Perseverá den e Sirbishi di Pionero

ROND di 4.500.000 Testigo di Jehova ta declarando e bon nobo rond mundu. Entre nan tin mas cu 600.000 pionero, of publicadornan di Reino di tempu completo. Esnan den e enorme ehército di pionero aki ta varia den edad for di promé cu tiener te na penshonado den nan 90’i picu aña. Nan ta bini di tur antecedencia i gremio di bida.

Sin duda, tur e predicadornan di tempu completo aki kier tin éxito den e ministerio di pionero. Hopi ta deseá pa haci’é nan carera di bida. Algun ta incapas pa haci esei pa cierto motibu. No obstante, otronan tabata capas pa sigui traha como pionero apesar di dificultad financiero, kebrante di salú, desanimacion i otro problema. Pues con predicadornan di tempu completo por enfrentá tal problemanan i tog perseverá den e sirbishi di pionero?

Satisfaciendo Necesidadnan Financiero

En general, pioneronan ta traha seglarmente pa cubri nan gastunan, mescos cu apostel Pablo a haci. (1 Tesalonicense 2:9) Den mayoria parti di mundu, nan ta enfrentá prijsnan exorbitantemente haltu pa cuminda, paña, bibienda i transporte. Hopi biaha ta difícil pa haña e trabou seglar ‘part-time’ cu nan mester. Si trabou asina ta disponibel, nan frecuentemente ta ofrecé solamente salario mínimo, sin beneficio di seguro médico.

Si nos ‘sigui busca promé Dios su Reino i su husticia,’ nos por tene fe cu Jehova lo percurá pa nos necesidadnan material. P’esei, ora pioneronan ta bou di presion financiero, nan ‘no mester ta ansioso tocante e siguiente dia.’ (Mateo 6:25-34) Miéntras cu nan ta haci esfuerso diligente pa resolvé tal problemanan, fe fuerte den Jehova lo spar nan di indebido ansiedad.

Ora un persona ta confrontá dificultad financiero, talbes e por reducí su gastunan. Cu algun cambio den presupuesto, kisas ta posibel pa satisfacé necesidadnan, aunke no simpel deseo pa cos material. Pa reducí gastu, algun pionero ta compartí un apartamentu cu otro cristiannan. Yudando nan yunan traha pionero, tin biaha mayornan ta duna alohamentu grátis of na un costo mínimo. Otronan ta yuda pioneronan cu cuminda i gastu di transporte. Pero pioneronan lo no kier ta un carga pa otronan, pasobra nan tin un deber bíblico pa sostené nan mes.—2 Tesalonicense 3:10-12.

Gastu di transporte por ser reducí dor di compartí gastu cu otro pioneronan. Si dos pionero tin auto, nan lo por traha huntu den e trabou di predicacion den e mesun área, usando un auto i eliminando e gastu di usa dos vehículo. Pioneronan cu no tin auto lo por forma grupo huntu cu esnan cu sí tin i participá den cubri e gastunan di transporte. Por reducí mas aleu gastu di biahamentu dor di cubri teritorionan cercano principalmente na pia. Den hopi pais pioneronan ta usa transporte público barata.

Entre esnan cu a vence problemanan financiero i perseverá den sirbishi di tempu completo tabata Newton Cantwell i su esposa. Nan a bende nan cunucu i a cuminsá traha pionero cu seis di nan siete yunan na 1932, durante e tempu di Gran Depresion. “No a dura muchu cu nos a gasta tur loke nos a ricibí cu benta di nos cunucu—principalmente na cuenta di dokter,” segun Ruman Cantwell a skirbi. “Nos ta corda cu ora nos a muda pa nos segundo asignacion, nos tabatin net suficiente pa paga dos siman di huur adelantá i sobra cincu dollar. No obstante, nos tabata sa cu Jehova lo a percurá pa nos tanten cu nos a cumpli diligentemente cu nos sirbishi. . . . Nos a siña economisá den varios manera. Por ehempel, ora nos a muda pa un teritorio nobo mi a papia cu algun dje doñonan di pomp di gasolin i splica nan cu tur dia nos a core tres auto relacioná cu nos trabou cristian. Esaki generalmente a duna como resultado cu nos a obtené gasolin cu descuento. Nos yunan a siña drecha auto lihé, yudando nos spar basta placa na gastu di garashi.” Asina famia Cantwell a enfrentá desafionan financiero exitosamente i a perseverá den sirbishi di tempu completo. Ruman Cantwell ainda tabata rib’e lista di pionero ora el a muri na edad di 103 aña.

Hañando Trabou ‘Part-time’

Hopi pionero ta sostené nan mes financieramente mediante trabou ‘part-time.’ Pa sostené su mes den e ministerio na Corinto, Pablo tabata traha tent huntu cu su compañénan creyente, Aquila i Priscilla. (Echo 18:1-11) Awe, rumannan spiritual hopi biaha ta contentu pa ofrecé pioneronan trabou seglar ‘part-time.’ Otro pioneronan ta obtené tal trabou mediante agencianan di empleo cu ta ofrecé trabou temporal. Fe den Dios ta esencial, i tambe oracion sincero pa su guia den tumamentu di decision encuanto trabou.—Proverbio 15:29.

Un pionero a bisa, “Despues di a saca hopi fortalesa di un consideracion cu oracion, mi a notificá mi supervisor cu mi trabou ministerial ta un responsabilidad personal serio i cu lo mi no por aceptá e posicion di tempu completo. E siguiente djarason, mi a ser puntrá si lo mi reconsiderá e trabou pero riba un base ‘part-time.’ Mi a aceptá cu gusto.” No balotá e poder di oracion i compañá bo oracionnan cu accion.

Pioneronan por haña cu ta consehabel pa bisa prospecto doñonan di trabou cu nan propósito den busca trabou ‘part-time’ ta pa sostené nan mes den e ministerio. Nan por mencioná e dianan cu nan ta disponibel i e cantidad di ora pa siman cu nan por dedicá na un trabou. Dos ruman muher carnal tabata capas pa parti un trabou di tempu completo den un oficina cu ta ofrecé conseho hurídico, permitiendo nan cada un di traha dos dia i mei pa siman. Esaki a sostené nan como pionero te ora nan a asistí n’e Scol Bíblico di Galad di Watchtower i a ricibí asignacion como misionero.

Bo por haña varios tipo di trabou bíblicamente aceptabel dor di papia cu compañé creyente i otronan of dor di consultá cu avisonan den corant. Humildad ta probechoso, pasobra e por evitá cu pioneronan ta bira muchu selectivo encuanto e tipo di trabou cu nan lo kier haci. (Compará cu Santiago 4:10.) Pa sigui traha pionero kisas nan mester traha trabou seglar cu algun hende lo considerá humilde of baho. Si bo aceptá un trabou asina pero ta deseá algu diferente, un cambio di trabou mas despues kisas ta posibel.

Kebrante di Salú i Desanimacion

Algun mester descontinuá nan sirbishi di pionero debí na problema serio cu salú. Sin embargo, si pioneronan no ta muchu purá relacioná cu esaki, kisas nan ta haña cu un enfermedad por ser curá of e salú por mehorá suficientemente pa nan sigui traha pionero. Hopi por traha pionero apesar di problema cu salú pasobra nan ta haña tratamentu médico, ta pega na un dieta apropiado pa nan, i ta haña sosiegu i ehercisio necesario. Un superintendente biahero a observá un ruman muhé pionero asina afligí cu artrítis cu e tabatin mester di yudansa pa cana di cas pa cas den e ministerio. (Echo 20:20) Tog, e i su esposo a conducí 33 studio di Bijbel di cas i a yuda 83 persona aceptá e berdad di Dios. Su salú a mehorá cu tempu i el a asistí n’e Scol di Sirbishi di Pionero 11 aña despues.

Desanimacion por pone algun bandoná e ministerio di pionero. (Proverbio 24:10) Un pionero a bisa un superintendente biahero: “Mi ta bai stop di traha pionero. . . . Mi tin recibu di paga.” E tabatin mester di un bril di bista cu ta costa 20 dollar. E superintendente a puntra, “Bo ta bai stop di traha pionero pa motibu di un necesidad di 20 dollar?” El a sugerí e pionero p’e traha den e plantacion local di cofi pa un dia, gana 20 dollar, cumpra e bril i sigui traha pionero. Un combersacion mas aleu a revelá cu e problema básico tabata desanimacion debí na reparacion costoso di auto. El a recomendá e pionero p’e reducí su gastunan dor di core auto tur dia den un ‘straal’ di un par di kilometer en bes di riba un área grandi. Tambe el a consehá e pionero pa mantené su spiritualidad. E pionero a aplicá e conseho i seis luna despues a ricibí su invitacion pa asistí na Scol di Galad. Despues di graduacion el a ser asigná na un pais stranhero i a sirbi ei fielmente pa hopi aña te na su morto. Sí, e resultado hopi biaha ta gran bendicion si nos no ta sucumbí na desanimacion sino ta tene na mente cu Jehova ta cu nos.

Atesorá Bo Privilegio di Sirbishi

Apesar di prueba, manera caso di necesidad i tempu sin cuminda, Pablo a considerá su ministerio como un tesoro. (2 Corintio 4:7; 6:3-6) Enfrentá cu dificultad i persecucion awe, hopi di Jehova su sirbidornan na Africa, Asia, Oost Europa i otro caminda a pega na nan privilegio di traha pionero. P’esei, ora bo haña prueba, haci tur esfuerso posibel pa perseverá den e sirbishi privilegiá aki, p’e alabansa di Jehova.

Mayoria pionero por a drenta e trabou di predicacion di tempu completo solamente debí cu nan a simplificá nan estilo di bida. Mescos cu Pablo, nan a resistí tentacionnan materialista i a cultivá contentamentu teniendo ‘di come i di bisti.’ Pa perseverá den e sirbishi di pionero, nan mester keda contentu cu e cosnan necesario. (1 Timoteo 6:8) Goso ta resultá for di atesorá nos privilegionan duná-pa-Dios, poniendo nan riba posesion material.

Pa ilustrá: Anton Koerber tabatin e privilegio di representá interesnan di Reino na oficialnan di gobiernu na Washington, D.C. El a sirbi como pionero pa algun tempu i tabata un superintendente di circuito for di 1952 te 1959. Algun di su relacionnan anterior di negoshi un biaha a acerk’é cu un proposicion cu lo a permiti’é haci un ganashi di un miyon dollar. Sin embargo, pa haci esei, lo tabata necesario p’e dedicá tur su tempu na asuntunan di negoshi pa rond di un aña. Despues di a haci oracion pa guia i e spiritu di un mente sano, el a bisa: “No ta posibel pa mi entregá mi privilegio maraviyoso di sirbi Jehova aki pa ni un solo aña, no, ni pa tur placa di mundu. Sirbiendo mi rumannan aki na Washington ta mas precioso pa mi, i aki mi sa cu mi tin Jehova su bendicion. Lo mi a gana un miyon dollar sigur, pero na fin dje aña di un clase di bida asina, con lo mi tabata spiritualmente, of asta físicamente?” P’esei, el a rechasá e oferta. Dor di atesorá nan privilegionan den un manera similar hopi ruman ta ser yudá pa perseverá den e sirbishi di pionero.

Ki gran bendicion pioneronan ta disfrutá di dje! Ta un bendicion pa dedicá hopi ora papiando tocante Jehova su gobernacion glorioso. (Salmo 145:11-13) Debí cu nan ta dedicá asina tantu tempu n’e ministerio, pioneronan tin e bendicion di trece consuelo spiritual na e pobernan i esnan oprimí, esnan enfermo of na luto, i otronan dolorosamente afligí i den necesidad di un speransa sigur. P’esei, si circunstancia ta permití nos participá den e trabou di tempu completo, nos en berdad lo disfrutá di hopi bendicion. Ta ‘e bendicion di Jehova cu ta haci ricu.’ (Proverbio 10:22) I ta cu su yudansa i bendicion cu e hopi proclamadornan di Reino ta perseverá gososamente den e sirbishi di pionero.