Medalia di Bon Suerte Por Protehábo?

HOMBER di Brasil ta hiba un pida di cristal den nan sacu. Atleta americano tin cen pretu di bon suerte. Cruz di Santa Brígida ta colgá riba cama den cas di famía irlandés. Miyones di hende ta usa obheto asina, tal como medalia di bon suerte of contra.a Nan ta kere cu medalia of contra asina ta un proteccion contra daño i por trece bon suerte pa nan.

Por ehempel, considera Brasil. Segun e revista Veja, hopi brasilero ta hiba “pida di piedra i piedra semiprecioso cu nan ta kere tin e poder di trece suerte i energía fisical i mental ne doño di tal piedra.” Den miedu di ofende spiritu, otro brasilero ta pone emblema religioso of un texto riba muraya di nan cas. Algun hende asta ta usa e Bijbel como un contra sagrado; nan ta poné riba mesa cuné habrí permanentemente na Salmo 91.

Den region di zuid di Africa, muti, of medicina tradicional ta ser usá di igual manera, no simplemente pa su capacidad di cura, sino també como un proteccion contra mala suerte. Hopi bez nan ta kere cu enfermedad, morto, problema financiero, i asta fracaso romántico ta e resultado di bruha di enemigo of cu nan no a complace e spiritu di un antepasado. Generalmente nan ta obtene muti cerca un campesino hacidor di bruha cu ta traha e medicina di mata, palu, of curpa di bestia. Pero, interesantemente, no ta campesino so cu ta usa muti; hende ta usé den tur stad di Zuidáfrica. Comerciante i graduado di universidad també ta depende di muti.

Buscamento di bon suerte ta común també den país europeo. E buki Studies in Folklife Presented to Emyr Estyn Evans ta bísanos: “Casi no tin un parokia of pueblo den Irlanda cu no tin heru di pata di cabai clabá na porta of ariba e porta di algun cas of rancho.” Asta mas común den Irlanda ta cruz trahá di caña colgá riba cama of porta pa duna bon suerte. Observador ta bisa cu den conbersacion hende irlandés no ta tuma tal supersticion na serio. Sin embargo, mashá poco hende ta ignoránan completamente.

Buscamento pa proteccion

Pakico tal kerimento supersticioso ta atractivo? Ta parce cu nan ta satisface un necesidad básico di hende pa siguridad. Realmente, cuanto hende ta síntinan sigur den nan cas, corda camnando riba caya anochi? Agrega na esei e presion di ganamento di pan i cuidamento di yiu. Sí, nos ta biba den loke e Bijbel ta yama “tempo trabahoso.” (2 Timoteo 3:1, Testament Nobo) Pues, ta solamente natural pa hende sinti un deseo fuerte pa proteccion.

Esei por ta specialmente asina den cultura unda varios forma di spiritismo i bruha ta popular. Miedu di supuesto spiritu di difunto of miedu cu un enemigo lo máranan por haci loke ta yamá “contra” parce necesario. En todo caso, The World Book Encyclopedia ta bisa: “Casi tur hende tin un miedu cu ta hácinan insigur. Supersticion ta yuda vence tal miedu, dunando siguridad. Supersticion ta duna hende e siguranza di cu nan por haya loke nan kier i evita dificultad.”

Poder dudoso di amuleta

P’sei, hende den tur e mundo ta bisti, ta hiba, i ta desplega varios sorto di medalia, cruz, contra, i amuleta. Pero, ta razonabel pa kere cu contra cu hende ta traha por ofrece berdadero proteccion? Hopi artículo cu hopi hende ta usa como contra ta producto comercial producí na cantidad. No ta contrario cu razonamento lógico i sano huicio pa kere cu algo trahá den fábrica por tin poder mágico? I asta un remedi cu un campesino hacidor di bruha ta prepara specialmente ta nada mas cu un mezcla di ingrediente gewoon tal como raíz, yerba, i mata. Tal mezcla por tin poder mágico? Además, tin berdadero evidencia di cu hende cu sa usa medalia ta biba mas tempo—of ta mas feliz—cu hende cu no ta úsanan? Hende cu sa traha medalia mágica també no ta bira víctima di enfermedad i morto?

En bez di duna hende berdadero proteccion i un sintimento di dominio riba nan bida, uso supersticioso di medalia i contra realmente ta desanima hende di no usa nan inteligencia pa enfrenta nan problema i ta influenciánan pa depende di suerte como un cura lo todo. Confianza den e poder di medalia també por duna hende un sintimento di siguridad falso. Hende bao di influencia di alcohol por bisa cu alcohol no ta afecta nan reaccion i abilidad, pero si nan ta purba di corre auto, probablemente nan ta causa daño na nan mes i na otro hende. Hende cu ta confia den poder di medalia també por haci daño na nan mes. Teniendo e ilusion di ser protehá, nan ta keda dispuesto di corre rísico bobo of tuma decision imprudente.

Kerimento den poder di medalia ta presenta mas peliger serio cu por keda scondí for di miyones di hende cu sa usa medalia. Cua peliger, i tin un manera legítimo pa evita daño? E sigiente artículo ta trata cu tal pregunta.

[Nota]