Ráhab A Skonde e Spionnan

Ora e spionnan israelita a bai Yériko, nan a keda na kas di un señora ku tabata yama Ráhab. E rei di Yériko a haña sa ku e spionnan tabata einan. P’esei, el a manda algun sòldá bai kas di Ráhab. Pero Ráhab a skonde e dos spionnan riba dak di su kas, i el a manda e sòldánan bai otro kaminda. Ráhab a bisa e spionnan: ‘Mi ta yuda boso pasobra mi sa ku Yehova ta ku boso, i mi sa ku boso lo konkistá e pais akí. Por fabor, primintí mi ku boso lo spar mi bida i bida di mi famia.’

E spionnan a bisa Ráhab: ‘Nos ta primintí bo ku tur hende ku ta den bo kas lo keda safe.’ Nan a bis’é tambe: ‘Bo tin ku mara un kabuya kòrá na bo bentana, i bo famia lo keda na bida.’

Ráhab a laga e spionnan baha ku kabuya for di bentana, i e spionnan a bai den e serunan. Nan a keda tres dia den e serunan promé ku nan a bai bèk serka Hosue. Despues, e israelitanan a krusa riu Yordan, i nan a prepará pa konkistá e pais. E promé stat ku nan a konkistá tabata Yériko. Yehova a bisa nan ku nan mester a marcha rònt di e stat seis dia largu; kada dia, nan mester a marcha un biaha rònt di e stat. Riba e di shete dia, nan a marcha shete biaha rònt di e stat. Despues, e saserdotenan a supla tròmpèt, i e sòldánan a grita masha duru mes. E murayanan di e stat a basha abou, pero e kas di Ráhab, ku tabata keda riba muraya di e stat, sí no a basha abou. Ráhab i su famia a keda na bida pasobra Ráhab a konfia den Yehova.