Hosue i e Hendenan di Gábaòn

E otro nashonnan na Kánan a tende loke a pasa na Yériko. P’esei, e reinan di e nashonnan ei a disidí di bini huntu pa bringa kontra e israelitanan. Pero e hendenan di Gábaòn a bini ku un otro plan. Nan a bisti paña tur gastá i kibrá, i nan a bai bisa Hosue: ‘Nos a bini di un pais leu. Nos a tende di Yehova, i nos a tende di tur loke el a hasi pa boso na Egipto i na Móab. Primintí nos ku boso lo no bringa kontra nos, i nos lo bira boso sirbidónan.’

Hosue a kere nan, i el a primintí nan ku lo e no bai bringa kontra Gábaòn. Tres dia despues, Hosue a haña sa ku no tabata bèrdat ku nan a bini di un pais leu. Nan tabata di Kánan mes. Hosue a puntra e gabaonitanan: ‘Dikon boso a gaña nos?’ Nan a bis’é: ‘Pasobra nos no ke muri. Nos sa ku Yehova, boso Dios, ta bringa pa boso. Por fabor, no mata nos.’ Hosue a kumpli ku su promesa, i e no a mata nan.

Poko tempu despues, sinku rei di Kánan i nan sòldánan a bai Gábaòn pa bringa kontra e hendenan di e stat. Hosue i su sòldánan a kana henter anochi pa bai Gábaòn. E guera a kuminsá mainta trempan. E kananeonan a hui bai diferente kaminda. Pero Yehova a manda hagel grandi riba nan. Despues, Hosue a pidi Yehova pa e laga solo keda para ketu den shelu, sin baha. Dikon Hosue a pidi Yehova laga solo para ketu si nunka esei no a yega di sosodé? Pasobra Hosue tabata konfia den Yehova. Solo no a baha pa henter un dia, te ora e israelitanan a logra gana e guera kontra e reinan di Kánan i nan sòldánan.