Berdadero Proteccion Ta Posibel?

AUTOR Ralph a bisa un biaha: “Hende cu coco secu ta kere den suerte . . . Hende inteligente ta kere den causa i efecto.” Sí, hende cu ta pone fe den amuleta i medalia di bon suerte ta entrega dominio di nan bida na forza invisibel. Nan ta rechaza lógico i sano huicio i ta entrega na miedu irrazonabel i supersticioso.

Sin embargo, e Bijbel por libra hende di tal miedu. E ta mustra cu amuleta i medalia ta impotente, inútil. Di ki manera? Wel, segun The New Enclopædia Britannica, “hende ta kere cu amuleta ta recibi poder for di nan relacion cu forza di naturaleza [entre otro cosnan].” Tal forza por ta ‘spiritu di hende morto’ of ‘e poder di suerte.’ Pero e Bijbel ta mustra claramente cu hende morto “no ta consiente di nada mes.” (Eclesiastés 9:5) P’sei, hende morto no tin spiritu cu por yuda of perhudica hende bibo; ni tampoco no ta existi un forza invisibel yamá suerte cu por obra na bo fabor.

Den tempo bíblico, Dios a condena hende cu a bandoné, hende cu a lubida su montaña santo, “hende cu a pone mesa pe dios di Bon Suerte i hende cu a yena biña mezclá pe dios di Destino.” En bez di gana proteccion, tal apoyador di suerte tabata sentenciá na destruccion. Jehova Dios a bisa: “Lo mi destina boso ne spada.”—Isaías 65:11, 12.

Cu nan práctica di arte di magia, e nacion di Babilonia di antigua també a pone fe den e proteccion di poder misterioso. Pero, no obstante, Babilonia a sufri di calamidad. “Persisti den boso magia i den boso bruha monstruoso,” ta e desafío di profeta Isaías. “Kizás boso por recibi yudanza foi nan . . . Pero, no! apesar di boso maña na cantidad, boso ta impotente.” (Isaías 47:12, 13, The New English Bible) Cu tempo, existencia di Babilonia a termina henteramente. Fe den arte misterioso a resulta di ser bano. Di igual manera, ningun amuleta di mágica, ningun contra, ni medalia por haci cualkier cos pa yuda of protehábo.

Un forma di idolatría

Sin embargo, algun hende no ta mira nada malu den hibamento di un pida di cristal, un pata di coneo, of un medalia religioso. Eseinan no ta simplemente adornu inocente? E Bijbel ta bisa cu no. E ta bisa cu adornu di arte misterioso siguramente no ta inocente.

Uso di amuleta ta un forma di idolatría—algo condená claramente den e Palabra di Dios. (Éxodo 20:4, 5) Ta cierto cu hende no ta kere cu nan ta adora directamente un amuleta of medalia. Pero, bo posesion di dje no ta manifesta un actitud di reverencia i di adoracion di poder misterioso invisibel? I no ta cierto cu atencion reverente (tal como zunchi) hopi bez ta rindí ne obheto mes? Pero, e Bijbel, den 1 Juan 5:21, ta conseha hende cristian: “Warda boso di ídolo.” Esei no ta inclui artículo considerá como medalia of amuleta?

E laz di arte misterioso

Door di uso di amuleta, hopi hende por bira víctima també di arte misterioso. Ta cierto cu algun hende ta hiba un pida di cristal of bruha den boter como costumber en bez di kerimento. Pero, mescos cu freimento cu prostituta por resulta den contaminacion cu AIDS, freimento cu arte misterioso també por tin consecuencia desastroso. Dios tabatin bon motibo pa prohibi Israel di practica magia, divinacion, i pronosticacion di futuro. “Tur hende cu sa haci tal cosnan ta algo repugnante pa Jehova,” ta e spiertamento bíblico.—Deuteronomio 18:10-14.

Pakico tal prohibicion severo? Pasobra forza invisibel respaldando tal práctica no ta spiritu di hende morto ni no ta e poder di suerte sino ta Satanás e Diabel i su demoñonan.a I e uso di amuleta ta relacioná directamente cu adoracion di demoño. Segun Vine’s Expository Dictionary of Old and New Testament Words: “Den hacimento di bruha, e uso di droga, sea senciyo of potente, tabata compañá generalmente cu repeticion di palabra misterioso i apelacion na poder misterioso, hunto cu uso di varios medalia, amuleta, etc.”

P’sei, hende cu tin amuleta of medalia ta hunga cu spiritismo. Nan ta corre e rísico di bira víctima di influencia i control peligroso di “e dios dje sistema di cosnan aki”—Satanás e Diabel. (2 Corintio 4:4) Pues, e Bijbel tin bon motibo pa mándanos evita tur forma di spiritismo.—Galatio 5:19-21.

Kibra cadena di supersticion

No obstante, The World Book Encyclopedia ta bisa: “Probablemente supersticion lo hunga un papel den bida tan tempo cu hende tin miedu di otro i ta keda insigur tocante e futuro.” Pero, Testigo di Jehova ta yuda hopi hende haya libertad for di supersticion perhudicial. Un señora di Zuidáfrica ta corda: “Spiritu malu a molestiámi, i mi cas tabata yen di muti pa protehámi di nan.” Testigo di Jehova a yudé mira e peliger di hunga cu arte misterioso. Con el a reacciona? “Mi a cuminza tira afó tur loke mi tabatin cu tabata relacioná cu demonismo.” El a sigi, “Mi salud a mehora. Mi a dedica mi bida pa sirbi Jehova i a bautiza.” Awor e ta liber di supersticion i spiritismo.

Considera, també, un herbalista di Nigeria cu a bruha spiritismo cu su arte di curacion. Hopi bez cu e uso di amenaza i zundramento, e tabatin e costumber di corre Testigo di Jehova for di su cas ora nan a bishité. Un biaha e asta a prepara un bruha special, a pronuncia algun palabra misterioso riba dje, i a tiré den e cara di un Testigo! E hacidor di bruha a grita, “Den siete dia lo bo muri!” Siete dia despues e Testigo a bolbe bishité, i e hacidor di bruha a sali lihé pa miré, pensando cu el a mira un fantasma! Ya cu su bruha tabata desenmascará como di ningun balor, el a conbini pa studia e Bijbel i despues e mes a bira un Testigo.

Abo també por kibra cadena di miedu i supersticion. Claramente, esei no por ta fácil. Por tá cu bo a crece den un cultura unda e uso di amuleta, medalia, i contra ta un costumber. Hende cristian di Efeso di antigua a enfrenta un desafío asina. Nan a biba den un cultura bao di influencia fuerte di spiritismo. Kico nan a haci ora nan a siña e berdad dje Palabra di Dios? E Bijbel ta bisa cu: “Basta hopi di esnan cu a practica arte di mágica a trece nan buki hunto i a kímanan dilanti tur hende. I nan a calcula hunto e prijs di nan i a haya cu nan tabatin e balor di cincuenta mil pida di plata.”—Echo 19:19.

Gana e proteccion di Dios

Si bo ta librábo di tur cos di arte misterioso, lo bo no keda sin proteccion? Al contrario, “Dios ta pa nos un refugio i fortaleza, un yudanza cu bo por haya pronto durante angustia.” (Salmo 46:1) E proteccion di Dios lo ser manifesta specialmente ora e ta destrui e mal sistema di cosnan aki. “Jehova sa con pa libra hende di debocion piadosa for di prueba, pero pa reserbá hende inhusto pe dia di huicio pa ser cortá.”—2 Pedro 2:9; compara cu Salmo 37:40.

Entretanto, ‘tempo i evento inesperá ta sosode nos tur.’ (Eclesiastés 9:11) Dios no ta priminti sirbidor di dje cu nan lo hiba un bida liber di dificultad ni cu lo e protehánan di tur daño personal. No obstante, e sí ta priminti di proteha nos spiritualidad i nos relacion cuné. (Salmo 91:1-9) Di ki manera? Entre otro cosnan, e ta dúnanos ley i principio cu por beneficiános i protehános dje influencia corruptivo di Satanás. (Isaías 48:17) Ora nos ta gana conocimento dje camina di Jehova Dios, ‘nos capacidad di pensa mes lo vigilános, discernimiento mes lo protehános’—por ehempel, for di actividad perhudicial no probechoso.—Proverbio 2:11.

Un otro manera cu Dios ta protehános ta door di percura “poder mas ayá cu loke ta normal” den tempo di prueba. (2 Corintio 4:7) I ora circunstancia por vence hende cristian, Jehova ta duna “e paz di Dios cu ta supera tur pensamento” pa vigila bo curazón i facultad mental. (Filipense 4:7) Sí, hende cristian ta equipá pa “para firme contra mal invento di Diabel.”—Efesio 6:11-13.

Con bo por alcanza tal proteccion? Cuminza door di gana conocimento di Jehova Dios i di su Yiu, Jesucristo. (Juan 17:3) Testigo di Jehova por haci hopi pa yudábo den esei. Mientras cu bo ta cultiva un relacion caloroso cu Jehova Dios, lo bo cuminza experimenta su proteccion bondadoso. Dios ta bisa den Salmo 91:14: “Pa motibo cu el a pone su cariño riba mi, ami també lo percura escape pe. Lo mi protehé pasobra el a yega di conoce mi nomber.”

En berdad, si bo ta fiel na dje, Dios lo bendicioná bo den futuro cu bida eterna den e binidero mundo nobo. Jehova Dios ta garantiza pa hende cu ta biba den e tempo ei: “Ningun hende lo hácinan tembla; pasobra e boca mes di Jehova di ehército a bisé.” (Miqueas 4:4) Lo no existi ni maleza ni morto mas. (Revelacion 21:4) Pero, asta awor bo por disfruta di un midí di siguridad—si bo ta cultiva un relacion íntimo cu Jehova. Mescos cu e salmista, bo por bisa: “Mi yudanza ta bini di Jehova, e Creador di cielo i tera.”—Salmo 121:2.

[Nota]

[Plachi na página 6]

Hende cristian den Efeso a líbranan di tur cos relacioná cu arte misterioso

[Plachi na página 7]

Lo no existi miedu mas bao dje Reino di Dios