Un Lider Nobo i Dos Hende Muhé ku Hopi Kurashi

Hosue a guia i dirigí e pueblo di Yehova pa hopi aña. Hosue a muri ku 110 aña. Tempu ku Hosue tabata na bida, e israelitanan tabata adorá Yehova. Pero despues ku Hosue a muri, e israelitanan a kuminsá adorá dios falsu, meskos ku e hendenan di Kánan. Komo ku e israelitanan no a sigui adorá Yehova, Yehova a laga un rei di Kánan hasi bida di e israelitanan difísil. E rei ei tabata yama Yabin. E israelitanan a roga Yehova pa yudansa. P’esei, Yehova a manda un hende pa yuda nan, un lider nobo, ku tabata yama Bárak. Bárak lo a yuda e israelitanan kuminsá adorá Yehova atrobe.

Un profeta ku tabata yama Débora a manda yama Bárak. Débora a duna Bárak e siguiente mensahe di Yehova: ‘Bai bringa kontra e ehérsito di Yabin na riu Kison; bo tin ku bai ku 10.000 hòmber. Lo bo gana e guera ei; lo bo derotá Sísera, ku ta e komandante di ehérsito di Yabin.’ Bárak a bisa Débora: ‘Mi ta bai solamente si abo bai ku mi.’ Débora a bis’é: ‘Mi ta bai ku bo. Pero un kos sí: No ta abo lo mata Sísera. Yehova a bisa ku ta un hende muhé lo mata Sísera.’

Débora a subi seru Tábòr huntu ku Bárak i Bárak su ehérsito pa nan prepará pa e bataya. Asina ku Sísera a tende ku nan a bai einan, el a manda tur su garoshinan di guera i tur su sòldánan bai den e vaye. Débora a bisa Bárak: ‘Awe, Yehova lo laga bo gana e bataya akí.’ Bárak i e 10.000 hòmbernan ku tabata huntu kuné a kore duru i baha e seru pa nan bai bringa kontra e ehérsito di Sísera. E ehérsito ei tabata fuerte.

Pero Yehova a laga e awa di riu Kison subi. E garoshinan di guera di Sísera a keda pegá den lodo. Sísera a baha for di su garoshi i kore limpi bai. Bárak i e hòmbernan ku tabata huntu kuné a gana e bataya kontra e ehérsito di Sísera, pero Sísera a logra skapa. El a kore bai skonde den tènt di un señora ku tabata yama Yael. Yael a duna Sísera lechi pa bebe, i Yael a tap’é ku un deken. Komo ku Sísera tabata kansá, el a pega soño. Despues, Yael a kana bai pokopoko serka dje, i el a klaba un pènchi di tènt den Sísera su kabes. Asina, Sísera a muri.

Ora Bárak a bin buska Sísera, Yael a sali for di tènt i bis’é: ‘Bin paden. Mi ta mustra bo e hòmber ku bo ta buska.’ Bárak a bai paden, i el a mira Sísera drumí morto einan. Anto Bárak i Débora a kanta un kantika pa alabá Yehova pasobra Yehova a yuda e israelitanan gana e guera kontra nan enemigunan. Pa e siguiente 40 añanan, tabatin pas na Israel.