Na ki Tempu Miedu Lo Caba?

LO SORPRENDE bo pa sa cu berdadero siguridad tin di haber cu un homber cu a biba 2.000 aña pasá? Mustrando e necesidad pa tin amor, Jesucristo a conta un ilustracion remarcabel: “Un cierto homber tabata bahando for di Jerusalem pa Jérico i a cai den man di ladronnan, cu a kita tur cos for di dje i tambe a golpi’é, i a bai, lagand’e mitar morto.” Aunke dos biahero a ignorá e víctima, un samaritano amabel a mustra misericordia. Sin embargo, ken awe ta interesá den víctimanan di crímen? Ki alivio for di miedu nos por spera?​—⁠Lucas 10:​30-37.

Aunke hopi hende ta afirmá di ta kere den Dios, nan ta haña cu ta hende mester pone ley i órden na vigor. Pero castigunan di prizon mas pisá of mas polis i mihó salario pa nan lo pone un fin na crímen violento? Di berdad bo ta kere cu agencianan di mantené ley i órden, apesar di nan esfuersonan sincero pa percurá un midí di siguridad, lo eliminá tal cosnan manera abusu di droga, crímen organisá i pobresa? Sin embargo, nos hamber i sed pa husticia no mester ta en bano.​—⁠Mateo 5:⁠6.

Salmo 46:1 ta bisa: “Dios ta pa nos un refugio i fortalesa, un yudansa cu por ta hañá prontamente durante angustia.” Nos lo mira cu e palabranan aki no ta simplemente poesia bunita.

Manera bo sa, e medionan di noticia diariamente ta informá di matansanan pa loco den gueranan civil i atakenan terorista. Den algun parti di mundu, a bira algu comun pa exterminá hóbennan no-deseá of testigonan ocular di crímen. Pakico bida a bira asina barata? Aunke por tin vários causa pa tal violencia, tin un motibu cu nos no mester pasa por haltu.

Segun e Palabra di Dios, e Bijbel, “henter e mundu ta drumí den e poder dje malbado.” (1 Juan 5:19) De facto, Jesucristo a identificá Satanas e Diabel no solamente como un mentiroso sino tambe como “un matador.” (Juan 8:44) Influenciando humanidad den vários manera, e criatura spiritual poderoso aki ta promoviendo e aumento den violencia awe. “Ai di e tera i di laman, pasobra e Diabel a baha cerca boso, mashá rabiá, sabiendo cu e tin un periodo corticu di tempu,” Revelacion 12:12 ta bisa. Sin embargo, felismente e sistema malbado aki lo ser reemplasá cu “cielunan nobo i un tera nobo . . . , i den esakinan husticia lo biba.”​—⁠2 Pedro 3:⁠13.

Ademas dje speransa maraviyoso aki di un mundu nobo, ki yudansa nos tin awor aki mes?

Promé cu wak na e contesta positivo di esei, ta bon pa corda cu asta cristiannan berdadero no tin ningun garantia cu nan lo ser protehá di crímen. Apostel Pablo a describí algun rísico cu e personalmente a enfrentá. El a yega di ta “den peliger di riu, den peliger di salteador, den peliger di [su mes] rasa, den peliger dje nacionnan, den peliger den stad, den peliger den mondi, den peliger riba laman.” (2 Corintionan 11:26) Tog Pablo a sobrebibí e peligernan aki. Ta mescos awe; dor di ser cauteloso, nos por cumpli tog cu nos tareanan mas normalmente posibel. Laga nos considerá algun cos cu lo yuda.

Si un persona ta bibando den un becindario peligroso, conducta excelente por ta un proteccion, ya cu hende ta observá otro hende djacerca. Aunke ladronnan ta planea i ehecutá crímennan, hopi di nan ta considerá nan mes di ta hende normal. Evitá di criticá loke nan ta haci i no trata na haña sa den kico nan ta enbolbí. Asina ei, bo por mengua e posibilidad cu abo ta bira e obheto di represaya. Tene na mente cu ladronnan ta trata na haña sa ken a cumpra algu nobo of ken ta bai cu vacansi i p’esei lo no ta na cas, pues sea discreto den loke bo ta revelá na otro hende.

Hopi Testigo di Jehova a ripará cu nan reputacion como minister a duna nan un grado notabel di proteccion. Criminalnan hopi bes a mustra cu nan ta respetá tal cristiannan, kende sin parcialidad ta duna di nan mes pa yuda hende den e comunidad. E Testigonan mes no ta asesino of ladron, ni nan no ta ‘mete den asuntunan di otro hende,’ pues no ta un menasa.​—⁠1 Pedro 4:⁠15.

Siguridad den e Mundu Nobo di Dios

Nos ta lamentá “e aumento di maldad” profetisá dor di Jesucristo, pero en bes di bira demasiado anshá, nos por tin confiansa cu Dios pronto lo eradicá e sistema malbado aki. Ademas di profetisá di un predicacion mundial di “e bon nobo aki di reino,” Jesus a recordá su siguidornan: “Esun cu a perseverá te na fin ta esun cu lo ser salbá.”​—⁠Mateo 24:​12-14.

Nos por ta sigur cu esnan cu ta haci otronan bira nan víctima, tin biaha cu un crueldad increibel, lo ser eliminá. Proverbionan 22:​22, 23 ta bisa: “No horta esun di condicion humilde pasobra e ta di condicion humilde i no machicá esun afligí den e porta. Pasobra Jehova mes lo defendé nan causa i siguramente lo e horta alma di esnan cu ta hortando nan.” Jehova lo eliminá malechornan, manera ladron, asesino i pervertidonan sexual. Ademas, lo e no ignorá e víctimanan di tal crímennan. Lo e surpasá nan pérdidanan i restorá nan salú completamente.

En berdad, esnan cu ta “apartá for di loke ta malu i ta haci loke ta bon” lo gana bida eterno sea dor di sobrebibí e binidero tribulacion grandi of dor di ser resucitá for di morto. “E hustunan mes lo poseé e tera i nan lo biba riba dje pa semper.” (Salmo 37:​27-29) Tal beneficionan lo ta disponibel debí na Jesus su sacrificio di rescate. (Juan 3:16) Pero con bida lo ta den e Paradijs restorá?

Bida bou dje Reino di Dios lo ta un berdadero placer. Jehova ta profetisá: “Mi pueblo mester biba den un lugá di habitacion pacífico i den residencianan di pleno confiansa i den lugánan di descanso sin disturbio.” (Isaías 32:18) Tur esnan cu ta gana bida eterno lo a ahustá nan personalidad. Ningun hende lo ta malicioso of inhustu, tampoco ningun hende lo ta un potencial víctima di un persona asina. E profeta Mikéas ta bisa: “Nan realmente lo sinta, cada un bou di su ramada di wijndruif i bou di su palu di figu, i lo no tin ningun hende pa pone nan tembla.” (Mikéas 4:4; Ezekiel 34:28) Ki un contraste cu e becindarionan peligroso djawe!

[Kuadro na página 6]

SEA CAUTELOSO

Hopi criminal ta ocupá cu nan actividadnan criminal tempu completo, haciendo crímen un ofishi. Nan tal bes ta traha den gruponan di dos of tres persona, asta si ta solamente un ta mek un skopet riba bo. Ta birando mas i mas evidente cu mas hóben e criminal ta, mas peligroso e ta. Kico bo por haci si bo bira un víctima?

Keda trankil pa bo no haci e ladron nervioso​—⁠su inexperencia por causa bo morto. Si bo ta un Testigo di Jehova, identificá bo mes como tal. Sin embargo, sea cla pa entregá loke e ladron kier. Si bo tarda, e peliger ta aumentá. Despues, kisas bo ta sinti cu ta ‘safe’ pa pidi bo papelnan di identificacion bek of cen pa paga bus bai cas.

Hopi bes bo no por dicerní ken ta un criminal. Algun ladron ta drogadictonan of criminalnan profesional, otronan simplemente kier cen pa cumpra cuminda. Di tur manera, no cana cu cantidad grandi di placa. Evitá di exhibí hoyas, renchinan di oro of oloshinan costoso. Cana i biaha normalmente, sin mustra miedu. No keda wak hende como si fuera bo kier identificá nan como sospechoso. Den caso di tiramentu riba caya, tira bo mes abou na suela; pañanan por ser limpiá despues.​—⁠Un ex-polis di Rio de Janeiro.

[Plachi na página 5]

Keda trankil i entregá loke e ladron kier. Si bo tarda, e peliger ta aumentá