E Gabaonitanan Sabí

HOPI stat di Kánaan a prepará awor pa bringa kontra Israel. Nan a kere ku nan por a gana. Pero e hendenan di e stat bisiña di Gabaon no a kere esei. Nan tabata konvensí ku Dios tabata yuda e israelitanan, i nan no kier a bringa kontra Dios. Pues, bo sa kiko e gabaonitanan a hasi?

Nan a disidí di hasi manera kos ku nan ta biba masha leu. P’esei algun hòmber a bisti paña frañá i sandalia gastá. Nan a karga nan burikunan ku saku gastá, i a hiba pan bieu i seku. Anto nan a bai serka Josué i a bisa: ‘Nos a bini di un tera masha leu, pasobra nos a tende di boso gran Dios, Yehova. Nos a tende di tur loke el a hasi pa boso na Egipto. P’esei nos lidernan a bisa nos prepará kuminda pa un biahe i bai i bisa Josué: “Nos ta boso sirbidónan. Primintí ku boso lo no hasi guera kontra nos.” Bo por mira ku nos pañanan ta gastá dor di e biahe largu i ku nos pan a bira masha bieu i seku.’

Josué i e otro lidernan a kere e gabaonitanan. P’esei nan a primintí ku nan lo no bringa kontra nan. Pero tres dia despues nan a haña sa ku ta ei serka mes e gabaonitanan tabata biba.

Josué a puntra nan: ‘Pakiko boso a bisa nos ku boso a bini di un tera leu?’

E gabaonitanan a kontestá: ‘Nos a hasi esei pasobra hende a bisa nos ku boso Dios Yehova a primintí di duna henter e tera di Kánaan na boso. P’esei nos tabatin miedu ku boso lo mata nos.’ Pero e israelitanan a kumpli ku nan promesa, i nan no a mata e gabaonitanan. Mas bien nan a hasi nan bira nan sirbidónan.

E rei di Yerusalèm a bira masha rabiá dor ku e gabaonitanan a sera pas ku Israel. P’esei el a bisa kuater otro rei: ‘Bin yuda mi bringa kontra Gabaon.’ I esei ta loke e sinku reinan a hasi. Dor ku e gabaonitanan a sera pas ku Israel, e sinku reinan aki a bin pa bringa kontra nan. Tabata sabí pa e gabaonitanan a sera pas ku e israelitanan? Nos lo mira.