Pregunta di Lector

Ta apropiado pa hende cristian bira socio den negoshi cu hende no creyente, siendo cu e Bijbel ta bísanos: “No bira uní bao di yugo desigual cu hende no creyente”?

Nos ta haya tal conseho den 2 Corintio 6:14-16: “No bira uní bao di yugo desigual cu hende no creyente. Pasobra cua compañerismo husticia tin cu maldad? Of cua participacion luz tin cu scuridad? Además, cua armonía tin entre Cristo i Belial? Of cua porcion hende fiel tin cu hende no creyente? I cua acuerdo e tempel di Dios tin cu ídolo?”

No tin motibo pa kere cu apóstol Pablo a duna e conseho aki cu e intencion di establece prohibicion específico, tal como e prohibicion di hende cristian di unié den negoshi cu hende no creyente. Sin embargo, su conseho siguramente ta toca esei, i també otro aspecto di bida.

Pablo a skirbi tal conseho pa su rumanan cristian den Corinto di antigua. Bibando den un stad cu tabata specialmente corrupto, nan tabatin cu lucha diariamente contra peliger moral i spiritual. Si nan no a tene cuidao, contacto cu influencia insaludable gradualmente por a debilitá nan determinacion di ser un pueblo distinto, “un raza escogí, un sacerdocio real, un nacion santo, un pueblo pa un posesion special.”—1 Pedro 2:9.

Promé cu Pablo a skirbi e palabra di 2 Corintio 6:14-16, el a trata cu un problema serio den su rumanan corintio. Nan a permiti un caso di inmoralidad grosero existi den nan congregacion, p’sei Pablo a manda pa nan expulsa, of scomulga, e pecador no arrepentí. (1 Corintio 5:1) E malecho dje homber a demonstra cu mal asociacion of ocupacion sin vigilancia den e clima di inmoralidad di mundo por afecta hende cristian.

Cristian corintio tabatin cu evita asociacion cu e homber expulsá, pero esei kier men cu nan tabatin cu separánan henteramente for di hende no creyente? Nan tabatin cu evita casi henteramente tur contacto of tratamento cu hende no cristian, i bira un sorto di secta bibando den conbento, manera hudío cu a aparta pa biba den Qumran cerca Lamá Morto? Laga Pablo contestá: “Den mi carta mi a skirbi pa boso no sigi den compañía di fornicador, sin nifica henteramente cu fornicador di mundo . . . Di otro manera boso realmente mester sali for di mundo.”—1 Corintio 5:9, 10.

E nificacion dje palabra ta bisto. Pablo a reconoce cu hende cristian ta riba e planeta aki ainda, bibando i teniendo contacto casi diariamente cu hende no creyente cu tabatin moralidad baho i otro ley. Siendo cu esei tabata básicamente inevitable, hende cristian tin cu keda alerto ne peliger di tal contacto.

Awor, láganos considera di nobo e segunda carta di Pablo dirigí na corintio. El a bisa cu cristian ungí ta sirbidor capacitá di Dios, embahador sustituto di Cristo. El a bísanan vigila contra cualkier causa di trompicamento cu por duna mala fama na nan ministerio. (2 Corintio 4:1–6:3) Pablo a urgi su rumanan corintio directamente, cu tabata manera su yiunan spiritual, pa ampliá nan cariño. (2 Corintio 6:13) Despues di esei, el a urgi: “No bira uní bao di yugo desigual cu hende no creyente.” El a usa un serie di contraste retórico pa enfatizá e punto.

E contexto ta mustra cu Pablo no a enfoca riba un cierto aspecto di bida, tal como negoshi of empleo, ni no a declara un regla formal pa ser poní na vigor en cuanto dje. Mas bien, el a duna conseho amplio, sano, i útil ne rumanan cu el a stima hopi.

Por ehempel, e conseho ta aplica den e caso di un hende cristian cu ta interesá den casamento? Siguramente. Den su promé carta, apóstol Pablo a conseha corintio cu kier a casa pa haci esei “solamente den Señor.” (1 Corintio 7:39) El a enfatizá e sabiduría di su palabra cu loke el a skirbi despues, segun 2 Corintio 6:14-18. Si un hende cristian ta considera casamento cu hende cu no ta un sirbidor di Jehova Dios ni no ta un sigidor di Cristo, nan ta ser considerá como enlazá cu un hende no creyente. (Compara cu Levítico 19:19; Deuteronomio 22:10.) Claramente, e falta fundamental di armonía por aumenta e posibilidad di problema, incluyendo problema spiritual. Por ehempel, hende no creyente por sigi tras di adoracion di dios falso sea awor of den futuro. Pablo a puntra: “Cua armonía tin entre Cristo i Belial?”

Sin embargo, kico di un otro aspecto di bida—drentamento den un negoshi cu hende no creyente? Den algun caso hende cristian por kere cu pa nan gana nan pan i cuida nan famía ta necesario pa nan drenta den relacion comercial cu hende cu no ta cristian. (1 Timoteo 5:8) Considera loke ta simplemente ehempel:

Hende cristian por deseá di habri un negoshi di bende un cierto clase di mercancía, pero e único manera pa haci esei ta door di acepta como socio un hende cu tin acceso ne producto of fondo necesario. Otro hende cristian kier bira agricultor (of cria un cierto raza di bestia), pero siendo cu nan no tin terreno disponibel, nan mester hacié en conhunto cu hende cu tin terreno pa huur pa un parti di cualkier ganashi. Kizás un otro cristian no por bira plomero pasobra e gobierno ta duna un poco vergunning so, i nan a parti tur eseinan caba; e único manera pe cristian bira plomero ta di haci conbenio cu un pariente no creyente cu tin vergunning.—Marco 12:17.

Eseinan ta ehempel so. Nos no ta purba di mencioná tur posibilidad, ni saca declaracion di aprobacion ni di desaprobacion. Pero, cu tal ehempel presente, nos por mira pakico nos no mag pasa por halto dje conseho den 2 Corintio 6:14-18?

Hende cristian cu ta drenta den un negoshi cu hende no creyente, sea cu nan ta pariente of no, por wel contra cu problema of tentacion inesperá. Por tá cu e socio ta conclui cu e único manera pa haya ganashi razonabel ta di no informá tur entrada of empleá trahador sin tene cuenta legal di nan ni di nan sueldo, aunque esei ta viola ley di gobierno. E por keda dispuesto di paga transportador bao man pa mercancía pa locual no tin factura. Hende cristian por tene parti den esei of otro trato similar faltando onradez? I kico hende cristian por haci ora nan dos tin cu firma formulario di belasting of otro documento legal tocante con nan a haci nan negoshi?—Éxodo 23:1; Romano 13:1, 7.

Of un socio no creyente den e negoshi kier bende artículo relacioná cu dia di fiesta pagano, manda tarheta di pascu den nomber dje negoshi, i pone adorno pa celebra fiesta religioso. Pablo a puntra: “Cua acuerdo e tempel di Dios tin cu ídolo? Pasobra nos ta e tempel di un Dios bibo.” Ki apropiado ta e sigiente comentario: “‘“P’sei, sali for di den nan, i separa boso,” Jehova ta bisa, “i no mishi cu cos impuro”’; ‘“i lo mi recibi boso.”’”! (2 Corintio 6:16, 17) Den nan aplicacion di tal conseho sabí, hopi hende cristian ta scoge cierto clase di trabao seglar cu ta exponénan na asina poco problema potencial posibel.—Hebreo 13:5, 6, 18.

E congregacion no ta ser mandá pa vigila of investiga tur loke hende cristian ta haci den nan trabao seglar, sea como empleado of como doño di negoshi. Naturalmente, si ta sali na cla cu hende cristian ta participa den malecho, tal como promove adoracion falso of algun forma di gañamento of ladronicia, e congregacion tin cu dal paso pa mantene norma di Jehova Dios.

Sin embargo, e punto clave ta cu e conseho inspirá di Pablo, “No bira uní bao di yugo desigual cu hende no creyente,” por yuda hende cristian evita problema i cualkier accion hudicial di parti di anciano. Cristian sabí ta tuma tal conseho na pecho i no ta decidi di drenta den situacion unda nan lo ser bao di mas presion pa compromete principio bíblico. Si un cristian ta kere cu e mester drenta den negoshi cu hende no creyente, otronan no mester ta lihé pa huzga of critica, reconociendo cu e tin cu wanta e responsabilidad di su decision. Básicamente, Pablo no a declara un regla formal, pa pone na vigor, contra drentamento den negoshi cu hende no creyente. Sin embargo, nos no mag ignora su conseho. Dios a inspira e conseho i tabatiné skirbí den e Bijbel pa nos beneficio. Nos ta sabí si nos ta apliqué.