Paisahe dje Tera Primintí

Galad—Un Region pa Hende cu Curashi

UN POCO tempo promé cu Israel a cruza e rio Jordan pa drenta den e Tera Primintí, Moisés a urgínan: “Sea balente i fuerte. . . . Jehova bo Dios ta esun cu ta marcha cu bo.”—Deuteronomio 31:6.

E dos tribu di Rubén i Gad i mitá dje tribu di Manasés tabata incluí den e animacion di Moisés. Nan a mira cu e ‘tera di Galad tabata un lugar pa cria bestia,’ p’sei nan a pidi e asignacion pa nan biba den e region di Galad.—Número 32:1-40.

Galad tabata ne otro banda, pariba di Jordan. Realmente, e tabata henter e banda ariba, dje punta di nort di Lamá Morto te na Lamá di Galilea. E region a subi for dje Valle di Jordan te na sabana cu hopi awa i ceru rondó. Pues, Galad tabata un lugar excelente pa produci grano i cria bestia. E foto ariba ta dunábo un idea di con un parti di Galad tabata. Pero, pakico enlazá curashi cu un region relativamente agradabel?

Tribu cu a scoge di biba den Galad claramente no a haci esei den miedu. Corda cu nan a conbini pa cruza e Jordan pa bringa contra enemigo dje Tera Primintí. I ora nan a bolbe pa Galad, nan tabatin mester di mas curashi. Pakico? Wel, nan tabata ne frontera, den peliger di atake for di ammonita den zuidoost i di Siria panort. I nan sí tabata atacá.—Hosué 22:9; Huez 10:7, 8; 1 Samuel 11:1; 2 Rey 8:28; 9:14; 10:32, 33.

Tal atake tabata ocasion específico ora curashi tabata necesario. Por ehempel, despues cu Jehova Dios a permiti ammonita oprimi Galad, e pueblo di Dios a arrepentí i a acudi na un lider, “un homber fuerte i balente,” kende su tata també tabata yamá Galad. E homber balente, of cu tabatin curashi, tabata Jefté. E ta bon conocí pe huramento cu a refleha cu, aunque e tabatin curashi, el a busca e guía i apoyo di Dios. Jefté a hura cu si Dios capacité pa domina ammonita opresivo, e promé persona saliendo for di su cas pa contra cuné, lo e ‘ofrece como un ofrenda kimá,’ of sacrificio, pa Dios.a E persona saliendo tabata e único yiu di Jefté, su yiu muher, cu despues a bai pa sirbi den e santuario di Dios. Sí, Jefté i, di manera diferente, su yiu muher, a demonstra curashi.—Huez 11:1, 4-40.

Un demonstracion di curashi cu kizás no ta tanto conocí a sosode durante e tempo di Saul. Pa imaginábo e situacion, corda ora Saul a bira rey, ammonita a menazá di saca wowo drechi di homber di Jabés den Galad, cu tal bez tabata situá den un rooi cu a basha for di ceru den e Jordan. Saul a recluta un ehército lihé pa fortalece Jabés. (1 Samuel 11:1-11) Cu tal fondo den nos memoria, láganos pasa te na fin dje reinado di Saul i mira con nan a demonstra curashi.

Tal bez bo ta corda cu Saul i tres yiu di dje a muri den un gera cu filisteo. Tal enemigo a cap e cabez di Saul i cu triunfo a colga e cadáver di Saul i su tres yiu riba muraya di Bet-san. (1 Samuel 31:1-10; na man drechi, bo ta mira cobamento den e ceru di Bet-san.) Palabra di esei a yega Jabés, den ceru di Galad pariba di Jordan. Kico galadita por haci contra un enemigo tanto fuerte cu el a vence e rey di Israel?

Wak e mapa pa sigi e ruta cu galadita a scoge. “Tur homber balente a lanta un bez i a marcha henter anochi i a baha e cadáver di Saul i cadáver di su yiunan for di muraya di Bet-san i a bini na Jabés i a kímanan ei.” (1 Samuel 31:12) Sí, nan a efectua un invasion den anochi dje fortaleza dje enemigo. Bo por comprende pakico e Bijbel ta yámanan balente, of yen di curashi.

Despues, diez tribu a apartá pa forma e reino di nort di Israel, i esei a inclui Galad. Nacion alrededor, Siria promé i despues Asiria, a cuminza domina parti dje region pariba di Jordan. Pues, apesar di ehempel di curashi di pasado, e pueblo di Galad a paga un prijs pa nan sitio ne frontera di Israel.—1 Rey 22:1-3; 2 Rey 15:29.

[Nota]

[Mapa na página 8]

LAMÁ DI GALILEA

LAMÁ MORTO

Rio Jordan

Bet-san

Ramot-galad

Jabés

GALAD

[Rekonosementu]

Based on a map copyrighted by Pictorial Archive (Near Eastern History) Est. and Survey of Israel.

[Rekonosementu di plachi na página 8]

Pictorial Archive (Near Eastern History) Est.

[Rekonosementu di plachi na página 9]

Pictorial Archive (Near Eastern History) Est.