Notisia di Reino Num. 34

Pakico Bida Tin Asina Tantu Problema?

Un paradijs liber di problema ta posibel?

PROBLEMANAN SERIO TA EMPEORA—PAKICO?

Semper hende tabatin problema. Aunke hopi hende a kere cu tecnologia moderno lo por a resolvé nan, problemanan serio ta empeorando.

Crímen: Poco hende ta sinti nan sigur canando riba caya of asta sintando den nan propio cas. Den un pais europeo, casi 1 di cada 3 persona tabata víctima di un crímen den un aña recien.

Medio Ambiente: Polucion di aire, tera i awa ta mas i mas extenso. Den paisnan den desaroyo, un cuarto parti dje pueblo no tin acceso na awa limpi.

Pobresa: Tin mas hende pober i hambrá cu nunca. Mas cu 90 porciento dje pueblo den algun pais ta biba den pobresa; 30 porciento dje forsa laboral di mundu, rond di 800 miyon persona, ta desempleá of no tin un trabou cu ta duna nan suficiente entrada of permití nan haci pleno uso di nan abilidadnan—i e cantidadnan ta crece.

Hamber: Asta si abo mes tin suficiente pa come, un cantidad aumentante di miyones di hende no tin. Den paisnan subdesaroyá, cada aña por lo ménos 13 miyon hende, principalmente mucha, ta muri di e efectonan di hamber.

Guera: Cientos di miles di hende a ser matá den incidentenan recien di violencia étnico. I den siglo 20, gueranan a mata hopi mas cu cien miyon hende.

Otro Problemanan: Agregá na e problemanan mencioná ariba, kiebro di famia empeorando, mas mamanan soltero, aumento di personanan sin cas, abusu di droga na tur parti, inmoralidad desenfrená. Corectamente, un ex-miembro dje cuerpo di consehero dje presidente mericano a bisa: “Tin simplemente demasiado evidencia . . . cu civilisacion a bira putrí.” Den un periodo recien di 30 aña, e poblacion mericano a crese cu 41 porciento, pero crímen violento a escalá masha lihé te na 560 porciento, yu ilegítimo te na 400 porciento, divorcio te na 300 porciento, e tasa di suicidio di tiener te na mas cu 200 porciento. E siruacion ta similar den otro nacionnan.

Pakico Problemanan A Empeorá?

Nos Creador ta percurá e contesta. Su Palabra ta yama e tempu yen di problema aki “e último dianan,” un periodo ora “tempu crítico, duru pa trata cuné” lo ta presente. (2 Timoteo 3:1) E último dianan di kico? Wel, Bijbel ta papia di “fin di mundu.”—Mateo 24:3, Testament Nobo.

E problemanan creciente djawe ta evidencia claro cu e fin dje sistema di cosnan aki ta cerca, incluyendo e fin di maldad i di esnan responsabel p’e. (Mateo 24:3-14; 2 Timoteo 3:1-5; Revelacion 12:7-12) Pronto Dios lo intervení i percurá pa tur e problemanan djawe ser resolvé completamente.—Jeremías 25:31-33; Revelacion 19:11-21.

E RELIGIONNAN DJE MUNDU AKI A FAYA

En bes di yuda resolvé e problemanan djawe, e sistemanan religioso dje mundu aki ta agregá na nan. Durante gueranan, católico ta mata católico, protestant ta mata protestant—na cantidad di miyones. No hopi tempu pasá na Ruanda, unda mayoria hende ta católico, hende a mata otro na cantidad di cientos di miles! (Mira e plachi na man robes.)

Jesus lo a bai guera cu un scopet of machete i mata su disipelnan pa motibu cu nan nacionalidad tabata diferente for di esun di dje? Siguramente cu no! “Esun cu ta stima Dios,” Bijbel ta bisa, “mester ta stimando su ruman tambe.” (1 Juan 4:20, 21) E religionnan dje mundu aki a faya di haci esei. “Nan ta declará públicamente cu nan conocé Dios, pero nan ta nengu’é mediante nan obranan.”—Tito 1:16.

Ademas, dor cu nan no ta realmente apoyá e normanan bíblico di moralidad, e religionnan dje mundu ta contribuí n’e degradacion moral escandaloso cu tin rond e tera.

Jesus a bisa cu lo bo por distinguí religion falsu for di religion berdadero ‘na su frutanan’—na loke su miembronan ta haci. Tambe el a bisa: “Tur palu cu no ta producí fruta excelente ta ser di kap i tirá den candela.” (Mateo 7:15-20) E Palabra di Dios ta urgi nos pa hui for di religion cu ta producí mal fruta i pues ta enfrentá destruccion.—Revelacion 18:4.

Religion Berdadero No A Faya

Religion berdadero “ta producí fruta excelente,” specialmente amor. (Mateo 7:17; Juan 13:34, 35) Cua hermandad internacional uní di cristiannan ta practicá tal amor? Kendenan ta nenga di mata hende di nan mes religion of cualkier otro hende?—1 Juan 3:10-12.

Testigonan di Jehova tin e reputacion di producí e “fruta excelente” ei. Na tur parti dje tera, den mas cu 230 pais, ‘nan a bati nan spada na chapi.’ (Isaías 2:4) Nan amor pa hende ta ser demostrá tambe mediante nan obedencia n’e mandamentu di Cristo di predicá e “bon nobo” dje Reino di Dios rond mundu. (Mateo 24:14) Tambe nan ta practicá i ta boga p’e leynan moral haltu cu ta ser siñá den Bijbel.—1 Corintionan 6:9-11.

Religion berdadero no a faya. E ta dirigí hende n’e único Persona capas pa resolvé e problemanan di humanidad. Pronto e Persona ei lo producí un mundu henteramente nobo. Ken e Persona ei ta? (Por fabor mira e último página.)

UN PARADIJS LIBER DI PROBLEMA TA UN REALIDAD

Si bo tabata por, lo bo no a resolvé tur e problemanan cu ta afligí humanidad? Naturalmente cu sí! Nos mester pensa cu nos Creador amoroso, kende ta e único cu tin e poder i sabiduria pa resolvé problemanan di humanidad, lo haci ménos cu esei?

Bijbel ta revelá cu Dios lo intervení den asuntunan humano pa medio di su gobiernu celestial den man di Jesucristo. Lo e “machicá” gobiernunan corupto riba tera. (Daniel 2:44; Mateo 6:9, 10) I pakico? Dirigiendo su mes na Dios, e salmista ta contestá: “Pa hende por sa cu abo, kende su nomber ta Jehova, abo so ta e Haltísimo riba tur e tera.”—Salmo 83:18.

Ora e mundu aki caba, lo tin sobrebibiente? “E mundu ta pasando forbij,” Bijbel ta bisa, “pero esun cu ta hasi e boluntad di Dios lo permanecé pa semper.” (1 Juan 2:17) Unda e sobrebibientenan aki lo biba pa semper? “E hustunan mes lo poseé e tera, i nan lo biba pa semper riba dje,” Bijbel ta contestá.—Salmo 37:9-11, 29; Proverbionan 2:21, 22.

Den Dios su mundu nobo, “morto lo no existí mas, tampoco lo tin mas lamento ni sclamacion ni dolor.” (Revelacion 21:4) Ningun crímen, probesa, hamber, enfermedad, tristesa of morto mas! Sí, asta e mortonan lo biba atrobe! “Lo bai tin un resureccion.” (Echonan 24:15) I e tera mes lo ser trasformá den un paradijs literal.—Isaías 35:1, 2; Lucas 23:43.

Kico nos mester haci pa disfrutá di bida den Dios su mundu nobo? Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun kende bo a manda, Jesucristo.” (Juan 17:3) Miyones di hende di curason onrado rond mundu ta ganando e conocimentu ei. Esaki ta permití nan enfrentá cu éxito hopi di nan problemanan personal awor, pero mas importante, e ta duna nan pleno confiansa cu problemanan fuera di nan abilidad pa resolvé lo ser remediá completamente den Dios su mundu nobo.

[Rekonosementu pa Potrèt na página 2]

Foto di WHO dor di P. Almasy

[Rekonosementu pa Potrèt na página 3]

Jerden Bouman/Sipa Press