Den Oriente i Occidente, Jehova ta fortalece su pueblo

DEN territorio unda e trabao di predica ta ser prohibí, den tera cu violencia ta desbarata, i den país unda prohibicion a wordu kitá recientemente—realmente, den henter e campo mundial—Jehova Dios ta sigi duna testigo di dje “poder cu ta mas ayá cu loke ta normal.”—2 Corintio 4:7.

Prosperidad bao di prohibicion

Den un grupo di isla di Oriente Lehano, e trabao di predica a ser prohibí pa 17 aña caba. E testigonan ta keda desanimá? Di ningun manera! Den Mei cu a pasa, nan a alcanza un máximo nobo di 10.756 publicador, di locual tin 1.297 cu ta sirbi como predicador di tempo completo. Segun cu e situacion di mundo ta empeora, e pueblo dje islanan ta keda cada bez mas incliná di scucha e berdad. P’sei nan tabata informa di 15.654 estudio bíblico conducí den cas di hende interesá. Mas promé, 25.397 hende a asisti na reunion celebrá clandestinamente pa conmemora e morto di Jesús.

Ora tabatin e celebracion di Asamblea di Districto “Siñanza Divino”—prudentemente atrobé segun circunstancia local—e rumanan a keda encantá pa recibi, den e idioma local, nan buki dje mesun literatura trahá na América. Traductor, corrector, i otro rumanan a traha tempo extra boluntariamente pa nan por prepara na ora e buki principal, cu su cientos di bladji. I un drukkerij seglar dispuesto pa coopera cu gusto a haci un trabao bonita dje drukmento i furamento. Esnan cu a asisti ne asamblea a keda encantá di recibi e buki, cu su serie di mas cu mil plachi na color. Hopi oficial di gobierno ta respeta Testigo di Jehova, i oposicion ta bini principalmente di clero di cristiandad. Nos ta spera cu pronto e prohibicion lo ser kitá.

Kico di América di Nort, Zuid, i Central?

Testigo di Jehova den tal país di Occidente ta uní cu nan rumanan den Oriente enfrentando nan problema cu curashi, i e spiritu santo di Jehova ta yúdanan vence situacion dificultoso. Por ehempel, considera e sigiente informe di un país latinoamericano unda grupo cu ta domina produccion i benta di droga ilegal ta pasa cu regularidad através di mondi tropical.

Un grupo di testigo a bai cu bus na un territorio isolá. Ora nan a baha for di bus, nan a tuma nota di un hanchi cu a sali for di pueblo. Pues, cinco ruman homber a bai pa mira unda e hanchi di tera a hiba, asignando ruman muher i mucha pa traha den e pueblo. Un ruman a bisa:

“Dos ora di camnamento a hiba na mashá poco cas. Anto, di ripiente ocho homber armá cu cara tapá a sali for di mondi. Algun tabatin metrayador i algun tabatin machete. Kico nos a encontra? Nos a cuminza puntra kico nan tabata kier, pero nan a bísanos keda ketu i no papia—solamente marcha padilanti. Nos a marcha! Dos ora mas di camnamento door di mondi tropical denso a híbanos na un cunucu cu claramente tabata un campamento armá. Warda cu scopet tabata na tur parti. Den e centro tabatin un cas bon trahá i nan a híbanos na dje.

“Asina cu nos a sinta, esun cu aparentemente tabata hefe dje campamento a papia cu nos. E tabata bon bistí, bon educá, i serio. El a indica uno di nos grupo di rumanan i a bisé lanta. Anto el a puntré: ‘Kico bo ta pensa di nos grupo?’ Tumando plenamente na cuenta unda nos tabata, e ruman a contestá: ‘Wel, nos sa di bo grupo, pero nos no tin ningun interés den dje, ni den ningun otro grupo político. E único motibo cu nos ta aki ta di predica tocante e Reino di Jehova Dios mediante Cristo Jesús. Pronto lo e destrui tur gobierno político dje sistema di cosnan aki i trece bendicion maraviyoso pe pueblo dje planeta aki den circunstancia paradísico—algo cu ningun hende ni grupo di hende por haci.’

“E actitud dje homber a cambia. El a cuminza haci pregunta. ‘Unda bo a siña tur esei? Con bo tabata prepará pa papia asina?’ Pa un ora i mei nos por a duna un bon testimonio tocante estado di mundo i mustra cu e Bijbel ta identifica e único speranza pa humanidad. Nos també a splica Romano capítulo 13—di cu nos ta obedece autoridad na mando, pero, ora cu tin conflicto entre e Palabra di Jehova i nan palabra, nos ta obedece nos Dios, Jehova, promé. Finalmente nos a ofrecé e bukinan cu nos tabatin. El a tuma tres di nan i un Bijbel i, pa nos gran sorpresa, a dúnanos un contribucion pa nan. El a bisa cu lo e lézanan.

“Sigientemente, e lider a siñala na un homber pa híbanos for dje campamento. Pronto nos tabata riba camina pa bolbe, agradiciendo Jehova pe victoria cu nos tabatin den un otro campo di testificacion.”

Den Africa desbaratá pa gera

Entre e Oriente Lehano i e Occidente Lehano tin e continente di Africa. Gera entre tribunan a conberti algun país na remolina di violencia. Den Liberia, un aumento den e gera civil a afecta profundamente e pueblo di Jehova. Na principio tabatin conflicto den e stad capital i rond di dje durante October i November di 1992. Anto, segun cu e gera a plama mas panort, congregacion henter tabata kibrá ora e rumanan a hui na mondi hunto cu e resto dje poblacion. Sin embargo, nan celo no a mengua. Mientras cu nan a hui, nan a predica, i esei a resulta den un testimonio grandi duná den e parti di mas remoto dje interior.

Un congregacion di rumanan cu a hui a traha un Salón di Reino temporario den centro di un plantashi di mata di rubber. Den un pueblo cerca e frontera dje gera, den dia e poblacion civil a hui na plantashi di rubber na tur banda pa scapa for di bomba di laira. Ruman local (incluyendo hopi publicador cu a hui dje capital, Monrovia) a organiza sirbishi di feld i tabata mirá cu regularidad predicando ne miles di hende scondí bao di mata di rubber! Ora un avion a yega cerca, e rumanan homber i muher a bula den hit cerca nan, i despues cu e peliger a pasa, nan a sigi duna testimonio.

Asombrosamente, apesar dje gera civil, e mas cu mil publicador di congregacion cu por a manda raport pe Sociedad, tabatin un promedio di 18,1 ora den e sirbishi di feld i a conduci 3.111 estudio bíblico mensualmente.

Den Africa durante e último cuater aña, restriccion riba e trabao di Testigo di Jehova tabata kitá den 18 país. I ki alegría! Dia 12 di Augustus, e prohibicion di Testigo di Jehova den Malawi cu tabata poní na October, 1967, tabata kitá. E predicacion clandestino dje bon nobo semper a prospera, pero awor e testigonan por a progresa den libertad, aunque nan tin cu spera e resureccion pa recibi di nobo hopi compañé stimá cu opresor a asesiná.

Den Mozambique, un pacto di paz a drenta na vigor riba dia 4 di October di 1992. Territorio cu nan no por a alcanza den pasado debí ne gera destructivo dje último dieseis aña ta ser trahá. Den e region di Carioco, nan a reestablece comunicacion cu 375 rumanan cu a perde tur contacto cu e organizacion durante e último siete aña. Nan a celebra un dia di asamblea special den Milange, e capital dje districto conocí na antes como e sitio di un concentrasicamp i centro pa “reeducá” Testigo di Jehova, hopi di locual tabata refugiado di Malawi. Un total sorprendiente di 2.915 hende a asisti, incluyendo e administrador dje stad, cu a duna bon acogida na Testigo di Jehova. Pues, loke tabata e centro di “reeducacion” a bira un centro pa siñanza divino pa un dia.

Un misionero a skirbi: “Un representante di UNHCR (Comisario Halto di Nacion Uní pa Refugiado) a haci un observacion interesante en cuanto nos rumanan cu a háyanan den campamento di refugiado den e Provincia di Tete. El a bisa cu Testigo di Jehova a organiza nan mes campamento, apartá for di otro grupo. El a bisa, ‘Nan campamento tabata e único cu tabata dirigí correctamente. Testigo di Jehova ta limpi, organizá, i educá,’ Anto el a ofrece di hibámi den avioneta cruzando e mondi pa mi mes mira. Di laira, e piloto a indica dos campamento. Uno tabata miserabel i sushi, cu cas di lodo trahá riba otro sin planeamento. E (campamento di Testigo di Jehova) tabata bon planeá, cu cas cu camina a separa for di otro. E casnan tabatin un aparencia limpi, cu curá bon barí. Algun asta tabatin ferf cu nan mes a traha. E piloto a puntra, ‘Segun bo opinion, cua ta di boso pueblo?’ Tabata un gran gozo pa mi conoce e rumanan den e campamento. Tin awor ocho congregacion den e pueblo aki di Testigo di Jehova.”

Den “Tera di Aguila”

No, esei no ta e águila americano! Entre Oriente i Occidente tin un país europeo yamá Albania, i su nomber den e idioma oficial ta Shqipëria, cu kier men “Tera di Aguila.” Recientemente, un prohibicion cruel di Testigo di Jehova di 50 aña largu den e país a ser kitá, i nan por a uni cu nan rumanan di Oriente i di Occidente den nan gozamento di libertad di adoracion. Nan berdaderamente ta “cumpra e tempo oportuno.” (Efesio 5:16) E promé asamblea den e historia di Albania, asamblea di un dia, tabata celebrá den e Teater Nacional, den e capital, Tiranë, riba diadomingo, 21 di Mart. Diasabra atardi un grupo di 75 Testigo di Jehova boluntario a transforma e teater decadente na un Salón di Asamblea briyante i limpi. E directiva a keda babucá. I ta notable cu dje 75 boluntario, rond di 20 so tabata bautizá!

E clima no por a ser mihor. Ora delegado di stranhería a yega, saludo—principalmente cu seña i abrazo—a haci e dia dje asamblea special mashá special. Cu su plant’i man extende pa cielo, ruman Nasho Dori a haci oracion di apertura. E tabata bautizá na 1930 i awor ta casi ciegu. E programa tabata presentá den albanés, i pionero special stranhero a presenta e mayor parti. E 585 hende cu a asisti a canta e cantica “Dedicacion cristian”—uno di seis cantica cu tabata traducí na albanés pe asamblea—ora 41 ruman nobo a bai ne tanki cu ruman bishitante griego bondadosamente a instala den e Salón di Reino local. Ki un cambio! Na antes, posesion di un Bijbel a resulta den sentencia na campamento di trabao, i reunion tabata limitá na grupo di dos of tres hende.

E dia despues dje asamblea, e oficina di Watch Tower a recibi un yamada telefónica for dje director dje teater. Normalmente e ta mustra mashá poco interés den hende cu ta usa e teater. Esei ta e trabao dje director asistente. Pero, el a bisa: “Mi simplemente a keda obligá di yama pa agradicí boso. Mi nunca a mira e lugar asina limpi. Si mi mester bisa loke a pasa, lo mi bisa cu un brisa di cielo a baha riba nos teater ayera. Ki ora cu boso kier usa nos facilidad, haci fabor di bolbe, i nos lo duna boso e preferencia. Bo sa, nos realmente mester laga boso bini cada tres luna gratis.”

E testigonan a bolbe na nan pueblo fortalecí i agradicí i a cuminza prepara pe Conmemoracion dje morto di Jesús. Solamente 15 dia despues, riba diamars, 6 di April, e promé Conmemoracion no clandestino tabata celebrá den siete lugar.

Den e pueblo di Berat, asistencia na reunion a aumenta te na rond di 170, i e pastor local ta furioso. Dje 33 publicador di Reino den Berat, 21 tabata bautizá ne asamblea. Berat a informa cu 472 a asisti na Memorial. Asistencia na celebracion di Memorial na otro lugar també tabata sobresaliente, principalmente como resultado dje delantera excelente cu pionero special a hiba.

Den e pueblo di Shkodër, esun mas católico den Albania, unda cu tin un basílica, e iglesia a cuminza publica un boletín mensual di noticia, i cada número ta trata cu “Con pa evita Testigo di Jehova.” E último número a bisa: “Testigo di Jehova a invadi Shkodër”! E ehército grandi di dos Testigo di Jehova ei a reuni 74 hende di bon conducta i pensamento serio pe Memorial. Despues di a tende e discurso di Memorial, 15 famía a pidi estudio bíblico di cas. Den un otro pueblo, Durres, unda cu tin un ehército di cuater Testigo di Jehova, tabatin un asistencia excelente di 79.

Debí na oposicion di hovenan católico, cu a amenazá di corre Testigo di Jehova cu piedra, e reunion di Memorial den e pueblo di Kalmeti i Vogel den montaña tabata mudá ne cas di un ruman local, unda 22 a reuni trankilamente. Tabatin cinco publicador den e grupo, di locual tres tabata bautizá ne asamblea den Tiranë.

Den Vlorë dos homber hoven a recibi un copia di E Toren di Vigilancia, a lezé, i a skirbi e Sociedad: “Awor nos ta yámanos Testigo di Jehova debí ne berdad cu nos a siña den E Toren di Vigilancia. Haci fabor di manda yudanza pa nos.” Dos pionero special tabata asigná ei, i un homber hoven a cumplí cu requisito lihé pa bira publicador. El a keda contentu pa ser hunto cu e 64 cu a asisti na Memorial den Vlorë.

Un ruman albanés cu a siña e berdad na América a bolbe na 1950 na su pueblo natural di Gjirokastër, unda el a sirbi ne grado posibel te na su morto. El a sembra e simía dje berdad den e curazón di su yiu homber. Ora e prohibicion tabata kitá, e yiu a pidi yudanza dje Sociedad Watch Tower. Un otro persona interesá bibando den un pueblo net panort també a skirbi pidiendo yudanza, di manera cu cuater pionero special tabata mandá ei. Riba diarazón maínta despues di Memorial, uno di nan a telefoneá e oficina dje Sociedad den Tiranë: “Mi a keda obligá di yama boso pa bisa cuanto e spiritu di Jehova a haci. Nos ta asina contentu. Memorial tabata un bon éxito.” E asistencia tabata 106 hende, incluyendo nan grupo di siete publicador di Reino.

Cuanto tabata e asistencia total pa Memorial? Na 1992, ora cu tabatin solamente 30 publicador di Reino, e asistencia tabata 325. Na 1993, e 131 publicador a reuni 1.318 hende pa asisti. Den e dos aña, e asistencia tabata diez bez e total di publicador. Ta ki excitante pa mira “e chikito . . . bira mil” den un periodo di tempo tanto cortico!—Isaías 60:22.

“Haci cabuya di bo tent mas largu”

Mientras cu e trabao di predica di Testigo di Jehova ta extende te na tur skina di mundo, e yamada ta sali: “Haci e lugar di bo tent mas espacioso. I láganan rek tela di tent di bo magnífico tabernáculo. No nenga. Haci cabuya di bo tent mas largu, i haci fuerte staca di bo tent. Pasobra lo bo expande rechts i links.” (Isaías 54:2, 3) Tal expansion den e “magnífico tabernáculo” di Dios—cu e congregacion mundial di adorador di dje ta representa—realmente ta keda bisto den Oosteuropa, specialmente den país dje Union Soviética di antes. Despues di a sostene sirbidor di dje pa década di opresion, awor Jehova Dios ta duna su Testigonan e energía dinámico necesario pa expande i fortalece su organizacion.

Den Moscú, Rusia, den e Stadión di Locomotief, dia 22 te 25 di Juli, un máximo di 23.743 a asisti ne asamblea internacional sobresaliente di 1993 dje serie di asamblea yamá “Siñanza Divino.” Asta dos aña pasá, ken por a pensa cu esei tabata posibel? Pero, nan tabatei! Mas cu mil a bini di Hapón i Corea, casi 4.000 a bini di América i Canadá, i miles mas a bini di mas cu 30 país di Surpacífico, Africa, Europa, i otro tera—berdaderamente un reunion di Oriente i Occidente. Ta ki animador pa tur eseinan asociá libremente cu mas cu 15.000 di nan rumanan ruso! Sintimento di gozo a pasa over.

Un total asombroso di 1.489 testigo nobo tabata bautizá. Comunicacion público a publica e bautismo rond di mundo, incluyendo un excelente portret riba e promé bladji dje curant The New York Times. Aunque tabatin aplauso manera donder durante e bautismo, e tabata asta mas duro durante e discurso final ora, despues cu e orador a agradici e 4.752 trahador boluntario i oficial cu a yuda haci asina un bon éxito dje asamblea, a agrega: “Sobre todo, nos ta agradici Jehova Dios!” Sí, e spiritu di Jehova a detene e oposicion fuerte dje religion ortodoxo i a duna e energía vital cu a haci e asamblea un realidad conmovedor.

Sin embargo, tabatin mas, den e stad ucranio di Kiev, dia 5 te 8 di Augustus. Atrobé, ruman boluntario trahando libremente a renoba completamente e stadión, i e Salón di Reino gigantesco a yena cu 64.714 como e asistencia máximo. Una bez mas, Testigo di Jehova di Oriente i Occidente a bini i di tur otro parti di mundo. Discurso principal tabata traducí na 12 idioma. Mas cu 53.000 delegado cu a yega via avion, trein, of bus, tabatin cu ser encontrá na stacion di trein i aeropuerto i transportá na nan posada den hotel, scol, cas di famía, i també na boto di rio. Tur esei a wordu hací pa un gasto mínimo cu un suavidad i eficacia di organizacion cu a resulta den expresion di asombro i elogio di parti di poliz dje stad.

E programa conmovedor dje asamblea a yega su máximo den un bautismo cu a ocupa casi dos ora i mei. Un total di 7.402 ruman nobo a simboliza nan dedicacion na Jehova Dios, durante cu aplauso a klink i a klink di nobo den tur e stadión grandi. Esei tabata mas cu e máximo di mas halto hamás registrá di 7.136 hende bautizá ora 253.922 delegado a reuni pe asamblea ne stad di New York na 1958.

Mientras cu e tempo di huicio ta sigi awor pa su final, hende semehante di carné di Oriente, Occidente, i di asta e “parti mas lehano dje tera” ta ser reuní den un unidad sin igual den tur e pasado di humanidad. Realmente, un “multitud grandi . . . di tur nacion i tribu i pueblo i lenga” ta uni cu Israel spiritual, declarando nan fe den e precioso sacrificio di rescate di Jesús, e fundeshi di tur loke ta ser hací pe vindicacion dje gobernacion soberano di Jehova Dios.—Echo 1:8; Revelacion 7:4, 9, 10.

[Caption on page 8]

Oriente ta toca Occidente den Moscú i Kiev