Tuma Inisiativa pa Yuda un Kasá Ku No Ta Testigu
1 Tin publikadó den bo kongregashon ku nan kasá no ta Testigu? Sin duda, e publikadónan ei lo a deseá mashá pa nan kasá uni ku nan den adorashon berdadero. Pero no ta nan so ta deseá esei. Meskos ku Dios, henter e kongregashon ta deseá pa “tur [klase di] hende wòrdu salbá i yega na konosementu di e bèrdat.” (1 Tim. 2:4) Kon nos por hasi esfuerso pa siña konosé e kasánan ku no ta Testigu?
2 Promé, nos tin ku purba mira kosnan for di e punto di bista di e kasá ku no ta Testigu. Hopi di nan ta stima nan famia i ta deseá di ta un bon kasá i un bon tata òf mama. Kisas nan ta sinsero den nan kreensianan religioso ku ta diferente for di esnan di nos. Podisé loke nan sa tokante Testigunan di Yehova ta solamente loke nan a tende for di amigunan ku ta mal informá òf ku tin prehuisio. Algun di nan no ta kontentu ku awor nan kasá ta usa parti di e tempu ku anteriormente nan tabata pasa huntu komo famia pa su adorashon. Un mihó komprondementu ta yuda nos trata e persona no kreyente ku rèspèt i evitá di ta demasiado nèrvioso ora nos ta den su presensia.—Pro. 16:20-23.
3 Mustra Interes Personal: E mihó manera pa gana un kasá no kreyente den e bèrdat, a lo ménos na promé instante, ta pa medio di nos aktonan, i no mediante kòmbersashon bíbliko. (1 Ped. 3:1, 2) P’esei ta masha importante pa nos mustra interes personal. Rumannan muhé por mustra interes personal den un esposa no kreyente, i rumannan hòmber den un esposo no kreyente. Kon?
4 Si ainda bo no konosé e kasá no kreyente, bo por hasi esei despues di konsultá ku e kasá Testigu. No keda desapuntá si e partner no kreyente reakshoná sin entusiasmo. Nos aktitut amigabel i e interes personal ku nos a mustra por motiv’é pa kambia su punto di bista tokante Testigunan di Yehova. (Rom. 12:20) Algun kristian madurá a invitá un kasá no kreyente ku su famia pa bin kome, ku e meta pa siña konosé otro mihó i kita kualke prehuisio ku por tin. Nan a papia tokante kosnan ku ta interesá e kasá no kreyente, en bes di fòrsa pa tene e kòmbersashon riba kosnan spiritual. Mas despues, ora ku e kasá no kreyente ta sintié mas kómodo, kisas por kuminsá kòmbersá riba tópikonan bíbliko kuné. Òf podisé lo e bai di akuerdo pa bini un di nos reunionnan p’e mira kiko su kasá ta siña, spesialmente awor ku e konosé algun ruman di e kongregashon. Asta si e no ta kla ainda pa siñá konosé e bèrdat, nos por elogi’é pa e apoyo ku e ta duna su kasá Testigu.
5 Spesialmente e ansianonan mester hasi esfuerso pa konosé e kasánan ku no ta Testigu i ta alerta pa oportunidat ku por presentá pa duna testimonio. Un persona no kreyente ku no tabata mashá reseptivo pa tópikonan bíbliko kisas lo ta dispuesto pa skucha palabranan di animashon for di Beibel ora ku e ta den hospital òf ora e tin problema serio ku salú. Si un famia dividí ta pasando den momentonan hopi difísil, tal komo morto di un miembro di famia, ansianonan por invitá e kasá no kreyente pa e tambe ta presente ora nan ta duna e famia konsuelo.
6 Imaginá bo e goso ku un ruman den nos kongregashon lo sinti si su kasá reakshoná faborablemente i bini den bèrdat! E okashon felis ei lo ta un gran goso pa Yehova, e angelnan i e restu di e kongregashon. (Luk. 15:7, 10) Di otro banda, si na promé instante un kasá no kreyente no reakshoná faborabel, tòg nos por ta kontentu ku nos esfuersonan kontinuo lo agradá Yehova, kende “no kier pa ningun hende bai pèrdí, ma pa tur bin na repentimentu.”—2 Ped. 3:9.
[Preguntanan di Estudio]
1. Dikon no ta e kristiannan den famia dividí so ta deseá di yuda nan kasá ku no ta Testigu aseptá e bèrdat?
2. Dikon un mihó komprondementu ta esensial si nos kier yuda un kasá no kreyente?
3. Kua ta e mihó manera ku nos por gana un kasá no kreyente?
4. Kon nos lo por mustra interes personal?
5. Kon ansianonan por siña konosé un kasá no kreyente?
6. Pakiko nos tin ku hasi esfuerso pa siña konosé e kasánan ku no ta kreyente?
[Komentario na página 6]
E mihó manera pa gana un kasá no kreyente den e bèrdat, a lo ménos na promé instante, ta pa medio di nos aktonan, i no mediante kòmbersashon bíbliko