Un Karta di Kuerpo Gobernante

Rumannan stimá:

Komo sirbidó di Yehova, nos ta stima su Palabra, Beibel. Nos ta konvensí ku Beibel ta kontené historia eksakto, guia konfiabel pa bida i evidensia kla ku Yehova ta stima nos. (Salmo 119:105; Lúkas 1:3; 1 Huan 4:19) Nos tin masha deseo di yuda otro hende haña sa e bèrdatnan balioso ku Beibel ta kontené. P’esei, ta un plaser pa nos publiká e buki akí: “Lès Ku Nos Por Siña for di Beibel.” Laga nos konta un poko tokante e buki akí.

E buki akí a ser prepará spesialmente pa mucha. Sinembargo, hende grandi, ku ke siña mas di Beibel, tambe por benefisiá di e buki akí. Beibel ta un buki pa tur hende. Pues, nos tur por benefisiá di e lèsnan ku Beibel ta siña nos. Un estudio di Beibel sigur lo hasi nos berdaderamente felis.

E buki akí ta basá riba Beibel, i e ta relatá vários historia, desde kreashon padilanti. Hopi esfuerso a ser hasí pa presentá e relatonan di Beibel na un manera kla i simpel i, kaminda ta posibel, den e órden ku e susesonan a tuma lugá.

E buki akí ta hasi mas ku djis konta relato bíbliko. Tantu e informashon komo e plachinan a ser prepará na un manera pa hasi e relatonan di Beibel bibu pa asina nos por sinti loke e personanan den e relatonan a sinti.

E publikashon akí ta yuda nos mira ku Beibel ta un buki tokante hende. E publikashon ta relatá historia di hende ku a obedesé Yehova i historia di hende ku a desobedesé Yehova, i e ta yuda nos saka lès for di nan bon òf mal ehèmpelnan. (Romanonan 15:4; 1 Korintionan 10:6) E buki tin 14 sekshon. Kada sekshon ta kuminsá ku un resúmen di algun lès importante ku nos por siña.

Si bo ta un mayor, bo por lesa kada biaha un lès ku bo yu i papia tokante e plachinan kuné. Despues, boso por lesa e tekstonan di Beibel ku e lès ta basá riba dje huntu. Yuda bo yu mira konekshon entre loke e ta lesa den Beibel i e lès ku boso ta studiando den e buki. Bo por hasi uso di e mesun método akí ora bo ta yuda un persona adulto komprondé Beibel.

Nos ta spera ku e publikashon akí lo yuda tur hende sinsero—sea ku nan ta grandi òf yòn—saka lès for di Palabra di Dios i apliká e lèsnan ei den nan bida. Si nan hasi esei, nan tambe por adorá Yehova i forma parti di su famia ku e ta stima masha hopi.