Nan lo mata nos si nos purba poderá di e tera.’

E israelitanan a spanta ora nan a tende esei. Nan a bisa: ‘Mihó nos a muri na Egipto òf asta aki den desierto. Nan lo mata nos tur den bataya, i nan lo kohe nos esposa- i yunan. Laga nos skohe un lider nobo na lugá di Moisés, i bolbe Egipto!’

Pero dos di e spionnan a konfia den Yehova, i a purba kalma e pueblo. Nan nòmber ta Josué i Kalèb. Nan a bisa: ‘No tene miedu. Yehova ta ku nos. Ta fásil pa nos poderá di e tera.’ Pero e pueblo no a skucha. Nan asta kier a mata Josué i Kalèb.

Esei a hasi Yehova masha rabiá, i el a bisa Moisés: ‘Ningun hende di 20 aña bai ariba lo drenta e tera di Kánaan. Nan a mira e milagernan ku mi a hasi na Egipto i den desierto, pero ainda nan no ta konfia mi. P’esei nan lo dual den desierto pa 40 aña te ora delaster un di nan muri. Josué i Kalèb so lo drenta e tera di Kánaan.’