Pregunta Di Lektor

Dikon 2 Sámuèl 21:7-9 ta bisa ku David “a spar bida di Mefíbosèt” anto djei ta bisa ku el a entregá Mefíbosèt pa ser matá?

Un hende ku lesa e relato akí aribariba por puntra su mes esei. Pero, e relato ta papia di dos hende ku tabata yama Mefíbosèt. Laga nos analisá loke a pasa i ki lès nos por siña.

Rei Saul tabatin nuebe yu, shete hòmber i dos muhé. Su yu mayó tabata yama Yónatan. Despues, Saul su konkubina Rizpa a dun’é un yu ku tabata yama Mefíbosèt. Remarkabel ta ku Yónatan tambe tabatin un yu ku tabata yama Mefíbosèt. Pues, Rei Saul tabatin tantu un yu komo un ñetu ku tabata yama Mefíbosèt.

Na dado momento, Rei Saul a kuminsá odia e gabaonitanan i a purba di mata nan tur. Ta parse ku el a mata vários di nan. Pero, Saul no tabatin mag di hasi e kos ei. Dikon? Pasobra den tempu di Hosue, e lidernan di Israel a sera un pakto di pas ku e gabaonitanan.​—Hos. 9:3-27.

Anto e pakto ei ainda tabata na vigor den tempu di Rei Saul. Pero, e rei no a tene su mes na e pakto i a purba di mata e gabaonitanan. Debí na esei, tantu Saul komo su kas tabata “kulpabel di dramamentu di sanger.” (2 Sám. 21:1) Ora David a bira rei, e gabaonitanan ku a sobrebibí a bin kont’é di e kos teribel ku Saul a hasi di traha plan pa eliminá nan. David a puntra nan kon e por rektifiká e eror ku Saul a kometé i pa Yehova bendishoná Israel atrobe. Nan no a pidi pa sèn. Mas bien nan a pidi pa entregá nan shete desendiente di Saul pa ser matá. (Num. 35:30, 31) David a duna nan loke nan a pidi.​—2 Sám. 21:2-6.

Pa e tempu ku e gabaonitanan a bai serka David, Saul ku Yónatan a muri den bataya kaba. Pero e yu di Yónatan, Mefíbosèt, tabata bibu. Tempu e tabata chikitu el a bira lam debí na un aksidente i no partisipá den loke su abuelo a hasi kontra e gabaonitanan. Ademas, David i Yónatan tabata amigu di otro i nan a sera un pakto ku a benefisiá Yónatan su desendientenan, inkluso su yu Mefíbosèt. (1 Sám. 18:1; 20:42) E relato ta bisa: “Rei [David] a spar bida di Mefíbosèt, yu hòmber di Yónatan i ñetu di Saul, pa motibu di e huramentu ku e i Yónatan, yu hòmber di Saul, a hasi den nòmber di Yehova.”​—2 Sám. 21:7.

Pues, kon David a onra e petishon di e gabaonitanan? El a entregá nan dos yu hòmber di Saul, un di nan tabata yama Mefíbosèt, i sinku ñetu di Saul. (2 Sám. 21:8, 9) Asina ei, David a kita e kulpa di sanger for di riba e pais.

Loke a pasa ei ta mas ku djis un historia. Si e dos yu hòmbernan di Saul i su sinku ñetunan tabata inosente, Yehova Dios lo no a bai di akuerdo pa entregá nan pa ser matá. Dikon? Pasobra e lei di Dios a bisa: “Yu hòmbernan no mester wòrdu matá pa motibu di nan tatanan; kada un mester wòrdu matá pa su mes piká.” (Deu. 24:16) A base di esei, ta parse ku e shete desendientenan di Saul ku a muri di un manera òf otro tabatin algu di haber ku e intento di genosidio kontra e gabaonitanan. P’esei, nan mester a paga pa nan mal echo.

E relato akí ta siña nos ku un hende no por hustifiká e malu ku el a hasi pensando òf bisando ku el a djis sigui instrukshon. Un proverbio ta bisa: “Mira bon unda bo pianan ta hiba bo, e ora ei tur bo kamindanan lo keda establesí.”​—Pro. 4:24-27; Efe. 5:15.