Rechaza Fantasia Mundano, Sigi Tras di Realidad di Reino

“Sigi, pues, buscando promé e reino i su husticia, i tur e otro cosnan ei lo ser agregá na boso.”—MATEO 6:33.

1. Cua advertencia e Palabra di Dios ta duna tocante e curazón simbólico, i cua ta un manera principal cu e ta gáñanos?

“MAS cu tur lo demás cu mester ta protehá, proteha bo curazón, pasobra e fuente di bida ta sali for di dje.” (Proverbio 4:23) Pakico tabata necesario pe sabí rey Salomón duna tal advertencia? Pasobra “e curazón ta mas traicionero cu cualkier otro cos i ta desesperá.” (Jeremías 17:9) Un manera principal via locual nos curazón simbólico por gáñanos ta door di hácinos entrega na fantasía mundano. Pero, kico ta fantasía? Nan ta imaginacion no realista, soñamento lantá, dwalmento bano di mente. Ora tal soñamento lantá ta bira fantasía mundano, nan no ta solamente un malgasto di tempo sino també nan ta mashá perhudicial. P’sei, nos mester rechazánan completamente. Realmente, si nos ta odia maldad mescos cu Jesús a odié, nos lo proteha nos curazón contra entréga na fantasía mundano.—Hebreo 1:8, 9.

2. Kico ta fantasía mundano, i pakico nos mester rechazánan?

² Pero, kico ta fantasía mundano? Nan ta fantasía característica dje mundo bao di poder di Satanás. Apóstol Juan a skirbi tocante dje: “Tur loke tin den mundo—deseo di carni i deseo di wowo i exhibicion grandioso di bo medio di biba—no ta origina cu e Tata, sino ta origina cu mundo.” (1 Juan 2:16; 5:19) Pakico hende cristian mester rechaza fantasía mundano? Pasobra tal fantasía ta instiga deseo egoísta den e mente i curazón. Ilusion tocante hacimento di loke ta malu en realidad por ta un repasamento den bo mente di loke bo realmente lo haci. Disípel Santiago a advertínos: “Cada un ta ser probá ora nan ta ser provocá i tentá pa nan mes deseo. Anto e deseo, despues di a concibí, ta duna luz na picá; i picá, en buelta, ora e ta ser realizá, ta produci morto.”—Santiago 1:14, 15.

Ehempel Spiertador

3. E caso di ken ta pone ehempel spiertador principal dje peliger di fantasía egoísta?

³ Láganos examina ehempel cu ta mustra pakico fantasía mundano mester ta rechazá. E caso di Satanás e Diabel ta percura ehempel principal dje daño cu por resulta di entréga na fantasía egoísta. El a permiti sintimento di importancia propio desaroya den su curazón te ne grado cu el a envidiá e puesto único di Jehova Dios como Soberano Universal i el a deseá adoracion. (Lucas 4:5-8) Esei tabata un fantasía irrealista? Sigur cu sí! Esei lo ser probá fuera di duda ora Satanás ta ser mará pa mil aña i specialmente ora e ta ser tirá den e “tanki di candela,” e segundo morto.—Revelacion 20:1-3, 10.

4. Con Satanás a gaña Eva?

⁴ Nos tin un otro ehempel spiertador den e caso dje promé muher, Eva. Den esfuerzo di Satanás di cumpli cu su ambicion, el a seduci Eva, presentando na su mente e fantasía di cu si e come dje fruta prohibí, lo e no muri sino lo ser manera Dios, conociendo bon i malu. Tal fantasía tabata irrealista i egoísta? Sigur cu sí, segun cu nos por mira den e condenacion cu Jehova Dios a duna Eva i su esposo, Adam, ora el a húzganan. Como resultado, nan a perde e derecho di biba den Paradijs, pa nan mes i pa tur nan desendientenan imperfecto.—Génesis 3:1-19; Romano 5:12.

5. Kico a efectua e caimento di cierto yiu angelical di Dios, i cu cua resultado pa nan?

⁵ Nos també tin ehempel spiertador di cierto yiu angelical di Dios. (Génesis 6:1-4) En bez di keda satisfecho cu bendicion cu nan a recibi den e presencia celestial di Jehova, nan a soña tocante hende muher riba tera i di cu lo ta ki placentero pa tene relacion sexual cu nan. Door cu nan a sigi tras di tal fantasía, angel desobediente ta cerá awor den e scuridad spiritual di Tártaro, sperando nan exterminacion ne fin dje mil aña dje Reino di Jesucristo.—2 Pedro 2:4; Hudas 6; Revelacion 20:10.

Rechaza Fantasía Mundano

6, 7. Pakico fantasía mundano tocante riqueza material ta peligroso i engañoso?

⁶ Láganos considera awor un fantasía di mas común i mas peligroso cu Satanás ta promove. Mediante tur forma di comunicacion, nos ta ser tentá pa entregá na fantasía mundano. Hopi bez eseinan ta ser causá pa deseo fuerte pa riqueza. Di su mes, posesion di riqueza no ta malu. Abraham piadoso, Job, i rey David tabata mashá ricu, pero nan no tabatin un deseo fuerte pa riqueza material. Fantasía materialista ta motiva hende pa traha cu penoso afán pa añanan pa montona riqueza. Tal fantasía també ta conmovenan pa entrega na tur sorto di wega di placa, tal como pusta placa den carreda di cabai i cumpra biyechi di lotería. Láganos no cultiva ningun ilusion tocante riqueza. Si nos ta kere cu riqueza material por percura siguridad, considera e proverbio realista aki: “Cosnan balioso lo no ser di ningun beneficio riba e dia di furia, pero husticia mes por librábo di morto.” (Proverbio 11:4) En berdad, riqueza material lo no ta di ningun probecho pa sobrebiba e “tribulacion grandi.”—Mateo 24:21; Revelacion 7:9, 14.

⁷ Riqueza material por gáñanos fácilmente. P’sei nos ta wordu bisá: “Cosnan balioso di hende ricu ta nan pueblo fuerte, i nan ta manera un muraya protector den nan imaginacion.” (Proverbio 18:11) Sí, solamente “den nan imaginacion,” pasobra riqueza material ta ofrece mashá poco proteccion den e tempo di inflacion incontrolable, colapso económico, revolucion político, of enfermedad fatal. Jesucristo a duna advertencia contra e bobedad di pone nos confianza den riqueza material. (Lucas 12:13-21) Nos també tin e palabra spiertador di apóstol Pablo: “Amor pa placa ta un raíz di tur sorto di cos perhudicial, i percurando pa realiza tal amor algun a ser hibá gedwal for dje fe i a hinca nan curpa na tur banda cu hopi dolor.”—1 Timoteo 6:10.

8. Ki prevalente ta fantasía mundano di carácter sexual, i nan ta presenta cua peliger?

⁸ Otro fantasía ta relacioná cu relacion sexual inmoral. Cuanto cu e naturaleza humano pecaminoso ta gusta pensa riba fantasía sexual por ta mirá den e popularidad di sushidad verbal disponibel door di yama un cierto númber di telefón i scucha mensahe pornográfico. Na América, “dial-a-porn,” yama un númber na telefón, ta un negoshi di multi-mil-miyón di dólar. Si nos ta laga nos mente pensa riba relacion sexual inmoral, nos lo no ser hipócrita, solamente parciendo di ser cristian limpi? I no tin e peliger di cu tal fantasía por resulta den relacion inmoral? Esei a sosode i a resulta den expulsion di algun hende for dje congregacion cristian pasobra nan a comete fornicacion of adulterio. Den bista dje palabra di Jesús den Mateo 5:27, 28, tur hende cu ta sigi entrega na tal fantasía no ta culpable di a comete adulterio den nan curazón?

9. E Scritura ta contene cua conseho excelente pa advertínos contra fantasía mundano?

⁹ Pa contrarestá e tendencia di nos curazón pecaminoso di entrega na tal fantasía, nos tin cu tene presente e advertencia di Pablo: “No tin un creacion cu no ta manifesta na [Dios] su bista, sino tur cos ta desnudo i abiertamente bisto na wowo di esun cu ken nos tin cu rindi cuenta.” (Hebreo 4:13) Na tur tempo nos mester deseá di ser manera Moisés, cu “a sigi firme como si el a mira Esun cu ta invisibel.” (Hebreo 11:27) Sí, nos tin cu sigi bísanos mes cu fantasía mundano no ta agrada Jehova Dios i por solamente resulta den daño pa nos mes. Nos mester ta interesá den e cultivacion di tur fruta di spiritu di Dios, specialmente dominio propio, pasobra nos no por scapa for dje echo di cu si nos ta sembra pe carni, nos lo cosechá corrupcion for dje carni.—Galatio 5:22, 23; 6:7, 8.

Realidad dje Reino

10, 11. (a) Cua echo ta boga pe realidad dje Creador? (b) Ki prueba tin di cu e Bijbel en realidad ta e Palabra di Dios? (c) Cua evidencia tin dje realidad dje Rey dje Reino di Dios?

¹⁰ E mihor manera pa rechaza fantasía mundano ta di continuá sigiendo tras di realidad dje Reino. Realidad dje Reino cu Dios ta produci ta para na contraste directo cu fantasía mundano. Dios ta un realidad? No cabe duda tocante su existencia. E creacion visibel ta duna testimonio di tal echo. (Romano 1:20) Esei ta hácinos corda loke tabata bisá mas cu cien aña pasá den e buki na inglés Plan divino dje siglonan, cu e Sociedad Watch Tower a publica. El a bisa: “Ken cu por wak den cielo cu telescop, of asta cu nan wowo natural so, i mira ei e inmensidad dje creacion, su balanza, boniteza, ordu, armonía i diversidad, i toch duda cu e Creador di dje ta inmensamente mas superior tanto den su sabiduría como den su poder, of cu por sopone pa un momento cu tanto ordu a yega di existi pa casualidad, sin un Creador, a perde of a ignora asina leu nan facultad di razonamento di manera cu nan ta ser considerá loke e Bijbel ta yama correctamente, un bobo (hende cu ta sin tino).”—Salmo 14:1.

¹¹ Nos ta siña tur cos tocante e Reino den e Bijbel Santo. E Bijbel realmente ta e Palabra skirbí di Dios? Sigur cu sí, manera nos por mira den su armonía, su exactitud científico, i e poder cu e tin pa cambia e bida di hende i specialmente pa medio di cumplimento di profecía di dje.a Kico di Jesucristo, e Rey dje Reino di Dios? E realmente a existi? Relato dje Evangelio i carta di inspiracion divino dje Scritura Griego Cristian ta duna testimonio inequibocada i elocuentemente dje historicidad di Jesucristo. En cuanto e historicidad di Jesús, tin també e testimonio dje Talmud hudío, cu ta mencioné como un persona. Historiador hudío i romano dje promé siglo EC ta haci mescos.

12, 13. Cua echo ta duna testimonio dje realidad dje Reino di Dios?

¹² Kico dje realidad dje Reino mes? Cristiandad en general ta ignoré segun e keho di un protestante prominente: “Siguramente ta haci mas cu trinta aña cu mi a tende un predicador haci esfuerzo pa splica na su pueblo e realidad dje Reino pa nan.” Sin embargo, e santificacion dje nomber di Jehova Dios pa medio dje Reino ta e tema di su Palabra. Dios mes a haci e promé ­promesa dje Reino, bisando: “Lo mi pone enemistad entre bo i e muher i entre bo simía i su simía. Lo e machica bo cabez i lo bo machica su hilchi.” (Génesis 3:15) E nacion di Israel a simboliza e Reino, specialmente durante e reino di rey Salomón. (Salmo 72) Además, e Reino tabata e tema dje predicacion di Jesús. (Mateo 4:17) El a enfatizé den hopi comparacion di dje, tal como esnan den Mateo capítulo 13. Jesús a bísanos pidi binimento dje Reino den oracion i sigi buské promé. (Mateo 6:9, 10, 33) Realmente, e Reino di Dios ta ser mencioná casi 150 bez den e Scritura Griego Cristian.

¹³ E Reino ta un berdadero gobierno, cu poder i autoridad, i lo e cumpli cu tur expectacion correcto. E tin un lista di ley, hayá den e Bijbel. E Reino a trece hopi cos na realidad caba. E tin ciudadano leal—mas cu 4.000.000 Testigo di Jehova. Den 211 país nan ta predica e bon nobo dje Reino di Dios, na cumplimento di Mateo 24:14. Durante nan aña di sirbishi di 1991, nan a dedica 951.870.021 ora predicando e mensahe di Reino. Tal actividad ta produci resultado visibel i permanente mientras cu un multitud di hende ta siña e “idioma puro” di berdad bíblico.—Sofonías 3:9.

Sigiendo Tras di Realidad dje Reino

14. Con nos por fortalece nos aprecio pe realidad dje Reino?

¹⁴ Di ki manera, anto, nos por sigi tras di realidad dje Reino? Nos speranza mester ta firmemente fundá ariba un conviccion fuerte. E mundo nobo cu Dios a primintí mester ta real pa nos. (2 Pedro 3:13) I nos mester tene fe den e promesa di cu Dios “lo seca tur lágrima di [nos] wowo, i lo no existi morto mas, ni lamentacion ni sclamacion ni dolor lo no existi mas.” (Revelacion 21:4) Con nos por keda sigur cu esei no ta un fantasía? E mester ser realizá ne debido tempo di Dios, pasobra ta imposibel pa Dios gaña. (Tito 1:1, 2; Hebreo 6:18) Nos tin cu medita riba tal promesa. Imaginando nos mes den e mundo nobo di Dios i disfrutando di bendicion di dje no ta un fantasía irrealista sino ta duna evidencia di fe. Segun e nificacion di Pablo, “fe ta anticipacion sigurá di loke ta ser sperá, e demonstracion evidente di realidad cu no ta ser mirá.” (Hebreo 11:1) Laganos fortalece nos fe, alimentando nos mes cu regularidad cu e Palabra di Dios i publicacion cristian cu por yúdanos comprendele i apliké. I mientras mas tempo nos ta dedica bisando otro hende tocante e Reino, formal i informalmente, mas nos ta fortalece nos fe i ta haci nos speranza den dje mas briyante.

15. Nos tin cua obligacion respecto e ministerio cristian?

¹⁵ Nos també tin cu traha na armonía cu realidad dje Reino, mehorando e calidad di nos ministerio. Siendo cu tin hopi cos pa haci ainda, con nos por haci esei? (Mateo 9:37, 38) Berdadero ta e expresion, hende nunca ta mucho bieu pa siña. No ta importa cuanto aña nos a participa den e trabao di duna testimonio, nos por mehora. Door di bira mas efectivo manehando e Palabra di Dios, nos ta mas capaz pa yuda otro hende tende e boz dje Rey, Jesucristo. (Compara cu Juan 10:16.) Ora nos ta tuma na cuenta cu esei ta toca e destino eterno di hende, nos mester deseá di cubri nos territorio cabalmente afin di dúnanan oportunidad bez tras bez pa demonstra unda nan ta para, sea como “carné” of como “cabrito.” (Mateo 25:31-46) Naturalmente, esei kier men tene registro cuidadoso di hende cu no ta na cas i specialmente di hende interesá den e mensahe di Reino.

Continuá Sigimento Tras dje Reino

16. Ken a pone ehempel excelente sigiendo tras di realidad dje Reino, i di ki manera nan ta “haya gara” dje Reino?

¹⁶ Esfuerzo sincero ta necesario pa continuá sigiendo tras di realidad dje Reino. Ehempel celoso dje resto di cristian ungí no ta animános? Nan tabata sigi tras di realidad dje Reino pa hopi aña. E palabra di Jesús ta duna e nificacion di tal sigimento: “Di dia di Juan bautista te awor e reino di cielo ta e meta cu hende ta forza pa alcanza, i esnan cu ta haci esfuerzo ta haya gara di dje.” (Mateo 11:12) E idea den esei no ta cu enemigo ta coge e Reino. Mas bien, esei ta toca e actividad di hende den fila pe Reino. Un escolástico bíblico a bisa: “Asina e ta duna detaye dje esfuerzo i lucha ansioso i irresistible tras dje binidero reino mesiánico.” Esnan ungí ta haci tur esfuerzo posibel pa obtene e Reino pa nan mes. Esfuerzo vigoroso similar ta un necesidad pe “otro carnénan” pa nan cumpli cu requisito di ciudadano terrenal dje Reino celestial di Dios.—Juan 10:16.

17. Hende cu ta sigi tras di fantasía mundano lo haya cua recompensa?

¹⁷ Berdaderamente, nos ta biba den un tempo di oportunidad special. Hende cu ta sigi tras di fantasía mundano lo lanta un dia ne realidad penoso. E sigiente palabra ta wel pinta nan suerte: “I mester sosode cu ora un hende hambrá ta soña i atá e ta come, i e realmente ta lanta i su alma ta bashí; i mescos cu un hende cu sed ta soña i atá e ta bebe, i e realmente ta lanta i atá e ta cansá i su alma ta completamente secu.” (Isaías 29:8) Por cierto, fantasía di mundo nunca por haci hende keda satisfecho i feliz.

18. Den bista di realidad dje Reino, nos mester sigi cua camina, i cu cua prospecto na bista?

¹⁸ E Reino di Jehova Dios ta un realidad. E ta reina activamente, mientras cu e mal sistema di cosnan aki ta enfrenta destruccion pronto i permanente. P’sei, láganos tuma na pecho e conseho di Pablo: “Láganos no drumi manera e otronan, sino láganos keda lantá i mantene nos huicio.” (1 Tesalonicense 5:6) Láganos mantene nos curazón i mente enfocá riba realidad dje Reino i asina disfruta di bendicion eterno. I láganos recompensa ser di tende e Rey dje Reino bísanos: “Bin, boso cu ta bendicioná di mi Tata, hereda e reino prepará pa boso for di fundamento di mundo.”—Mateo 25:34.

[Nota]

Con Bo ta Contestá?

◻ Kico ta fantasía mundano, i pakico nos mester rechazánan?

◻ Cua ehempel ta mustra e bobedad di entrega na fantasía mundano?

◻ Cua echo ta duna prueba dje realidad dje Creador, di su Palabra skirbí, di Jesucristo, i dje Reino?

◻ Con nos por fortalece nos fe den e realidad dje Reino?

[Plachi na página 15]

Hopi bez fantasía mundano ta e resultado di deseo fuerte pa riqueza material

[Plachi na página 16]

E predicacion dje bon nobo ta un manera pa sigi tras di realidad dje Reino

[Plachi na página 17]

Bo ta sigi tras di realidad dje Reino, studiando diligentemente e Palabra di Dios?