Pakico Tin Aumento di Ladronicia?

RIO DE JANEIRO—Djadumingu, 18 di october, 1992. E playanan famoso di Copacabana i Ipanema ta yen di hende. Diripiente, banda di hóbennan ta invadí e playanan, bringando entre nan mes i hortando cualkier cos di balor fo’i hende n’e playa. E cantidad limitá di polis ta para mira—incapas pa yuda. P’e cariocanan i e turistanan, e ta un nachtmerrie di dia cla.

En realidad, crímen enbolbiendo propiedad a bira comun. Den stadnan grandi, ta conocí cu ladronnan ta horta hóbennan—i tin biaha asta ta mata nan—pa haña nan kedsnan. Ladron ta cana drenta cas sea tin hende na cas of no. Criá di cas desonesto, despues di haña sa unda cosnan ta wardá den e cas, ta horta hoya i placa, despues ta desparcé. Hopi hende ta sakea negoshinan. Gruponan bon-organisá asta ta horta hende, manera por ser mirá den e aumento di secuestronan na Brazil. I probablemente lo bo por duna otro ehempelnan di bo mes experencia of for di loke a sosodé den bo comunidad. Pero pakico asina tantu ladronicia?

Pakico Hende Ta Horta?

Aunke aumento di pobresa i uso di droga ta e dos motibunan principal, e contesta no ta asina evidente. The New Encyclopædia Britannica ta observá: “Hende a bandoná e búskeda pa un solo causa di crímen como infructífero.” Sin embargo, e mesun obra ta sugerí cu problemanan manera ladronicia “por ser atribuí directamente na hóbennan su sintimentu di inutilidad i rencor debí cu nan ta ser excluí for dje logronan material i recompensanan di un bida normal.” Sí, pa motibu dje presion tremendo pa cumpra producto di consumo, hopi no ta mira manera pa obtené e cosnan cu nan ta deseá, sino ta dor di horta.

No obstante, interesantemente The World Book Encyclopedia ta splica: “E proporcion di criminalidad ta permanecé relativamente stabil den sociedadnan tradicional unda hende ta kere cu nan moda di biba lo continuá. Proporcion di criminalidad tin tendencia di subi den sociedadnan unda cambionan rápido ta tuma lugá den caminda hende ta biba i loke nan ta haci pa gana nan pan di cada dia—i den nan speransanan pa nan futuro bienestar.” E encyclopedia ta agregá: “Hende hóben tin ménos oportunidad di haña trabou. Trabou pa esnan inexperto cu ta disponibel ta parce laf ora compará nan cu e ganashinan lihé i excitante for di ladronicia. Hende hóben ta mas dispuesto tambe pa core rísico di ser arestá debí cu nan tin ménos di perde.”

Tog, hopi persona desempleá of cu tin trabou cu salario abou no ta horta, miéntras cu gran cantidad di empleado di oficina of obrero ta grap cos na trabou como si fuera esei ta parti di nan salario. En realidad, pa algun práctica fraudulento, un cierto posicion social ta necesario. Bo no a tende di scandalnan enbolbiendo enorme cantidad di placa den cua esnan implicá tabata político, empleado público i comerciantenan? No cabe duda, no ta hende pober so ta horta.

Corda tambe, cu película i programa di television hopi biaha ta haci hortamentu un chansa (e héroe kisas asta ta un ladron), locual tin tendencia di haci ladronicia mas aceptabel. Ta cierto cu wakmentu di eseinan por ser catalogá como entretenimentu, pero na mesun tempu, e auditorio ta ser mustrá con pa horta. Esei no ta transmití sutilmente e idea cu crímen talbes ta balapena? Indudablemente, golosidad, flohedad i e pensamentu cu tur hende ta horta sin haña castigu, tur ta contribuí n’e aumento di ladronicia. Inegablemente, nos ta biba den e “tempu crítico” profetisá ora egoismo i amor pa placa ta prevalecé.—2 Timoteo 3:1-5.

Bo No Mester Horta

Apesar dje balornan trocí di mundu, ta vital pa obedecé e mandamentu: “Laga esun cu ta horta no horta mas.” (Efesio 4:28) Un persona cu ta duna demasiado balor na posesion of placer por gaña su mes keriendo cu ladronicia ta bal e rísico. Pero hortamentu ta serio den bista di Dios i e ta revelá un falta di amor pa bo próhimo. Ademas, asta ladronicia insignificante por haci un persona su curason bira duru. I kico dje echo cu bo ta ser considerá como desonesto? Ken lo confia un ladron? Sabiamente, e Palabra di Dios ta bisa: “No laga ningun di boso sufri como asesino of ladron of malechor.”—1 Pedro 4:15.

Siguramente bo ta lamentá e aumento di ladronicia, pero con hende ta haci biba den áreanan caminda crímen ta prevalecé? Con algun persona cu antes tabata ladron a cambia nan estilo di bida? Ladronicia lo caba un dia rond mundu? Nos ta invitá bo pa lesa e siguiente artículo, “Un Mundu Sin Ladron.”