Kico Bo ta Opina di Picá?
UN SEÑORA cu tabata studia e Bijbel cu un testigo di Jehova a puntra den forma di keho: “Pakico e ta sigi pidi pordón di nos picánan, como si fuera nos ta criminal?” Hopi hende djawe, mescos cu e señora, no ta conciente di nan picánan ya cu nan no a comete un crimen.
Esei ta specialmente cierto den país oriental unda, debí na nan tradicion, hende no tin concepto di picá heredá siñá den religion hudío-cristian. (Génesis 3:1-5, 16-19; Romano 5:12) Por ehempel, pa hende di religion sintoísta, picá ta un impureza cu pastor por kita fácilmente cu wayamento di su bara, cu tin un pida di papel of linen na su punta. Den tal proceso, no ta necesario pa arrepenti di loke bo a haci. Pakico? Segun e Kodansha Encyclopedia of Japan, “Nan no solamente a considera malecho sino també calamidad natural fuera di control como tsumi [picá].” Nan a considera cu desaster natural, tsumi, cu no ta e responsabilidad di hende, tabata picá cu ceremonia di purificacion por a elimina.
Esei a haci hende kere cu ceremonia di purificacion por elimina cualkier picá, asta malecho cu hende a comete exprés (fuera di echo criminal cu ley a castiga). E curant The New York Times, bao di título “Ceremonia di purificacion político den Hapón,” a menciona tal mentalidad i a splica cu político haponés cu tabata inbolucrá den scandal a considera nan mes “purificá” ora nan tabata eligí di nobo. Pues, nada realmente tabata corrigí, nan por a bolbe comete scandal igual.
Budista cu ta kere den samsara, of renacimento, i e doctrina di karma tin un punto di bista diferente. The New Encyclopœdia Britannica ta splica lo sigiente: “Segun e doctrina di karman, bon conducta ta produci resultado agradabel i feliz i un tendencia di produci bon echo di naturaleza similar, pero mal conducta ta produci mal resultado i e tendencia di repiti malecho asina.” Es decir, conducta pecaminoso ta produci mal fruta. E siñanza di karma ta relacioná cu e siñanza di renacimento, pasobra nan ta bisa cu algun karma ta produci fruta den un bida futuro hopi tempo despues dje bida den locual nan a comete e malecho.
Con e siñanza ei ta afecta hende creyente? Un señora budista cu a kere sinceramente den karma a bisa: “Mi a kere cu ta irrazonabel pa mi sufri pa algo cu locual mi a nace pero di locual mi no tabata sa nada. Mi tin cu acepta esei como mi destino. E cantamento di sutra i e hacimento di mi posibel pa hiba un bon bida no a resolve mi problema. Mi a cria un mal genio i tabata malcontento, semper kehoso.” Siñanza budista tocante e resultado di mal conducta a duné un sintimento di inutilidad.
Un otro religion di Oriente, confucianismo, a siña un otro manera pa trata cu malecho di hende. Segun Hsün-tzu, uno di tres filósofo grandi di confucianismo, naturaleza humano ta malu i incliná di ser egoísta. Segun Hsün-tzu, pa mantene ordu den e arreglo social di hende cu tin tendencia pecaminoso, e importancia di li mester ta enfatiza, locual kier men conducta correcto, cortesía, i e ordu di cosnan. Meng-tzu, un otro filósofo confuciano, a expresa un punto di bista contrario tocante naturaleza humano, pero a reconoce existencia di malecho den humanidad i, a confia cu e solucion lo ser den e naturaleza di hende di haci bon i cultiva nan aptitud personal. Sea loke sea, filósofo confuciano a siña e importancia di educacion i entrenamento pa lucha contra picá den e mundo. Aunque nan siñanza tabata di acuerdo riba e necesidad di li, nan concepto di picá i maldad ta mashá nebliná.—Compara cu Salmo 14:3; 51:5.
E Concepto di Picá ta Desparce den Cristiandad
Den cristiandad e concepto tradicional di picá ta mas claro, i e mayor parti di hende ta di acuerdo di cu ta existi picá i cu hende mester evité. No obstante, e actitud tocante picá ta cambia den cristiandad. Hopi hende ta nenga completamente e existencia di picá, i ta yama remordimento di concenshi un “sintimento di culpa,” algo pa evita. Mas cu 40 aña pasá, papa Pío XII a lamenta: “E picá dje siglo aki ta e perdimento di tur sintimento di picá.” Segun un investigacion publicá den e periódico simanal católico Le Pèlerin, un asombroso 90 porciento dje poblacion di Francia, unda e mayor parti dje pueblo ta yama nan mes católico romano, no ta kere cu picá ta existi mas.
Realmente, tanto den Oriente como den Occidente, e mayor parti di hende ta parce di biba awor den un estado di soño feliz sin un reconocimento di picá pa molestiánan. Pero, esei kier men cu no ta existi picá? Nos por pasa picá por halto sin corda malai? Picá lo desparce den futuro?