Pakico Admití un Eror?

TABATA un dje encuentronan di mas straño den historia militar. Un mensahero femenino no-armá a bira bek 400 soldá tof determiná pa venga un insulto. Despues di a tende e súplicanan di solamente un muher yen di curashi, e lider dje hombernan ei a bandoná su mision.

E lider ei tabata David, kende despues a bira rey di Israel. El a scucha n’e muher Abigail, pasobra el a deseá na agradá Dios. Ora Abigail a mustr’é cu tacto cu tumando vengansa riba su esposo, Nabal, lo resultá den culpa di sanger, David a sclama: “Bendicioná sea Jehova e Dios di Israel, kende a mandá bo riba e dia aki pa encontrá mi! I bendicioná sea bo sensates i bendicioná sea abo cu a restringuí mi riba e dia aki di drenta den culpa di sanger i di haci mi propio man bini na mi salbacion.” David tabata gradicidu cu Dios a usa Abigail pa strob’é di cometé un picá grave.—1 Samuel 25:9-35.

Den un salmo, David a puntra: “Erornan—ken por dicerní nan?” (Salmo 19:12) Mescos cuné, kisas nos no ta conciente di nos faltanan aménos un persona mustra nan na nos. Na otro ocasion consecuencia desagradabel ta forsa nos pa realisá cu nos tabata robes, imprudente of a falta bondad.

Ningun Causa pa Desesperacion

Aunke nos tur ta faya, esei no mester ta un causa pa desesperacion. E diplomático Edward John Phelps a observá: “E hende cu no sa faya generalmente no sa haci nada.” I e disipel cristian Santiago a bisa: “Nos tur ta trompecá hopi biaha.” (Santiago 3:2) Un mucha lo siña cana sin trompecá nunca? No, pasobra un mucha ta siña dor di faya i ta sigui purba te ora e logra su balansa.

Pa hiba un bida balansá, nos mester siña tambe for di nos fayonan i esnan di otronan. Ya cu Bijbel ta relatá experencia di hopi hende kende nan circunstancianan ta mescos cu di nos, nan por yuda nos evitá di haci e mesun fayonan cu nan a haci. Kico, anto, nos por siña for di nan fayonan?

Humildad, un Cualidad Vital

Un les ta cu Dios no ta condená tur hende cu faya sino ta husga solamente esnan cu ta nenga di rectificá nan si ta posibel. Rey Saul di Israel, a desobedecé instruccion di Jehova tocante e destruccion dje amalekitanan. Ora e tabata confrontá pa profeta Samuel, Saul na promé instante a minimisá e asuntu i despues a purba di culpa otronan. E tabata mas preocupá tocante perdementu di cara dilanti su hendenan, cu corigí e eror. P’esei, ‘Jehova a rechas’é como rey.’—1 Samuel 15:20-23, 30.

Aunke Saul su sucesor, David, a faya seriamente, el a ser pordoná pasobra humildemente el a aceptá conseho i disiplina. E humildad di David a impuls’é pa presta atencion n’e palabranan di Abigail. Su trupanan tabata clá pa bataya. Sin embargo, dilanti su hombernan, David a admití cu el a tuma un decision imprudente. Atrabes di su bida, tal humildad a yuda David busca pordon i corigí su pasonan.

Tambe humildad ta impulsá Jehova su sirbidornan pa rectificá remarkenan sin consideracion. Durante un audiencia dilanti Sanedrin, e sumo sacerdote a ordená pa dal Pablo un wanta. E apostel a contestá bek: “Dios ta bai dal abo, muraya blancu.” (Echo 23:3) Talbes debí cu e no por a mira bon, Pablo no a realisá cu ken e tabata papia te ora hende pará ei banda a puntra: “Bo ta insultando e sumo sacerdote di Dios?” Cu esei, Pablo inmediatamente a reconocé su eror, bisando: “Rumannan, mi no tabata sa cu ta e sumo sacerdote. Pasobra ta pará skirbí, ‘Bo no mester papia perhudicialmente di un gobernante di bo pueblo.’” (Echo 23:4, 5; Éxodo 22:28) Sí, Pablo humildemente a admití su eror.

Nan A Admití nan Erornan

Tambe Bijbel ta mustra cu algun a cambia nan moda di pensa incorecto. Por ehempel, considerá e salmista Asaf. Debí cu hende malbado a parce di prosperá, el a bisa: “Siguramente ta en bano mi a limpia mi curason.” Pero Asaf a bini na su sentidonan despues cu el a bai n’e cas di Jehova i a meditá riba e beneficionan di adoracion puru. Ademas, el a admití su falta den Salmo 73.

Jonas tambe a permití pensamentu incorecto nebliná su punto di bista. Despues cu el a predicá den Nínive, e tabata preocupá cu su vindicacion personal en bes di spar bida di habitantenan dje stad ei. Jonas a keda malcontentu ora Jehova no a castigá e ninivitanan apesar di nan repentimentu, pero Dios a corigi’é. Jonas a bin realisá cu su punto di bista tabata robes, pasobra e buki di Bijbel cu ta carga su nomber onestamente ta admití su erornan.—Jonas 3:10–4:11.

Asumiendo eróneamente cu Jehova Dios, no Satanas e Diabel, tabata causando su angustia, e homber Job a purba proba cu e no a merecé su sufrimentunan. E no tabata conciente dje cuestion mas grandi: Dios su sirbidornan lo permanecé leal na dje bou di prueba? (Job 1:9-12) Despues cu Elihú i anto Jehova a yuda Job mira su eror, el a admití: “Mi a papia, pero mi no a comprendé . . . P’esei mi ta hala mi palabra atras, i mi ta repentí den stof i shinishi.”—Job 42:3, 6.

Admitiendo eror ta yuda nos mantené un bon relacion cu Dios. Manera e ehempelnan anterior ta mustra, lo e no condená nos pa nos erornan si nos admití nan i haci loke nos por pa rectificá pensamentu incorecto, palabra sin consideracion of accion prufiá. Con nos por aplicá e conocimentu aki?

Haciendo Algu Tocante Nos Erornan

Reconociendo humildemente un eror i haciendo algu tocante dje por fortalecé laso di famia. Por ehempel, talbes debí na cansancio of mal beis, un mayor por tabata basta severo den disipliná su yu. Nenga di corigí e fayo aki por tin mal efecto. P’esei, apostel Pablo a skirbi: “Tatanan, no iritá boso yunan, sino sigui cria nan den e disiplina i reglamentu mental di Jehova.”—Efesio 6:4.

Un hóben cristian yamá Paul ta recordá calurosamente: “Semper tata a pidi dispensa si el a sinti cu el a pasa límite. Esei a yudá mi respet’é.” Sea un dispensa ta necesario den un situacion particular of no, ta algu pa decision personal. Sin embargo, despues di pidi dispensa mester sigui esfuerso diligente pa evitá erornan similar den futuro.

Kico si un esposo of esposa cometé un fayo cu ta causa angustia? Un admision franco, un disculpa di curason i un spiritu di pordoná lo yuda mantené nan relacion amoroso. (Efesio 5:33; Colosense 3:13) Jesús, un homber spañó di un temperamentu fuerte den su 50’i picu, no ta muchu orguyoso pa pidi dispensa na su casá, Albina. “Nos tin e custumber di pidi dispensa ora nos ofendé otro,” segun Albina. “Esaki ta yuda nos soportá otro den amor.”

Ora un Anciano Cometé un Eror

Admitiendo eror i pidiendo disculpa sincero tambe lo yuda ancianonan cristian pa traha huntu armoniosamente i ‘mustra onor un na otro.’ (Romano 12:10) Un anciano kisas no ta incliná pa admití un eror pasobra e tin miedu cu esaki lo mina su autoridad den e congregacion. Sin embargo, purbando pa hustificá, ignorá of minimisá un fayo tin mas chens di causa cu otronan ta perde confiansa den su superintendencia. Un ruman maduro kende humildemente ta pidi disculpa, talbes pa un remarke sin consideracion, ta gana e respet di otronan.

Fernando, un anciano na Spaña, ta corda un ocasion ora un superintendente di circuito, presidiendo riba un reunion grandi di anciano a haci un declaracion inexacto tocante con un reunion mester wordu conducí. Ora un ruman a corigí respetuosamente loke el a bisa, e superintendente di circuito inmediatamente a reconocé cu el a faya. Fernando ta corda: “Ora mi a mir’é admití su eror dilanti tur e ancianonan ei, esei a impresioná mi mashá. Mi a haña hopi mas respet p’e despues di tal disculpa. Su ehempel a siñá mi ki importante ta pa reconocé mi mes erornan.”

Sea Lihé pa Admití un Eror

Generalmente un disculpa ta ser apreciá, specialmente si e ser hací lihé. Realmente, mas lihé nos admití un eror, mas mihó. Pa ilustrá: Dia 31 di october, 1992, Papa Juan Pablo II a admití cu e Inkisicion a actua “robes” 360 aña pasá ora el a castigá Galileo pasobra el a afirmá cu e tera no ta e centro dje universo. Pero, posponiendo un disculpa pa un tempu asina largu tin tendencia di disminuí su balor.

Mescos ta cierto den relacionnan personal. Un disculpa lihé por cura un herida causá pa un palabra of accion desagradabel. Jesus a insta nos pa no tarda den hacimentu di pas, bisando: “Si . . . bo ta hibando bo don na altar i ei bo corda cu bo ruman tin algu contra bo, laga bo don ei dilanti altar, i bai; promé haci pas cu bo ruman, i despues, ora bo bolbe bek, ofrecé bo don.” (Mateo 5:23, 24) Hopi biaha, pa restorá relacionnan pacífico simplemente ta rekerí pa nos admití cu nos a atendé asuntunan robes i pidi pordon. Mas nos warda pa haci esaki, mas difícil e ta bira.

Contentu pa Admití Eror

Manera e ehempelnan di Saul i David ta ilustrá, e manera cu nos ta atendé nos faltanan por afectá nos bida. Saul a resistí conseho caprichosamente, i su erornan a multiplicá, culminando finalmente den su morto den desfabor di Dios. Sin embargo, apesar di David su eror i picánan, el a aceptá coreccion cu repentimentu i a permanecé fiel na Jehova. (Compará cu Salmo 32:3-5.) Esei no ta nos deseo?

E mayor recompensa pa admití i rectificá un eror of repentí di picá ta di sa cu Dios a pordoná bo p’e. “Felis ta esun . . . kende su picá ta cubrí,” David a bisa. “Felis ta e homber riba ken su cuenta Jehova no a pone eror.” (Salmo 32:1, 2) Ta ki sabí, anto, pa admití un eror!

[Picture on page 29]

Un mucha lo siña cana sin trompecá nunca?