Cristiandad i e Negoshi di Esclabo
DURANTE siglo 19, misionero católico i protestante tabata uní den nan oposicion ne negoshi di esclabo. Sin embargo, esei no tabata semper nan posicion. Den siglo di antes, nan a aprobá dje negoshi di esclabo i a participa den dje apesar dje gran sufrimento cu esei a produci.
Misionero a cuminza yega tanto ne costa oriental como ne costa occidental di Africa ora na siglo 15 nan a descubri e ruta comercial di Cabo de Buena Esperanza. Sin embargo, despues di tres siglo e trabao di misionero casi a termina den Africa. Tabatin poco africano cu a conberti. Un motibo dje fracaso tabata e participacion di cristiandad den e negoshi di esclabo. C. P. Groves a splica den su buki na inglés E sembramento di cristianismo den Africa:
“E participacion activo dje negoshi di esclabo hunto cu e mision cristian no a parce malu. Realmente, mision mes tabata doño di su mes esclabonan; un conbento jesuíta den Luanda [capital di Angola] tabatin 12.000 esclabo. Ora e tráfico di esclabo a cuminza entre Angola i Brasil, e obispo di Luanda, sintá riba un stoel di piedra cant’i waf, a duna su bendicion na barcu saliendo cargá cu esclabo, i a primintínan felicidad den futuro ora e prueba penoso di bida ta termina.”
Misionero jesuíta no “a haci ningun keho contra esclabitud di hende pretu,” C. R. Boxer a confirma, segun e palabra dje buki na inglés Africa desde di antigua te na 1800. Segun Boxer, den Luanda, promé cu esclabo a barca rumbo colonia spañol i portugués, “nan tabata hibá na un misa cercano . . . i un pastor dje parokia a bautizánan na grupo di cien alabez.” Anto, despues di a spréngunan cu “awa bendita,” el a bísanan: “Mira, boso ta yiu di Dios caba; boso ta bai ne tera di hende spañol unda boso lo siña cosnan dje Fe. No corda mas di unda boso a bini . . . Bai cu bon boluntad.”
Naturalmente, misionero di cristiandad no tabata e úniconan cu a aproba dje negoshi di esclabo. Segun e splicacion di Geofrrey Moorhouse den su buki na inglés Misionero, “Te cu e último mitá di siglo 18, esei tabata solamente e actitud dje mundo en general.” Moorhouse a cita ehempel dje misionero protestante di siglo 18, Thomas Thompson, cu a skirbi e tratado inglés titulá Mustrando cu e negoshi africano di esclabo pretu ta conforme cu principio humanitario i cu ley dje religion revelá.
No obstante, e participacion di cristiandad den e negoshi di esclabo ta hacié responsabel en parti pe sufrimento terribel resultando pa miyones di esclabo africano. Segun The Encyclopædia Britannica, “Apart di esclabo cu a muri promé cu nan a sali for di Africa, 12.5% a muri riba camina pa Antillas; den Jamaica 4.5% a muri den haf of promé cu nan benta i un tercera parti di tur a muri den e ‘proceso di adaptacion’.”
Pronto Jehova Dios lo exigi cuenta tanto di cristiandad como di tur otro forma di religion falso pa tur acto terribel di dramamento di sanger cu nan a tolera i asta a bendiciona.—Revelacion 18:8, 24.
[Diagram na página 8]
(Pa teksto den su formato kompletu, wak publikashon.)
Dibuho dje stiwamento di esclabo den barcu di transporte
[Rekonosementu]
Schomburg Center for Research in Black Culture / The New York Public Library / Astor, Lenox and Tilden Foundations