Berdadero Siguridad—Awor i pa Semper

NO CABE DUDA cu Jehova Dios por percurá siguridad pa su pueblo. E ta “Esun Todopoderoso.” (Salmo 68:14) Su nomber único ta nificá “E Ta Causa di Ser.” Esaki ta identifik’é como e Unico den e universo capas pa vence cualkier obstáculo pa cumpli cu su promesanan i realisá su boluntad. Dios mes ta declará: “Asina mi palabra cu ta sali for di mi boca lo resultá di ta. Lo e no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur pa locual mi a mand’é.”—Isaías 55:11.

Dios ta percurá siguridad pa esnan cu ta confia den dje. Su Palabra ta garantisá esaki. “E nomber di Jehova ta un toren fuerte,” Rey sabí Sálomon a declará bou di inspiracion divino. “Den dje e hustu ta core drenta i ta ser duná proteccion.” El a bisa mas aleu: “Esun cu ta confia den Jehova lo ser protehá.”—Proverbionan 18:10; 29:25.

Siguridad pa Dios Su Sirbidornan

Semper Jehova a percurá siguridad pa esnan cu ta confia den dje. Por ehempel, profeta Jeremías a disfrutá di Dios su proteccion. Ora e ehércitonan di Babilonia a sitia Jerusalem apóstata, e hendenan tabatin cu “come pan na midí di pesa i den preocupacion anshá.” (Ezekiel 4:16) E situacion a bira asina crítico cu algun hende muher a herebé i come nan propio yunan. (Lamentacionnan 2:20; 4:10) Maske Jeremías a ser tené den custodia e tempu ei pa motibu di su predicacion intrépido, Jehova a haci sigur cu nan a “dun’é un pan rondó diariamente for dje caya dje panaderonan, te ora tur e pan dje stad a caba.”—Jeremías 37:21.

Ora Jerusalem a cai den man dje babilonionan, Jeremías no a ser matá ni hibá como prezu na Babilonia. En bes di esei, “e hefe [babilónico] dje guardaespalda . . . a dun’é un porcion di alimento i un regalo i a lagu’e bai.”—Jeremías 40:5.

Siglonan despues Jesucristo a sigurá Dios su sirbidornan: “Nunca sea anshá i bisa, ‘Kico nos lo come?’ of, ‘Kico nos lo bebe?’ of, ‘Kico nos lo bisti?’ Pasobra tur e cosnan aki e nacionnan ta sigui tras di nan cu empeño. Pasobra boso Tata celestial sa cu boso tin mester di tur e cosnan aki. Sigui busca, anto, promé e reino i Su husticia, i tur e otro cosnan aki lo ser agregá na boso.”—Mateo 6:31-33.

Esaki ta nificá cu Jehova su sirbidornan lo disfrutá di proteccion divino for di tur calamidad actual? No, esei no ta e caso. Esnan fiel no ta inmuno contra daño. Cristiannan berdadero ta bira malu, ta experenciá persecucion, ta bira víctima di crímen, ta muri den accidente i ta sufri den otro maneranan.

Aunke Jehova ainda no ta suministrá siguridad total contra daño, informenan ta mustra cu sí e ta usa su poder pa soru pa su sirbidornan i pa protehá nan. Tambe cristiannan ta ser protehá for di hopi problema debí cu nan ta aplicá principionan bíblico den nan bida. (Proverbionan 22:3) Ademas, nan ta disfrutá dje siguridad di un asociacion mundial di rumannan spiritual amoroso, cu ta yuda otro den tempu di necesidad. (Juan 13:34, 35; Romanonan 8:28) Por ehempel, como reaccion riba e situacion di desesperacion di nan rumannan di Ruanda, un lugá azotá dor di guera, Testigonan di Jehova na Europa rápidamente a haci donacion di placa i provision i a manda pa nan 65 ton di paña i remedi, alimento i otro provisionnan na balor di US$ 1.600.000.—Compará cu Echonan 11:28, 29.

Aunke Jehova ta permití pa cristiannan berdadero pasa dor di prueba, nan tin e siguransa cu lo e duna nan e fortalesa, yudansa i sabiduria pa wanta. Ora apostel Pablo a skirbi compañeronan creyente, el a bisa: “Ningun tentacion [prueba] a bini riba boso fuera di loke ta comun pa hende. Pero Dios ta fiel, i lo e no laga boso ser tentá [probá] mas ayá di loke boso por soportá, sino huntu cu e tentacion [prueba] lo e percurá tambe p’e salida pa boso por want’é.”—1 Corintionan 10:13; The Emphatic Diaglott.

Loke Dios Ta Haci pa Su Pueblo

Awe, miyones di hende tin deleite den haci e boluntad di Dios. Nan no ta forsá pa sirbi Dios; nan ta haci esei pasobra nan conoc’é i ta stim’é. En buelta, debí cu Jehova ta stima su sirbidornan leal, e ta proponé pa transformá e tera den un paradijs unda humanidad obediente lo disfrutá di pas, salú i siguridad pa semper.—Lucas 23:43.

Dios lo haci esaki pa medio di un gobiernu celestial, cu tin su Rey nombrá, Jesucristo, como su Gobernante. (Daniel 7:13, 14) Bijbel ta referí n’e gobiernu aki como e “reino di Dios” i como “e reino di shelu.” (1 Corintionan 15:50; Mateo 13:44) E Reino di Dios lo reemplasá tur gobiernu humano. En bes di tin hopi gobiernu riba tera, lo tin un solo gobiernu. Lo e reina den husticia riba henter e tera.—Salmo 72:7, 8; Daniel 2:44.

Jehova ta extendé na tur persona e invitacion pa biba bou dje Reino. Un manera cu e ta haci esaki ta mediante e distribucion amplio dje Bijbel, e buki cu ta splica loke e Reino lo haci pa humanidad. Bijbel ta e buki cu e circulacion di mas amplio na mundu, i awor e ta disponibel, sea completo of en parte, den mas cu 2.000 idioma.

Jehova Dios amorosamente ta yuda hende comprendé loke Bijbel ta siña tocante e Reino. E ta haci esei dor di instruí i manda hende pa splica e Scritura na otronan. Mas cu cincu miyon Testigo di Jehova awor ta proclamando e bon nobo dje Reino di Dios den mas cu 230 pais.

Berdadero Siguridad pa Tur Hende?

Tur hende lo aceptá e invitacion pa bira un súbdito dje Reino di Dios armonisando nan mes cu su normanan hustu? No, pasobra hopi hende no tin interes den haci e boluntad di Dios. Nan ta rechasá esfuersonan pa yuda nan cambia nan bida pa lo mehor. En berdad, nan ta demostrá di ta manera esnan di ken Jesus a bisa: “E curason dje pueblo aki a bira indispuesto pa ricibí, i cu nan orea nan a tende sin respondé, i nan a cera nan wowo; pa nan nunca mira cu nan wowo i tende cu nan orea i capta e sentido di dje cu nan curason i bolbe, i [Dios] cura nan.”—Mateo 13:15.

Con hamas por yeda di tin berdadero siguridad riba tera meimei di esnan cu ta nenga di biba na armonia cu e camindanan hustu di Dios? No por tin. Hende sin Dios ta menasá e siguridad di esnan cu kier sirbi Jehova.

Dios no ta forsa hende pa cambia, pero tampoco lo e tolerá maldad pa tempu indefiní. Aunke Jehova cu pacenshi ta sigui manda su Testigonan pa siña hende tocante su caminda i propósitonan, lo e no sigui haci esei pa hopi tempu mas. Jesucristo a profetisá: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—Mateo 24:14.

Kico “e fin” lo nificá pa esnan cu ta rechasá e normanan di Dios? Esei lo nificá nan huicio adverso i destruccion. Bijbel ta papia tocante trecementu di “vengansa riba esnan cu no conocé Dios i esnan cu no ta obedecé e bon nobo tocante nos Señor Jesus. Esakinan mes lo sufri e castigu hudicial di destruccion eterno.”—2 Tesalonicensenan 1:6-9.

Por Fin —Berdadero Siguridad pa Semper!

Despues dje destruccion di esnan cu ta rechasá Jehova su camindanan di pas, e Reino di Dios lo introducí un era glorioso di siguridad p’e beneficio dje hustunan riba tera. (Salmo 37:10, 11) Ki un contraste e mundu nobo ei lo forma cu esun den cua nos ta biba awe!—2 Pedro 3:13.

Hamber lo no existí mas. Tur hende lo tin cuminda na abundancia. Bijbel ta bisa cu ‘tur e pueblonan lo disfrutá di un bankete di plato cu hopi zeta.’ (Isaías 25:6) Lo no tin scarcedad di cuminda, pasobra “lo yega di tin un abundancia di grano riba e tera; riba e top dje cerunan lo tin un sobreabundancia.”—Salmo 72:16.

Hende lo no biba mas den krot i barionan marginá. Bou dje Reino di Dios, tur hende lo tin un cas excelente, i nan lo come cuminda producí riba nan propio tereno. Bijbel ta primintí: “Nan siguramente lo construí casnan i ocupá nan; i nan siguramente lo planta hofi di wijndruif i come nan fruta.”—Isaías 65:21.

En bes di desempleo extenso, lo tin trabou productivo, i hende lo mira bon resultado for di dje. E Palabra di Dios ta bisa: “E obra di nan mes mannan mi scogínan lo usa na un grado cabal. Nan lo no traha duru por nada.”—Isaías 65:22, 23.

Bou di gobernacion di Reino, hende lo no sufri i muri di malesa. E Palabra di Dios ta sigurá nos: “Ningun residente lo bisa: ‘Mi ta malu.’”—Isaías 33:24.

Den e Paradijs terenal cu pronto lo bira un realidad, dolor i sufrimentu, tristesa i morto, lo ser eliminá. Sí, asta morto! Hende lo biba pa semper den Paradijs! Bijbel ta bisa nos cu Dios “lo seca tur lágrima di nan wowo, i morto lo no t’ei mas, tampoco lo tin mas lamento ni sclamacion ni dolor.”—Revelacion 21:4.

Bou dje gobernacion di Jesucristo, e “Prins di Pas,” bida riba tera por fin lo ta berdaderamente sigur. En berdad, siguridad mundial lo existí bou dje mando hustu i amoroso di un solo gobiernu—e Reino di Dios.—Isaías 9:6, 7; Revelacion 7:9, 17.

[Komentario na página 4]

“Siguridad humano ta indicá fe den mañan, . . . [fe den e] stabilidad dje situacion político i económico.”—Un muher cu ta biba na Asia

[Komentario na página 5]

“Loke ta hací bo sinti mas insigur cu tur otro cos ta violencia i delincuencia.”—Un homber cu ta biba na Sur América

[Komentario na página 6]

“Mi no a sintí mi sigur durante e . . . invasion. Si un pais ta den guera, con e pueblo hamas por sinti su mes sigur?”—Un alumno di scol primario na Medio Oriente

[Komentario na página 7]

“Lo mi sintí mi sigur ora mi sa cu mi por cana riba caya anochi sin ser violá.”—Un hobencita escolar na Africa