Bo Ta Corda?

Bo a apreciá lesamentu dje reciente edicionnan di E Toren di Vigilancia? Wel, wak si bo por contestá e siguiente preguntanan:

▫ Ki yudansa práctico por duna esnan enfermo i di edad avansá den un congregacion awe?

Den e congregacion cristian di promé, nan a tene un lista di biudanan den necesidad di sosten material. (1 Timoteo 5:9, 10) Di igual manera awe, e ancianonan lo por traha un lista di esnan enfermo i di edad avansá cu mester di atencion special. Sin embargo, no mester laga p’e ancianonan so tuma iniciativa den e área aki. Tur persona den e congregacion mester ta conciente di tal necesidad. (1 Timoteo 5:4-8)—15/8, página 28-9.

▫ E historia bíblico di un bestia di laman cu a guli Jonas ta increibel?

No, sea un bayena cachalote, un tribon blancu grandi of un tribon bayena por guli un hende. Ademas, Jesus mes a confirmá cu e relato di Jonas ta cierto. (Mateo 12:39, 40)—15/8, página 32.

▫ Ki daño uso supersticioso di amuleto i medaya ta causa?

Nan uso en realidad ta desanimá hende pa enfrentá nan problemanan cu inteligencia i ta animá nan pa mira na suerte como un remedi pa tur cos. Tambe nan ta duna e usador un sintimentu falsu di siguridad. Mas importante, un persona cu ta pone fe den e poder di amuleto mágico i medaya di bon suerte por entregá e control di su bida na forsanan demoniaco invisibel.—1/9, página 4.

▫ Mencioná cuater elemento cu por yuda pa un matrimonio dura.

Esakinan ta keda dispuesto pa scucha, e abilidad di pidi disculpa, e capacidad di duna apoyo emocional consistente, i e deseo di cariciá cu cariño. (1 Corintio 13:4-8; Efesio 5:33; Santiago 1:19)—1/9, página 20.

▫ Cua ta un manera den cua Jehova ta suministrá awante na esnan cu ta enfrentá prueba?

Jehova ta haci esaki mediante e ehempelnan di awante registrá den su Palabra, Bijbel. (Romano 15:4) Segun cu nos ta contemplá esakinan, nos ta ser animá pa wanta i tambe nos ta siña hopi tocante con pa wanta.—15/9, página 11-12.

▫ Kico ta debocion piadoso?

Debocion piadoso ta referí na debocion na Jehova cu ta impulsá nos pa haci loke ta agrad’é, apesar di prueba difícil, pasobra nos ta stima Dios di curason.—15/9, página 15.

▫ Con nos mester considerá e misericordia di Dios?

Nos nunca mester menospreciá e gran misericordia di Dios. Nos mester ta manera Pablo i mustra nos aprecio dor di lucha contra nos mes imperfeccion. (1 Corintio 9:27) Den e manera aki nos lo demostrá, apesar di dificultad, cu nos tin un berdadero deseo pa haci loke ta corecto.—1/10, página 23.

▫ Pakico ta apropiado cu Pablo a mencioná gran pacenshi como e promé aspecto di amor?

Hende a yega di bisa cu no por tin compañerismo cristian sin tin cu wanta hopi, of sin soportá cu pacenshi un e otro. Esaki ta asina debí cu nos tur ta imperfecto, i nos imperfeccion i faltanan ta pone otro hende na prueba. P’esei, gran pacenshi ta fundamental pa amor existí entre rumannan.—15/10, página 21.

▫ E cristiannan di promé a usa e nomber di Dios?

Evidencia ta mustra bisa cu sí. Jesus a siña su siguidornan pa resa na Dios: “Laga bo nomber sea santificá.” (Mateo 6:9) I na final di su ministerio el a resa: “Mi a duna di conocé bo nomber na hende cu bo a duná mi for di mundu.” (Juan 17:6) Ademas, e copianan di antigua di Version Setenta a contené e nomber di Dios den e forma hebreo dje Tetragrámaton.—1/11, página 30.

▫ Cua ehempelnan bíblico ta mustra cu e manera con nos ta manehá nos erornan por afectá nos bida?

Rey Saul a resistí conseho caprichosamente, i su erornan a multiplicá, culminando finalmente den su morto den desfabor di Dios. (1 Samuel 15:17-29) N’e otro banda, apesar di Rey David su eror i picánan, el a aceptá coreccion cu repentimentu i a permanecé fiel na Jehova. E ehempelnan bíblico aki ta mustra cu admitiendo nos erornan ta yuda nos mantené un bon relacion cu Dios i pues tene e speransa di bida eterno. (Salmo 32:1-5)—15/11, página 29-30.

▫ Con Jehova ta bini na yudansa di su pueblo ora nan ta afligí debí na desaster natural of otro causa?

Jehova ta yuda, no dor di para e forsanan di naturalesa milagrosamente of dor di algun otro obra sobrenatural, sino dor di un otro forsa cu mayoria hende realmente no ta comprendé—amor. Sí, Jehova realmente ta stima su pueblo, i el a cultivá den nan un amor pa otro cu ta asina fuerte cu e ta capas pa haci pa nan loke ta parce milagroso. (1 Juan 4:10-12, 21)—1/12, página 10.