Kon Mi Por Dil ku Mi Foutnan?

Kiko abo lo hasi?

Lesa kiko a pasa ku Karina i imaginá bo ku esei a pasa ku bo. Kiko abo lo a hasi den su situashon?

Karina: “Un dia, bayendo skol, mi tabata kore outo muchu duru. Un polis a para mi i duna mi un but. Mi a sinti mi hopi malu! Ora ku mi a bisa mi mama, el a bisa mi ku mi mester bisa mi tata, lokual mi no tabata ke hasi.”

Kiko abo lo hasi?

1. Opshon A: Keda ketu i spera ku bo tata lo no haña sa.

2. Opshon B: Konta bo tata tur loke a pasa.

Podisé lo bo tin gana di skohe Opshon A. Al fin i al kabo, kisas bo mama lo djis asumí ku bo a bai bisa bo tata. Pero, semper ta bon pa bo atmití bo foutnan.

Tres motibu pa atmití bo foutnan

1. 1. Esei ta e mihó kos pa hasi. Beibel ta bisa: “Nos ke komportá nos mes na un manera onesto den tur kos.”—Hebreonan 13:18.

   “Mi ta ègt hasi mi bèst pa ta onesto, asumí mi responsabilidat i atmití mi foutnan, i tambe pidi pordon mas pronto posibel.”​—Alexis.

2. 2. Ta bira mas fásil pa otro hende pordoná bo. Beibel ta bisa: “Esun ku skonde su pikánan lo no prosperá, ma esun ku konfesá i laga nan lo haña miserikòrdia.”—Proverbionan 28:13, Beibel Santu.

   “Bo mester tin kurashi pa atmití un fout; pero ta asina bo ta gana hende su konfiansa. Nan ta mira ku bo ta onesto. Ora bo atmití bo fout, bo ta saka algu bon for di loke a pasa.”​—Richard.

3. 3. Mas importante ainda, Yehova Dios lo keda kontentu ku bo. Beibel ta bisa: “SEÑOR ta repudiá esnan ku no ke tin di aber kunÉ, pero ku esnan ku ta tende di djE E ta anda ku konfiansa.”​—Proverbionan 3:32, Beibel na papiamentu koriente.

   “Despues ku mi a kometé un fout grandi, mi a realisá ku mi mester a atmití loke a pasa. Yehova lo no a bendishoná mi si mi no a hasi e kosnan manera e ke.”​—Rachel.

Anto kon Karina a dil ku su fout? El a purba di skonde e but for di su tata. Pero e no por a skonde esei pa semper. Karina ta bisa: “Mas o ménos un aña despues, mi tata tabata wak e papelnan di seguro i el a ripará ku tabatin un but na mi nòmber. Mi a haña mi ku masha problema. Te asta mi mama a rabia ku mi pasobra mi no a hasi loke el a manda mi hasi!”

Kiko ta e lès? Karina ta bisa: Ora bo skonde bo foutnan, ta pió so e kos ta bira. Tardi òf trempan lo bo tin ku karga e konsekuensianan!”

Kon bo por siña for di bo foutnan?

Tur hende ta hasi fout. (Romanonan 3:23; 1 Huan 1:8) I manera nos a mira, si bo atmití bo foutnan mesora, bo ta mustra ku bo ta un hende humilde i maduro.

E siguiente paso ta pa siña di bo foutnan. Lamentablemente, algun hóben no ta probechá di e chèns akí! Kisas nan ta pensa manera e hóben Priscilla a pensa un tempu. E ta bisa: “Mi tabata bira masha angustiá ora mi a faya. Mi no tabata duna mi mes muchu balor; p’esei mi fayonan tabata parse manera un karga muchu pisá. Mi tabata sinti mi asina malu ku mi tabata pensa ku mi no ta sirbi pa nada.”

Abo sa sinti asina ora bo faya? Si ta asina, kòrda esaki: Si bo keda pensa riba bo foutnan di pasado, ta manera kos ku bo ta kore bo outo anto keda wak den e spil di wak patras. Si bo keda focus riba pasado, lo bo sinti ku bo no ta bal nada i lo bo no tin forsa pa dil ku e difikultatnan ku lo bo topa den futuro.

En bes di esei, dikon no purba di tin un punto di bista mas balansá?

“Pensa bèk riba e foutnan ku bo a yega di hasi i siña for di nan di manera ku bo no ta bolbe kometé nan. Pero, no keda pensa di mas riba nan pa esei no kibra bo.”​—Elliot.

“Mi ta purba di mira mi foutnan komo un oportunidat pa siña algu. For di kada un di nan mi por saka un lès ku lo yuda mi bira un mihó persona i e siguiente biaha dil ku e situashon na un manera diferente. Esei ta e mihó kos ku bo por hasi pasobra e ta yuda bo bira un hende maduro.”​—Vera.