Un Mundu sin Ladron

EL A sosodé asina lihé. Un homber bon-bistí a pone un revólver na cabes di Antonio dilanti su cas na São Paulo, Brazil, a exigí yabi i documento di su auto, i a dera trot bai lihé.

Na Rio de Janeiro, dilanti bista di su yu muhé di dies aña, cuater homber bon-armá a dominá un homber yamá Paulo. Anto, despues di a core yega su cas, e ladronnan a drenta i horta loke nan tabata kier, yenando e dos autonan di Paulo. Menasando casá di Paulo cu morto, nan a bai cuné huntu cu un empleado como rehen n’e hoyeria di Paulo den centro di stad, den cua nan a horta tur cos di balor bai cuné. Sin embargo, inesperadamente, e ladronnan a yama despues na telefon bisa unda nan a laga e autonan.

Ki un consternacion pa ser hortá di placa i posesion cu bo a acumulá cu sodó di bo frenta! Aunke ni Antonio ni Paulo a tuma ley den nan man, otronan sí ta haci’é. Nan por pone e ladron paga caru p’e, of kisas nan ta perde nan mes bida. Por ehempel, ora un hóben a ranca oloshi di un muher brazileño indigná, el a saca un revólver for di su tas i tira e ladron, matand’e. E resultado? O Estado de S. Paulo ta informá: “E personanan cu tabata testigu dje incidente a elogiá e actitud dje muher desconocí, i ningun hende kier a yuda polis identifik’é.” Aunke cristiannan ta anhelá un mundu sin ladron, nan no ta venga manera e muher a haci. Ya cu vengansa ta pertenecé na Dios, nan ta obedecé e palabranan na Proverbio 24:19, 20: “No mustra boso mes di ta calentá contra e malechornan. No bira envidioso di hende malbado. Pasobra lo no resultá di tin futuro pa ningun persona malu.”

Pero si bo ser atacá, kico bo por haci? Un incidente na Rio de Janeiro ta mustra con importante ta pa keda calmu. Un cristian kende nos lo yama Heloisa tabata riba caminda den bus pa bai conducí un studio bíblico. Dos homber a cuminsá horta e pasaheronan. Ora e bus a yega n’e parada caminda Heloisa mester a baha, el a bisa nan cu e ta un Testigo di Jehova i cu e tabata bai conducí un studio bíblico. El a mustra su Bijbel i buki di studio. Sin hort’é, e ladronnan a dun’é permit p’e baha. Sin embargo, un otro pasahero no a ser permití pa baha. E shofer a bisa despues cu nunca el a yega di mira un cos asina.

Regina tambe a keda calmu ora el a ser ordená dor di dos homber armá pa drenta su auto. Mustrando su copia personal dje revista ¡Despertad!, Regina a duna un testimonio. Ya cu e ladronnan tabata nervioso, el a puntra nan pa habri e ‘dashboard’ unda e tabatin algun mangel wardá. Pero ora nan a mira e casetnan di Melodianan di Reino, nan a cuminsá scucha e música ei. E atmósfera a bira mas amical i e ladronnan a dicidí di laga Regina sin daño riba caminda grandi, sigurand’e cu lo e haña un persona bondadoso yud’é. Despues di a cana pa dies minut, el a haña un cas, pero e doño dje cas no por a kere su historia, bisando: “Bo no ta parce di a ser atacá; bo ta asina calmu.”

Aunke un víctima por sali físicamente ileso, un experencia traumático asina por tin su consecuencianan serio. ‘E víctima por bira insigur, odioso pa cu miembro di famia of esnan cu ta purba yud’é, incapas pa confia otro hende, obsesioná cu organisá detaye i por sinti cu e mundu ta inhustu,’ O Estado de S. Paulo ta informá. Na contraste, un víctima cu ta confia den Jehova Dios tin mas probabilidad di pasa dor dje experencia físicamente i emocionalmente ileso. Apesar di esei, bo no ta di acuerdo cu lo ta un bendicion si no tabatin mas crímen ni nada cu ta causa temor?

“Laga Esun cu Ta Horta No Horta Mas”

Aunke hopi ta preferá nan estilo di bida golos, e Palabra di Dios a yuda hende cu ta ladron cambia nan deseonan i personalidadnan. (Efesio 4:23) Teniendo un propósito real den bida i basá riba Bijbel, nan ta tuma na pechu e palabranan: “Mihor ta un poco cu husticia cu un abundancia di producto sin rectitud.” (Proverbio 16:8) Claúdio ta conta: “Casi tur hende den mi famia tabata Testigo, pero mi nunca a scucha na loke nan tabatin di bisa tocante Jehova i su propósitonan. Regresando for di un biahe di casi 2.000 km den un pikop hortá, mi mester a pasa hopi punto di control di polis. Den e proceso mi a realisá cu mi mester cambia mi bida. Mi a purba haci esei mas promé pero sin éxito. E biaha aki mi a cuminsá pensa riba mi famianan cu ta Testigo di Jehova i ki diferente nan ta, teniendo goso, felicidad i pas.” Como resultado, Claúdio a cuminsá studia e Palabra di Dios, a bandoná droga i su amigunan bieu, i a bira un minister cristian.

Otronan tambe ta tuma na pechu awor e palabranan: “No pone bo confiansa den defraudamentu, ni bira bano den puru robo.” (Salmo 62:10) Despues di un sentencia di prison pa intento di homicidio durante un ladronicia, José, un adicto na droga i narco-traficante, a beneficiá di un studio di Bijbel cu su swá. El a stop di usa i bende droga i awor e ta un Testigo celoso.

Sin embargo, un personalidad nobo no ta presentá instantáneamente of milagrosamente. Oscar, kende tabata profundamente enbolbí den droga i ladronicia, ta conta: “Mi a haci oracion asina fervientemente na Jehova cu e vloer hopi biaha a parce di bira un lago chikitu cu mi hopi lágrimanan.” Sí, ademas di studio diligente dje Palabra di Dios, oracion persistente i di curason ta necesario. Nota e sabiduria den e observacion piadoso aki: “No duná mi ni pobresa ni rikesa. Lagá mi devorá e cuminda prescribí pa mi, pa mi no bira satisfecho i realmente nengá bo i bisa: ‘Ken ta Jehova?’ i pa mi no bai para den pobresa i realmente horta i asaltá e nomber di mi Dios.”—Proverbio 30:8, 9.

Egoismo mester ser reemplasá pa amor berdadero: “Laga esun cu ta horta no horta mas, sino mas bien lagu’e haci trabou duru, haciendo cu su mannan loke ta bon trabou, p’e por tin algu pa parti cu un hende den necesidad.” (Efesio 4:28) Mescos cu den e caso di algun cristian di promé siglo kendenan anteriormente tabata ‘ladron of personanan golos,’ Jehova, mediante e rescate di Jesucristo, misericordiosamente ta pordoná esnan cu ta repentí. (1 Corintio 6:9-11) Ki consolador ta cu sin importá nos pasado, nos por cambia nos estilo di bida i obtené e fabor di Dios!—Juan 3:16.

Siguridad den e Mundu Nobo di Dios

Imaginá un tera sin ladron. Lo bo no tin mester di un sistema costoso pa garantisá cumplimentu cu ley, consistiendo di hues, abogado, polis i prison! Lo ta un mundu próspero den cua cada un lo respetá otronan i nan propiedad! Esei ta parce increibel? Dios lo intervení realmente den asuntunan humano i caba cu maldad? Nos ta invitá bo pa examiná e evidencia cu Bijbel ta e Palabra di Dios i cu su profecianan ta confiabel. Lo bo haña un fundeshi sólido pa confiansa cu un cambio ta tras di porta. Ningun persona por stroba Jehova di trece e alivio primintí na tur cu ta stima husticia: “No mustra boso mes di ta calentá contra e malechornan. No bira envidioso di esnan cu ta haci inhusticia. Pasobra mescos cu yerba nan lo marchitá rápidamente, i mescos cu yerba berde nobo nan lo desvanecé.” (Salmo 37:1, 2) E palabranan ei skirbí hopi tempu pasá pronto lo ser cumplí completamente.

E Reino di Dios lo caba cu miseria i inhusticia, cua ta causa asina tantu desesperacion i insiguridad. Ningun hende lo ta den necesidad, sintiendo presion pa horta. Nos ta haña siguransa den e profecia: “Lo yega di tin abundancia di grano riba tera; riba top dje cerunan lo tin un sobreabundancia. Su fruta lo ta mescos cu den Líbano [di antigua], i esnan cu ta for dje stad lo florecé manera vegetacion dje tera.” (Salmo 72:16) Realmente, den e Paradijs restorá, nada lo stroba e pas di hende cu ta conocé i adorá e Dios berdadero.—Isaías 32:18.

Ki un recompensa esei lo ta pa a resistí e caminda dje mundu golos aki! Proverbio 11:19 ta bisa: “Esun cu ta mantené su mes firmemente na fabor di husticia ta den fila pa bida, pero esun cu ta core tras di loke ta malu ta den fila pa su propio morto.” Sí, despues cu e malbadonan ser cortá, ningun persona lo tin motibu pa teme pa su bida of propiedad. Salmo 37:11 ta duna nos e promesa aki: “E mansunan mes lo poseé e tera, i nan en berdad lo haña nan deleite exkisito den e abundancia di pas.”

[Box on page 5]

Enfrentando e Realidad di Ladronicia

NA CAS—Siendo cu ladronnan por invadí bo cas sea cu bo ta na cas of no, tene portanan cerá i na yabi. Expertonan ta recomendá pa bo tin alarma of un cachó pa cuida cas. Informá un bisiña confiabel ora bo ta bai cu vacansi. Keda calmu—ladronnan ta actua lihé, inesperadamente i por cambia plan inmediatamente si nan bira nervioso. Si bo ta un Testigo di Jehova, identificá bo mes como tal i purba duna un testimonio. Kisas bo por crea un disposicion favorabel of simpatia. No resistí aménos cu bo ser atacá físicamente.

DEN PUBLICO—Sea alerto pa nota si un hende ta siguiendo bo. Cana meimei di acera. Evitá cayanan scur i bandoná. Carga bo tas i otro cos di balor duru tené. Cana dicididu como si fuera bo ta bayendo un caminda. Evitá di bisti paña caru of prenda briyante. Haci compra cu un compañé ora condicionnan ta hustificá esei. Cana cu solamente e placa cu bo mester, partí den varios sacu of lugá.

DEN AUTO—Si kitamentu di auto di hende a bira comun den bo área, no keda sinta den bo auto di parkeer. Cambia bo ruta ora di bai of bini for di trabou. Tuma un caminda mas sigur, asta si e ta un tiki mas largu. Promé cu bo parkeer, wak rond si bo no ta mira nada sospechoso. Evitá di habri baul na un lugá bandoná. No laga artículonan di balor visibel den e auto. Un cadena na yabi cu ta visibel of cualkier otro artefacto anti-ladron por desanimá ladronnan casual.

[Box on page 6]

“Stop di acumulá pa boso mes tesoro riba tera, unda mot i frustu ta come, i unda ladron ta kibra drenta i horta. Mas bien, acumulá pa boso mes tesoro den cielu, unda ni mot ni frustu ta come i unda ladron no ta kibra drenta i horta.”—Mateo 6:19, 20