Abo A Yega di Sinti Bo Rechasá?

UN HENDE por sintié rechasá ora otro hende no ta asept’é pa motibu di su rasa, su nashonalidat, òf debí ku e ta papia òf hasi kos na un manera diferente. Abo a yega di sinti bo rechasá?—a

Beibel ta papia di un hende ku a yega di sintié asina. Su nòmber ta Mefi-boset. Si abo a yega di sinti bo manera Mefi-boset, bo por siña hopi for di dje. P’esei laga nos ban wak ken Mefi-boset tabata i dikon e tabata sintié rechasá.

Mefi-boset tabata yu hòmber di Jonatan, un bon amigu di David. Promé ku Jonatan a muri den un bataya, el a pidi David pa sòru bon pa su yunan. Despues di tempu, ora David tabata rei kaba, el a kòrda loke Jonatan a bis’é. I p’esei el a kòrda riba Mefi-boset. Tempu Mefi-boset tabata mucha, el a haña un aksidente i p’esei e no por a kana bon mas pa restu di su bida. Bo ta komprondé awor dikon e por a sintié rechasá?—

David tabata kier a trata e yu di Jonatan bon. P’esei David a perkurá pa Mefi-boset haña un kas banda di su palasio na Yerusalèm i el a reservá un lugá pa Mefi-boset por a kome huntu kuné na mesa. Ademas, David a enkargá un hòmber ku yama Ziba, pa e i su yunan i su sirbidónan yuda Mefi-boset. No kabe duda ku David a kuida Mefi-boset bon. Pero bo sa kiko a pasa despues?—

David a haña problema den famia. Absalon, un di David su yu hòmbernan, kier a kita e trono for di David. David mester a hui bai, i hopi di su amigunan a bai huntu kuné pasobra nan tabata sa ku e tabata e rei berdadero. Mefi-boset tambe kier a bai kuné, pero e no por a bai pasobra e tabatin masha difikultat pa kana.

Despues, Ziba a gaña David. El a bisa David ku Mefi-boset no a bai kuné pasobra e kier a bira rei. Lamentablemente David a kere Ziba, anto David a duna Ziba henter e kunuku di Mefi-boset. Ora David a gana e bataya kontra Absalon, el a bai Yerusalèm bèk. I Mefi-boset por a konta David e otro banda di e medaya. E ora ei, David a disidí ku Mefi-boset i Ziba mester a parti e kunuku. Kiko bo ta kere ku Mefi-boset a hasi?—

Wèl, e no a keha ku David a kometé un inhustisia kuné. E tabata kier a mantené pas pa asina David por a goberná e pueblo bon. P’esei el a bisa David pa laga Ziba keda ku henter e kunuku numa. Loke Mefi-boset a konsiderá realmente importante tabata ku Yehova su sirbidó David tabata rei na Yerusalèm atrobe.

Mefi-boset a sufri masha hopi mes. Hopi biaha el a sintié rechasá. Pero Yehova tabata stim’é i a kuid’é. Kiko nos ta siña for di e relato bíbliko akí?— Ku asta ora nos ta hasi loke ta bon, tòg otro hende por gaña riba nos. Hesus a bisa: “Si mundu odia boso, sa anto ku el a odia ami promé ku boso.” Nan a odia Hesus asina tantu ku nan a mat’é. Nos por tin sigur ku si nos hasi loke ta bon, tantu e Dios berdadero, Yehova, komo su Yu, Hesus, lo stima nos.