Humanidad Realmente Tin Mester di un Mesías?

“MUNDO TIN MESTER DI MESÍAS, SEGUN FUNCIONARIO”

E título ei tabata den e curant The Financial Post, di Toronto, Canadá, na 1980. E palabra tabata dje funcionario Aurelio Peccei, presidente i fundador dje prestigioso grupo di intelectual yamá Club di Roma. Segun e Post, Peccei ta kere cu “un lider carismático—científico, político, of religioso—por ta e único salbacion pe mundo for di trastorno social i económico cu ta pone civilizacion den peliger di destruccion.” Kico bo ta kere? E situacion di mundo ta asina fatal cu humanidad tin mester di un Mesías? Considera un problema so cu ta enfrenta mundo—hamber.

UN PAR di wowo grandi, color bruin, ta wak bo for di portret den curant of revista. Nan ta wowo di un mucha muher cu ni sikiera a yega cinco aña di edad. Pero, tal wowo no ta dunábo motibo pa un sonrisa. Nan no ta ­briya manera wowo di mucha, ni cu e alegría di curiosidad, ni cu un confianza inocente. Al contrario, nan ta yen di dolor complicá, dolor profundo, di hamber incurabel. E mucha ta muri di hamber. Dolor i hamber ta tur loke el a experimenta den su bida.

Kizás bo ta mescos cu hopi otro hende, bo no ta gusta mira portret asina, p’sei bo ta bira e bladji lihé. No cu esei no ta importábo, pero bo ta sinti frustracion pasobra bo ta kere cu ta laat caba pa yuda e mucha. Man i pia fini i barica hinchá ta indicacion cu su curpa a cuminza canibaliza su mes. Probablemente e tabata morto caba promé cu bo a mira e portret. Pior ainda, bo sa cu su caso no ta e único cu tin.

Exactamente ki grandi ta e problema? Wel, bo por imaginábo 14 miyón mucha? E mayoría di nos no por; pasobra e cifra ta mucho grandi pa visualizá. Imaginábo, anto, un stadion cu 40.000 asiento. Awor, imaginábo cu e ta yen mes cu muchanan—fila tras fila, un tras di otro, un lamá di cara. Ta difícil asta pa imaginábo esei. Sin embargo, 350 stadion asina yen di mucha ta necesario pa yega 14.000.000. Segun UNICEF (Fondo di Naciones Unidas pa Infancia), esei ta e cantidad spantoso di mucha bao di cinco aña di edad cu ta muri tur aña den país desaroyando debí na hamber i maleza fácil pa prevení. Esei ta igual cu casi un stadion di mucha muriendo tur dia! Agrega ne cantidad ei tur adulto cu tin hamber, i mundialmente tin un total di mil miyón hende cu ta falta cuminda crónicamente.

Pakico Tanto Hamber?

Actualmente, e planeta aki ta produci mas cuminda cu hende por come i e por produci mas. Sin embargo, cada minut 26 mucha ta muri di hamber i maleza. Durante e mesun minut, mundo ta gasta rond di $2.000.000 na preparacion pa gera. Bo por imaginábo loke tur e placa ei—of por lo menos un parti di dje—por haci pe 26 mucha?

Claramente, e hamber di mundo no ta simplemente e falta di cuminda ni di placa. E problema ta mas complicá. Manera Jorge E. Hardoy, un profesor argentino, a bisa: “E mundo en general ta sufri di un incapacidad crónica di comparti comodidad, poder, tempo, recurso i conocimento cu hende cu tin mas necesidad pa tal cosnan.” Sí, e problema no ta den falta di recurso humano, sino den hende mes. Golosidad i egoísmo ta parce di ser e forza dominante den e arreglo humano. Un fijfde parti di poblacion mas ricu di mundo ta goza di aproximadamente 60 bez mas bienan i servicio cu e fijfde parti mas pober.

Ta cierto cu algun hende ta haci esfuerzo sincero pa hiba cuminda pa hende hambrá, pero e mayor parti di nan esfuerzo ta por nada debí na factor fuera di nan control. Hopi bez hamber ta afligi país cu gera civil of rebelion ta destrui, i no ta raro pa forza militar opositor stroba cuminda di yega na hende hambrá. Ambos lado tin miedu cu si nan ta permiti cuminda yega ne poblacion civil muriendo di hamber den territorio dje enemigo, nan ta alimenta nan enemigo. Gobierno mes ta probecha di hamber como un arma político.

No Tin Solucion?

Lamentablemente, e problema di miyones di hende muriendo di hamber di ningun manera ta e único problema cu ta afligi humanidad djawe. E destruccion i venenamento desenfrená dje atmósfera, e plaga persistente di gera cu ta mata miyones di hende, epidemia di crimen violento cu ta engendra miedu i desconfianza na tur parti, i e desmoralizacion aumentante cu ta parce di ser e raíz di hopi di tal enfermedad—tur crisis mundial asina ta coopera hunto, den un sentido, i ta confirma e mesun berdad penoso—hende no por goberna nan mes cu éxito.

Sin duda esei ta e motibo pakico tanto hende ta perde tur speranza di haya un solucion pa problema di mundo. Otronan ta kere mescos cu Aurelio Peccei, e escolástico italiano mencioná na principio. Segun nan, si acaso ta existi un solucion, e mester bini di un fuente extraordinario, of kizás asta di un fuente sobrehumano. Pues, e concepto di un mesías tin un atraccion fuerte. Pero, e speranza di un mesías ta realista? Of, tal speranza ta solamente un ilusion?

[Rekonosementu di plachi na página 2]

Cover photos: Top: U.S. Naval Observatory photo; Bottom: NASA photo

[Rekonosementu di plachi na página 3]

WHO foto di P. Almasy

[Rekonosementu di plachi na página 4]

WHO foto di P. Almasy

Foto di U.S. Navy