Kon pa Enfrentá e Reto di Prediká na Hende Hòmber
1. Kiko nos tin mester di dje urgentemente pa por atendé interesnan di Reino?
1 Segun ku e obra di Reino ta sigui krese den e último dianan akí, nos tin mester di hòmbernan kualifiká pa hiba delantera urgentemente. (Mar. 4:30-32; Echo. 20:28; 1 Tim. 3:1-13) Sinembargo, na algun lugá mas hende muhé ta aseptá e mensahe di Reino ku hende hòmber. Den algun kultura, hende hòmber ta haña ku ta nan esposa ta responsabel pa duna instrukshon religioso na nan yunan i pa atendé asuntunan spiritual. Kon nos por animá mas hende hòmber pa bira konsiente di nan nesesidat spiritual i uni ku nos den adorashon berdadero?
2. Kon e esfuerso di Pablo i di Pedro pa prediká na hende hòmber a duna bon resultado?
2 Enfoká Riba Hende Hòmber: Ora un kabes di kas aseptá e bèrdat, hopi biaha e ta influensiá otro hende den e famia pa uni huntu kuné den adorashon puru. Por ehèmpel, ora Pablo ku Silas tabata den prizòn pa motibu di nan predikashon, nan a prediká na un wardadó di prezu. E hòmber ei i tur e hendenan di su kas a batisá. (Echo. 16:25-34) Komo resultado di e predikashon di Pablo na Korinto, “Crispo, e lider di snoa, a kere den Señor huntu ku tur e hendenan di su kas.” (Echo. 18:8) Yehova a usa Pedro pa prediká na Cornelio, un ofisial di ehérsito deskribí komo “un hòmber deboto ku tabata teme Dios.” Cornelio, huntu ku su famia- i amigunan íntimo, a batisá.—Echo. 10:1-48.
3. Imitando Felipe, na ken “den outoridat,” òf puesto haltu, bo por prediká?
3 Si nos prediká na hende hòmber “ku ta den outoridat,” òf puesto haltu, esei por tin efektonan di largu alkanse. (1 Tim. 2:1, 2) Por ehèmpel, e angel di Yehova a konsehá Felipe pa papia ku “un ofisial di korte,” kende tabata enkargá ku tur e tesoronan di e reina di Etiopia. Felipe a tende e hòmber “lesa profeta Isaias,” i el a splik’é e bon notisia tokante Hesus. E etiopio akí a bira un disipel i probablemente a plama e bon notisia ora el a sigui riba kaminda pa su pais. Kisas el a prediká tambe na e reina i otro hende den palasio, personanan ku di otro manera lo no a haña masha chèns di tende e bon notisia.—Echo. 8:26-39.
4. Kon nos por duna hende hòmber mas oportunidat pa tende e bon notisia?
4 Kon pa Haña Kontakto ku Mas Hende Hòmber: Ya ku den dia hende hòmber hopi biaha ta na trabou, lo bo por adaptá bo programa pa pasa mas tempu den sirbishi parti anochi, den fin di siman òf durante dianan di fiesta? Dor di traha regularmente den teritorio di negoshi, nos por haña mas oportunidat pa prediká na hende hòmber ku masha poko biaha sa ta na kas. Ruman hòmbernan por hasi èkstra esfuerso tambe pa prediká informalmente na nan koleganan maskulino. Den sirbishi di kas pa kas, foral den teritorio trahá ku frekuensia, ruman hòmbernan de bes en kuando por pidi pa papia ku e tata di kas.
5. Kiko un ruman muhé mester hasi ora un hende hòmber reakshoná faborablemente riba e mensahe di Reino?
5 Ora un ruman muhé papia ku un hende hòmber i e reakshoná faborablemente riba e bèrdat, e ruman muhé no mester bai rebishit’é su so. E por bai ku su esposo òf ku un otro publikadó. Por lo general ta mihó pa pasa e rebishita pa un ruman hòmber kualifiká si e hòmber sigui mustra interes.
6. Kon nos por imitá apòstel Pablo pa asina ‘gana mas hende ainda’?
6 Skohe Tópiko Ku Ta Interesá Hende Hòmber: Apòstel Pablo a tuma su oyentenan na kuenta i a adaptá su manera di aserká nan pa e por a ‘gana mas hende ainda.’ (1 Kor. 9:19-23) Asina tambe, nos tin ku pensa ki tópiko probablemente lo interesá e hende hòmbernan ku nos ta topa i prepará di akuerdo ku esei. Por ehèmpel, hende hòmber hopi biaha ta preokupá tokante problema ekonómiko, bon gobernashon i kon pa atendé e siguridat di nan famia. Podisé nan ta interesá tambe den e propósito di bida, e futuro di nos planeta i pakiko Dios ta permití sufrimentu. Si nos introdukshon ta reflehá tal perspikasia, lo tin mas chèns ku nan ta aseptá nos presentashon di e mensahe di Reino.—Pro. 16:23.
7. Kon tur hende den kongregashon por tin un bon efekto riba un esposo no-kreyente ku asistí na reunion?
7 Tuma e Inisiativa pa Yuda Esposo Ku No Ta Kreyente: Ounke hopi biaha ta e bon kondukta di nos ruman muhénan kristian tin e mayor influensia riba nan esposo no-kreyente, miembronan di e kongregashon tambe por tin un bon efekto riba nan. (1 Ped. 3:1-4) E bonbiní kaluroso ku un hende hòmber no-kreyente ta haña ora e bini reunion huntu ku su kasá, lo ta un gran testimonio p’e. E solo echo ku el a bini, ya ta indiká ku e tin sierto grado di interes den e bèrdat, i kisas e ta dispuesto pa aseptá un estudio di Beibel.
8. Kon ruman hòmbernan por tuma e inisiativa pa yuda esposonan no-kreyente ku no ta mustra masha interes den e bèrdat?
8 Di otro banda, tin esposo ku na prinsipio no ta mustra masha interes den kosnan spiritual, pero kendenan ku tempu por ta dispuesto pa papia tokante Beibel ku un ruman hòmber ku nan ta sinti nan kómodo kuné. Den un kongregashon, ora ku de bes en kuando e ruman hòmbernan tabata bishitá un famia dividí den sentido religioso, nan tabata hasi esfuerso spesial pa papia ku e esposo ku no tabata kreyente. Esaki ku tempu a hiba na kòmbersashonnan spiritual, i awor e esposo ta un Testigu batisá. Den un otro kaso, un ruman hòmber a yuda un esposo amabel no-kreyente traha un kurá rònt di su kas. E manera akí di mustra interes personal a hiba na un estudio di Beibel. (Gal. 6:10; Fil. 2:4) Si bo ta un ruman hòmber kristian, pakiko no tuma e inisiativa pa yuda ún òf mas di e esposonan no-kreyente akí?
9. Ki resultado entrenamentu di hòmbernan kristian por tin?
9 Entrená Nan pa Futuro: Hende hòmber ku aseptá e mensahe di Reino i hasi esfuerso pa kualifiká pa privilegio den e sirbishi di Yehova, ku tempu por ta entre e “donnan na hende,” esta, ansianonan kristian ku ta usa nan abilidatnan i puntonan fuerte na fabor di e kongregashonnan di e pueblo di Yehova. (Efe. 4:8; Sal. 68:18) Hòmbernan asina ta pastoriá e kongregashon boluntariamente i ku hopi afan. (1 Ped. 5:2, 3) Ki un bendishon nan ta bira pa henter e asosiashon di ruman!
10. Kon e esfuerso di Ananias pa yuda Pablo a benefisiá hopi hende?
10 Por ehèmpel, Saulo a bira “apòstel di e paganonan,” ounke un tempu e tabata persiguidó di e kristiannan. (Rom. 11:13) P’esei disipel Ananias na promé instante no tabata masha dispuesto pa prediká na Saulo. Sinembargo, Ananias a sigui e instrukshon di Señor i a papia ku e hòmber ku despues a bira apòstel Pablo. Atraves di añanan, e ministerio di Pablo a benefisiá e míles di hendenan ku a tend’é prediká i tambe e miónes ku ta sigui benefisiá di su kartanan inspirá ku nos ta haña den e Palabra di Dios.—Echo. 9:3-19; 2 Tim. 3:16, 17.
11. Dikon nos tin ku hasi kualke ahuste nesesario pa prediká na hende hòmber?
11 P’esei, laga nos hasi kualke ahuste nesesario pa nos por enfrentá e reto di prediká na hende hòmber. Segun ku nos ta sigui tras di e meta akí, nos por tin sigur ku Yehova lo bendishoná nos esfuerso diligente pa hasi su boluntat i pa perkurá bon pa interesnan di Reino.