E Cosecha di Cristiandad den Africa

E SOÑO di Charles Lavigerie di conberti Algeria na un “nacion cristian” a resulta di ser net esei—un soño. Awe, 99 porciento di poblacion di Algeria ta mohamedano, i cristiandad a perde terreno den parti grandi di Nortafrica. Pero, kico di otro parti di Africa?

Segun Dr. J. H. Kane den su buki na inglés Un historia concisa di Mision Cristian Mundial, cristiandad a conberti mas hende den Africa pretu cu den tur otro país dje Tercer Mundo hunto.” Pero, hende conbertí asina ta realmente cristian? Dr. Kane a admiti: “Un peliger grandi den e iglesia africano ta paganismo cristianizá.” Además, e nomber “iglesia africano” ta incorrecto. Literalmente, tin miles di iglesia africano, cada un cu su mes manera di adora. Pakico?

Sembrando Simía di Desunion

Simía di desunion tabata sembrá asta promé cu misionero a barca cu rumbo Africa. E Sociedad Misionera di Londres a scoge miembro di diferente religion, i pleitu cayente riba doctrina a sosode entre misionero riba camina pa nan asignacion. E conflicto mester a empeora despues cu nan a establecénan den nan mision.

Profesor Robert Rotberg a skirbi den su buki na inglés Misionero cristian i e creacion di Nortrodesia na 1880-1924, “Misionero a bringa severamente cu otro i cu nan director den stranhería, generalmente perhudicando nan meta evangélico. . . . Ta parce cu misionero a dedica tanto tempo i energía skirbiendo tocante nan pleitamento como nan a dedica na nan esfuerzo pa conberti hende.”

Aveces, pleitamento di misionero a resulta den e formacion di mision rival. Mision católico i protestante a competi ferozmente pa conberti hende. E mesun falta di unidad tabatin cu ser reflehá den hende conbertí. Cu tempo miyones di hende africano a bandona religion misional i a forma nan mes religion.

Dr. Kane, misionero i historiador, a skirbi, “Religion africano independiente ta ser hayá den tur parti di Africa . . . Na total tin mas cu siete mil grupo separá den e movimento.” Competencia entre misionero cu creencia contrario no tabata e único causa di esei. Den su buki na inglés, E misioneronan, Geoffrey Moorhouse a splica cu un otro motibo dje “reforma negra” tabata “rabia contra superioridad di hende blancu.”

Hende Cristian of Racista Europeo?

Dr. Kane a admiti: “Misionero tabatin un compleho di superioridad.” Nan “a kere cu e religion cristian i cultura europeo i liderazgo europeo tabata inseparable,” segun Adrian Hastings den su buki na inglés Cristianismo africano.

E francés Charles Lavigerie tabata un lider misionero cu tabatin tal punto di bista. Un otro tabata John Philip, superintendente di mision dje Sociedad Misionera di Londres den e zuid di Africa. El a broma na 1828, “Nos misionero ta . . . extende interés británico, influencia británico, i e imperio británico. Unda cu misionero ta planta su estandarte den un tribu salbahe, nan prehuicio contra e gobierno colonial ta desparce; e creacion di necesidad artificial ta ­aumenta nan dependencia riba e colonia; . . . industria, comercio, i agricultura ta desaroya rápidamente; i tur hende den nan cu ta berdaderamente conbertí . . . ta bira un aliado i amigo dje gobierno colonial.”

Ta straño cu gobierno europeo a mira tal misionero como instrumento útil pa expansion colonial? Di nan parti, misionero a acepta cu gusto e colonizacion di Africa. Manera nan a bisa ne Conferencia Mundial di Misionero celebrá den Edinburgo na 1910: “Ta . . . imposibel pa separa e doel di misionero for di doel dje gobierno cada bez.”

A Reina Como Rey den Africa

Pa establece nan autoridad, algun misionero a depende di forza militar colonial. Tabatin bez cu cañón di barcu di gera británico a destrui pueblo na costa pasobra habitante a nenga di acepta autoridad di misionero. Na 1898, Dennis Kemp, un misionero metodista pa Westáfrica, a expresa su “conviccion firme cu Dios actualmente ta usa ehército i forza naval británico pa cumpli cu Su propósito.”

Despues di a establecénan, tabatin bez cu misionero a kita e poder seglar di cacique dje tribu. Profesor Rotberg a skirbi: “Frecuentemente misionero di Londres a usa forza pa mantene nan ley teocrático. Un instrumento favorito cu nan a usa pa expresa nan desaprobacion tabata e cikoti, un carbachi largu trahá di cuero curtí di hipopótamo. Pa casi cualkier motibo nan a zuta africano libremente cuné.” Segun David Lamb den su buki na inglés Africanonan, “Un africano conbertí ta corda un misionero anglicano den Uganda yamá Bwana Botri cu frecuentemente a baha for di preekstoel durante e ceremonia pa zuta cu garoti africano cu a yega laat.”

James Mackay, un misionero, indigná pa tal accion, a presenta un keho na director dje Sociedad Misionera di Londres. El a duna e spiertamento: “En bez di aceptános como hende blancu cu ta hiba e bon nobo dje amor di Dios pa nan, nan sa [loke nos tá] i ta tene miedu di nos.”

E Dos Gera Mundial

E buki na inglés E misioneronan ta bisa cu “Pa siglonan [africano] a wordu bisá fuertemente i cu persistencia cu gera i tur instinto salbahe cu nan ta expresá ta tanto perverso como infructífero.” Anto, na 1914, Gera Mundial I a cuminza den Europa entre nacion yamá cristian.

“Misionero di casi tur nacionalidad tabata hibá den e Gera Grandi,” Moorhouse a splica. Pa nan mes bergüenza, misionero a urgi africano conbertí pa tuma parti den e conflicto. Algun misionero asta a guia soldad africano den e bataya. Profesor ­Stephen Neill den su buki na inglés Historia di mision cristian a duna bon splicacion di efecto dje gera: “Nacion europeo, cu a broma di nan monopolio di cristianismo i civilizacion, tanto ciegamente como den confusion a corre drenta den un gera civil cu a láganan económicamente pober i sin ningun tiki birtud.” Neill a sigi: “E Segundo Gera Mundial solamente a confirma loke e promé a mustra caba. Pretension moral europeo a resulta di ser un falsedad; ‘cristiandad’ a keda desenmascará como nada mas cu un decepcion. No tabata posibel mas pa papia tocante ‘Europa cristian.’”

Ta di comprende cu e reforma pretu a acelera despues di Gera Mundial I. Pero, kico di africano cu a sigi tras di religion di cristiandad? Nan a wordu siñá despues e berdad dje Bijbel?

Creencia Africano di Antepasado

Misionero di cristiandad a condena costumber religioso africano, tal como consulto cu divinador pa complace nan antepasado morto. Ne mesun tempo, misionero a insisti cu tur hende tin alma cu no ta muri nunca. Nan també a promove veneracion di María i dje “santonan.” Tal siñanza a confirma e creencia africano di cu nan antepasado morto ta na bida. Además, cu e veneracion di imagen religioso, tal como e cruz, misionero a hustifica uso africano di un contra como un proteccion for di mal spi­ritu.

Profesor C. G. Baëta a splica den su buki na inglés Cristianismo den Africa tropical: “Ta posibel pa un africano canta cu gusto den misa, ‘No tin otro refugio [fuera di Dios],’ mientras cu e tin un contra riba su curpa, of e por sali for di misa i acudi directamente na un divinador, sin kere cu e ta traiciona ningun principio.”—Compara cu Deuteronomio 18:10-12 i 1 Juan 5:21.

Hopi misionero a bisa africano cu nan antepasado pagano tabata tormentá den e candela di fiernu i cu mescos lo sosodénan si nan nenga di acepta siñanza di misionero. Pero e doctrina di tormento eterno ta na conflicto cu declaracion claro di net e Bijbel cu misionero a haci tanto esfuerzo pa traduci na idioma africano.—Génesis 3:19; Jeremías 19:5; Romano 6:23.

Realmente, e Bijbel ta bisa cu alma di hende pecador ta muri i cu “hende morto . . . no sa nada mes.” (Eclesiastés 9:5, 10; Ezekiel 18:4) Pero, africano cu no tabatin oportunidad di tende e berdad di Bijbel, tin e prospecto di ser inclui den e binidero “resureccion tanto di hende husto como dje inhustonan.” (Echo 24:15) Tal hende resusitá lo ser siñá tocante e percuracion di Dios pa salbacion. Anto, si nan ta reacciona cu aprecio ne amor di Dios, nan lo ser recompensá cu bida eterna den Paradijs riba tera.—Salmo 37:29; Lucas 23:43; Juan 3:16.

En bez di siña tal berdad bíblico maraviyoso, cristiandad a gaña africano cu nan siñanza falso i hipocresía religioso. Siguramente, e papel cu misionero di cristiandad a hunga den e colonizacion di Africa no tin ningun apoyo den e Bijbel. Al contrario, Jesús a bisa cu su Reino “no ta parti di mundo” i cu berdadero sigidor di dje tampoco “no ta parti di mundo.” (Juan 15:19; 18:36) Cristian di promé tabata embahador di Jesucristo, no di gobierno di mundo.—2 Corintio 5:20.

P’sei, e cosecha di cristiandad den Africa, en conhunto, ta un cosecha di infelicidad, caracterizá pa un alarmante falta di unidad, desconfianza, i “paganismo cristianizá.” E violencia cu ta caracterizá hopi parti “cristian” di Africa siguramente no ta na armonía cu e siñanza dje “Prinz di Paz.” (Isaías 9:6) E fruta dje trabao di cristiandad den Africa ta permanece na contraste directo cu e palabra di Jesús tocante berdadero sigidor di dje. Jesús a haci oracion na su Tata celestial pa sigidor di dje ser “perfeccioná den uno, pe mundo tin e conocimento di cu bo a mandámi.”—Juan 17:20, 23; 1 Corintio 1:10.

Esei kier men cu tur trabao di misionero den Africa ta un fracaso? Di ningun manera. E fruta excelente di trabao di berdadero misionero cristian den Africa i den tur e mundo lo ser considerá den artículo cuminzando na bladji 10.

[Plachi na página 6]

Lider misionero di siglo 19, tal como John Philip, a kere cu civilizacion europeo i cristianismo tabata mescos

[Rekonosementu]

Cape Archives M450

[Plachi na página 7]

Misionero di cristiandad a apoya creencia africano den spiritu di hende morto cu nan siñanza no bíblico di cu alma ta spiritu cu no ta muri nunca

[Rekonosementu]

Pa cortesía di Africana Museum, Johannesburg