Agente di maldad

E SPLICACION cu e Bijbel ta duna dje papel di demoño den asunto humano ta contestá pregunta fundamental tocante maldad cu di otro manera no tin contesta. Por ehempel, considera e sigiente palabra dje periódico International Herald Tribune tocante e gera corriente den loke tabata Yugoslavia: “Un grupo di investigador dje Comunidad Europeo a conclui cu [soldad] a viola 20.000 muher i mucha muher mohamedano . . . como parti di un proceder sistemático di terror planeá pa intimida, demoralizá i corre nan for di nan cas.”

Un análisis den e revista Time a haci un esfuerzo pa splica e situacion: “Tin bez cu homber hoven den gera por viola hende muher pa nan agrada nan mayornan, nan hefe, i pa gana un clase di aprobacion cu tata ta duna yiu. Violacion di hende muher ta duna prueba di dedicacion ne ferocidad dje grupo militar. Homber hoven cu ta dispuesto pa haci cos terribel ta domina nan concenshi individual afin di cumpli cu e propósito incambiabel dje grupo. Soldad ta confirma nan lealtad door di comete brutalidad.”

Pero, pakico e “propósito incambiabel dje grupo” ta mas degradá cu e concenshi individual di miembro di dje? Como hende individual, casi tur hende kier biba den paz cu nan próhimo. Pues, pakico, den tempo di gera, homber ta viola muher, ta tortura, i ta mata otro? Un motibo clave ta cu ehército di demoño ta trahando.

Comprendimento dje papel cu demoño ta hunga també ta duna solucion pa loke algun hende ta yama e “problema di teólogo.” E problema ta di con pa reconciliá tres situacion: (1) Dios ta todopoderoso; (2) Dios ta amoroso i bon; i (3) cos terribel sa sosode. Algun hende ta kere cu ta posibel pa reconciliá cualkier dje dos situacion ei, pero nunca por reconciliá tur tres. E Palabra di Dios mes ta duna e contesta i su contesta ta enbolbe spiritu invisibel, agente di maldad.

E promé rebelde

E Bijbel ta bísanos cu Dios mes ta un spiritu. (Juan 4:24) Cu tempo el a bira Creador di miyones di otro ser spiritual, yiu angelical. Den un vision, Daniel, un sirbidor di Dios, a mira cien miyón angel. Tur persona spiritual cu Dios a crea tabata husto i na armonía cu su boluntad.​—⁠Daniel 7:10; Hebreo 1:⁠7.

Despues, ora Dios “a funda e tera,” tal yiunan angelical di Dios “a sclama gozosamente hunto” i “a cuminza grita den aplauso.” (Job 38:​4-7) Pero, uno di nan a desaroya un deseo pa coge pa su mes e adoracion debí hustamente ne Creador. Cu su rebelion contra Dios, e angel a haci su mes satanás (nificando “opositor”) i diabel (nificando “calumniador”).​—⁠Compara cu Ezekiel 28:​13-15.

Usando un colebra den Eden pa papia cu e promé hende muher, Eva, Satanás a convence Eva pa desobedece e mandamento directo di Dios di no come e fruta di un cierto palu den e hofi. Despues, su esposo a uni cuné. Asina, e promé pareha humano a uni cu e angel den rebelion contra Jehova Dios.​—⁠Génesis 2:17; 3:​1-6.

Aunque suceso den Eden por parce un les francu den obedencia, Satanás a lanta dos cuestion moral importante. Promé, Satanás a nenga cu Jehova Dios a eherce hustamente su gobernacion riba criatura di dje i pa nan mayor bienestar. Kizás hende por haci un mihor trabao gobernando nan mes. Di dos, Satanás a lanta duda tocante si cualkier persona inteligente lo keda fiel i leal na Dios ora obedencia a parce di no resulta den beneficio material.a

Un comprendimento claro dje cuestion lantá den Eden, hunto cu un comprendimento di atributo di Jehova Dios, ta yúdanos comprende e solucion pe “problema di teólogo,” esta, reconciliá e existencia di maldad cu e atributo di poder i amor di Dios. Aunque ta cierto cu Jehova Dios tin poder sin límite i ta e personificacion mes di amor, e ta sabí i husto també. E ta eherce e cuater atributo cu balanza perfecto. P’sei, e no a usa su poder irresistible pa destrui e tres rebelde un bez. Esei por ta husto pero no necesariamente sabí ni amoroso. Además, e no simplemente a pordoná i a lubidá, un acto cu algun hende por kere lo ser un opcion amoroso. Hacimento di esei lo no a ser ni sabí ni husto.

Tempo tabatin cu pasa pa pone fin na cuestion cu Satanás a lanta. Tempo tabata necesario pa duna prueba si hende por goberna nan mes bon, independiente di Dios. Ora Jehova Dios a permiti e tres rebelde di sigi biba, e també a haci posibel pa su creacion inteligente participa den e dunamento di prueba dje falsedad dje acusacion di Satanás, sirbiendo Dios fielmente den circunstancia dificultoso.b

Jehova Dios a bisa Adam i Eva claramente cu si nan come dje fruta prohibí, nan lo muri. I nan a muri sí, aunque Satanás a duna Eva e siguranza di cu lo e no muri. Satanás també ta bao dje sentencia di morto; entretanto, e ta sigi gaña humanidad. Realmente, e Bijbel ta bisa: “Henter mundo ta bao di poder dje malbado.”​—⁠1 Juan 5:19; Génesis 2:​16, 17; 3:4; 5:⁠5.

Otro angel ta rebela

No mucho tempo despues di loke a sosode den Eden, otro angel a uni den e rebelion contra e soberanía di Jehova Dios. E Bijbel ta bisa: “Awor a sosode cu ora hende a cuminza aumenta na cantidad riba e superficie dje tera i yiu muher a nace na nan, anto e yiunan di e Dios berdadero a cuminza ripara e yiu muhernan di hende, cu nan tabatin bon aparencia; i nan a bai tuma esposa pa nan mes, esta, tur loke nan a scoge.” Es decir, tal angel “a bandona nan propio i debido lugar di biba [den cielo]” i a baha riba tera, a materializá curpa humano, i a disfruta di placer sensual cu hende muher.​—⁠Génesis 6:​1, 2; Hudas 6.

E relato ta sigi bisa den Génesis 6:4: “Nefilim a resulta di ser riba e tera den e dianan ei, i també despues di esei, ora e yiunan di e Dios berdadero a sigi tene relacion cu yiu muher di hende i nan a duna luz na yiu pa nan, nan tabata esnan poderoso di tempo di antigua, homber di fama.” Tal yiu bruhá cu a nace di hende muher pero cu angel como nan tata, tabata abnormalmente fuerte, “esnan poderoso.” Nan tabata homber di violencia, of Nefi·limʹ, un palabra hebreo cu kier men “esnan cu ta tumba otro.”

Ta notable cu tal suceso a sali despues den leyenda di civilizacion di antigua. Por ehempel, un cuenta babilónico di 4.000 aña di edad ta menciona hazaña sobrehumano di Gilgamesh, un semidiós violento i fuerte cu tabatin “deseo sexual cu no a [laga] birgen cu su amante.” Un otro ehempel, den leyenda griego, tabata Hércules sobrehumano. Hércules a nace di Alcmene, hende, i su tata tabata e dios Zeus, i el a sali riba un serie di aventura violento despues di a mata su esposa i yiunan den un atake di rabia. Aunque tal cuenta a cambia hopi despues cu nan a pasa di un generacion pa otro, nan ta di acuerdo cu loke e Bijbel ta bisa tocante e Nefilim i nan tata angelical rebelde.

Pa motibo dje influencia di angel malbado i nan yiunan sobrehumano, e tera a yena asina hopi cu violencia cu Jehova Dios a decidi di destrui e mundo cu un diluvio grandi. E Nefilim a perece hunto cu tur otro hende malbado; e único sobrebibiente humano tabata husto Noé i su famía.​—⁠Génesis 6:11; 7:⁠23.

Sin embargo, angel malbado no a muri. Mas bien, nan a desmaterializá nan curpa humano i a bolbe na region spiritual. Pa motibo di nan desobedencia, Dios no a permitínan bolbe ne famía di angel husto di Dios; ni e no a permitínan bolbe bisti curpa humano manera nan a haci den e dia di Noé. Pero, nan a sigi eherce influencia perhudicial den asunto di humanidad, bao di autoridad dje “gobernante di demoño,” Satanás e Diabel.​—⁠Mateo 9:34; 2 Pedro 2:4; Hudas 6.

Enemigo di humanidad

Satanás i e demoñonan semper tabata asesino i cruel. Usando varios manera, Satanás a mata bestia i criá di Job, un homber “sin culpa i recto, temeroso di Dios i apartá for di maldad.” Despues, el a mata e diez yiu di Job, mandando un “bientu fuerte” pa kibra e cas unda nan tabata. Anto, Satanás a plaga Job cu un “blufein maligno dje planta di su pia te na corona di su cabez.”​—⁠Job 1:​7-19; 2:​3, 7.

Demoño ta manifesta un genio igualmente malu. Den e dia di Jesús, nan a haci hende mudo i ciegu. Nan a haci un homber corta su curpa cu piedra. Nan a tira un mucha homber na suela i a “dalé cu djimbi violento.”​—⁠Lucas 9:42; Mateo 9:​32, 33; 12:22; Marco 5:⁠5.

Informe di rond di mundo ta mustra cu Satanás i e demoñonan ta tanto violento como semper. Nan ta duna algun hende maleza. Nan ta molestiá otronan i no ta láganan drumi of ta dúnanan soño terribel of ta haci abuso di nan sexualmente. Nan ta haci otronan ainda bira loco, ta hácinan mata of comete suicidio.

Pa cuanto mas tempo Dios lo toleránan?

Dios lo no tolera Satanás i su demoñonan pa semper. Jehova Dios a permitínan existi te na nos dia pa un bon motibo, pero awor nan tempo ta cortico. Cerca e principio dje siglo aki, Dios a dal un paso grandi pa limita e alcance di nan actividad. E buki di Revelacion ta splica: “Gera a cuminza den cielo: Miguel [Jesucristo resusitá] i su angelnan a combati cu e dragón [Satanás], i e dragón i su angelnan a combati pero no a triunfa, ni un lugar no a wordu hayá mas pa nan den cielo. Pues, e dragón grandi a wordu tirá abao, e colebra original, esun yamá Diabel i Satanás, cu ta gaña tur e tera habitá; el a wordu tirá abao ne tera, i su angelnan tabata tirá abao hunto cuné.”​—⁠Revelacion 12:​7-9.

Kico tabata e resultado? E relato ta sigi: “P’sei mes, alegra cielo i boso cu ta biba den dje!” Angel husto por a alegra pasobra Satanás i su demoñonan no tabata den cielo mas. Pero kico di hende riba tera? E Bijbel ta bisa: “Ai di tera i di lamá, pasobra e Diabel a baha cerca boso, mashá rabiá, sabiendo cu ta kedé poco tempo mas.”​—⁠Revelacion 12:⁠12.

Den nan rabia Satanás i demoño bao di dje tin intencion di causa tanto calamidad posibel promé cu nan fin cercano. Den e siglo aki tabatin dos gera mundial i mas cu 150 gera menor desde e fin dje segundo gera mundial. A drenta den nos vocabulario frase cu ta refleha e violencia dje generacion aki: “gera bacteriológico,” “e holocausto,” “campo di matamento,” “campamento di violacion di hende muher,” “matador en cadena,” i “bomba nuclear.” E noticia ta yen di cuenta di droga, asesinato, bombardeamento, canibalismo sicopático, matamento en masa, hamber, i tortura.

E bon noticia tá cu tal cosnan ta temporario. Den e futuro cercano, Dios lo dal paso di nobo contra Satanás i su demoñonan. Dunando detaye di un vision di Dios, apóstol Juan a bisa: “I mi a mira un angel bahando foi cielo cu e yabi dje abismo i un cadena grandi den su man. I el a coge e dragón, e colebra original, cu ta Diabel i Satanás, i a maré pa mil aña. I el a tiré den abismo i a ceré i a seyé riba dje, pe no gaña e nacionan mas te cu e mil aña termina.”​—⁠Revelacion 20:​1-3.

Despues di esei, e Diabel i su demoñonan “tin cu ser gelós pa un poco tempo,” anto nan lo ser destruí pa semper. (Revelacion 20:​3, 10) Ki un tempo maraviyoso esei lo tá! Ya cu Satanás i su demoñonan ta kitá pa semper, Jehova Dios lo ser “tur cos pa tur hende.” I tur hende berdaderamente “lo haya nan gozo exquisito den e abundancia di paz.”​—⁠1 Corintio 15:28; Salmo 37:⁠11.

[Footnotes]

[Caption on page 7]

Hende so ta responsabel pa tal cosnan, of un forza desastroso, invisibel també ta culpable?

[Caption on page 7]

Lo ta ki un tempo maraviyoso ora demoño no ta molestiá humanidad mas!

[Caption on page 7]

Poz di petroleo kimando den Kuwait, 1991: Chamussy/Sipa Press