Ki Clase di Siguridad bo ta Anhela?
HENDE diferente tin idea diferente tocante siguridad. Algun hende ta considera siguridad como stabilidad entre poder militar opositor. Por ehempel, nacion fuerte cu ta domina esenario di mundo hunto cu nan aliado europeo a combini pa tuma hopi medida pa reduci e rísico di cu incidente chikito por crece pa bira un gera nuclear mundial. E buki na inglés titulá E Anuario di Instituto di Estocolmo pa Investigacion di Paz Internacional 1990, a expresa asombro riba e falta di interés dje nacionan “di otro parti di mundo” den tal medida.
Sin embargo, pe miyones di hende cu ta biba den país pober, “siguridad” kier men cuminda i atencion médico. Segun e splicacion di Yash Tandon, experto den ciencia política, “En cuanto pensamento riba ‘paz i siguridad,’ concepto cu nan ta recibi for dje cultura occidental dominante ta prevalece. . . . Nan ta mira ‘siguridad’ como un asunto di armamento i desarmamento, distinto di preocupacion tocante siguridad di dos tercera parti di mundo cu no tin ni cas ni cuminda.”
En cuanto e Bijbel, e ta priminti cu bao di Reino di Dios lo no tin gera mas. “E ta pone fin na gera te na extremidad dje tera. Lo e kibra boog i corta lanza na pida pida; lo e kima garoshi den candela.” (Salmo 46:9; Isaías 2:4) Enfermedad fisical lo ta algo di pasado. “Ningun residente lo bisa: ‘Mi ta malu.’ Hende cu ta biba den e tera lo ta esnan cu a haya nan error pordoná.”—Isaías 33:24.
Bao dje Reino di Dios, insiguridad económico lo no ser un peliger mas pa ningun hende. “Nan siguramente lo traha cas i ocupánan; i nan siguramente lo planta cunucu di wijndruif i come nan fruta. Nan lo no edifica i otro ocupa; nan lo no planta i otro comé.”—Isaías 65:21, 22.
No obstante, mas importante ainda, e Reino lo kita e motibo básico pe falta di paz i siguridad. Ken ta responsabel pe pasado humano largu di gobierno opresivo cu tabata un fracaso? Maske Dios a permiti nan existencia pa un bon motibo, esun cu ta keda responsabel ta Satanás, siendo cu e Bijbel ta bisa cu ‘e mundo henter ta bao di su poder.’—1 Juan 5:19.
Anto, ki alivio lo tin, ora bao dje Reino di Dios, e palabra di Pablo pe romanonan lo ser cumplí finalmente: “Di su parti, e Dios cu ta duna paz lo aplasta Satanás bao di boso pia pronto”! (Romano 16:20) E Reino celestial di Dios so, bao di Rey Jesucristo, por logra tal cos. P’sei, bao dje Reino so e tera lo ser transformá na un paradijs.—Génesis 1:28; Lucas 23:43.
Sí, e siguridad primintí den e Bijbel ta hopi mas superior i tin mas alcance cu tur loke hende a concibí. Sí, nos ta leza cu “morto lo no existi mas, ni yoramento ni sclamamento ni dolor lo no existi mas”! (Revelacion 21:4) Nos por confia tal promesa? Sí, pasobra nan a bini dje Creador todopoderoso, Jehova Dios, cu també a declara: “Mi palabra cu ta sali for di mi boca . . . lo no bolbe cerca mi sin resultado, sino siguramente lo haci e cos cu mi ta gusta, i lo tin éxito sigur den e cos pa locual mi a mandé.” (Isaías 55:11) Paso cu Jehova Dios ta tuma asta awor pa hiba humanidad na paz, siguridad, i prosperidad permanente i gozoso ta goza bon éxito, pe vindicacion di Su soberanía eterno.