Nos A Busca Promé e Reino
SEGUN CU OLIVIA SPRINGATE A CONTÉ
Mama a caba di paga e bela i sali for di camber despues di a scucha nos oracion. Mi ruman menor a puntrámi un bez: “Olivia, con Dios por mira i téndenos door di muraya di ladriyo?”
MI A contestá: “Mama a bisa cu Dios por mira door di cualkier cos, asta te den nos curazón.” Mama tabata un hende temoroso di Dios i un lezador entusiástico di Bijbel, i el a inculcá den nos, su yiunan, un respet profundo di Dios i di principio bíblico.
Nos mayornan tabata miembro dje religion anglicano den e pueblo chikito di Chatham, condado di Kent, Inglaterra. Aunque Mama a bai misa regularmente, el a kere cu un bida cristian kier men mas cu ocupa banki den misa un bez pa siman. El a keda sigur també cu Dios tin un solo berdadero iglesia.
Aprecio pa berdad bíblico
Na 1918, ora mi tabatin rond di cinco aña di edad, Mama a obtene volumen na inglés titulá Estudio di Scritura, cu Charles T. Russell a skirbi, e promé presidente dje Sociedad Watch Tower Bible and Tract. Un poco aña despues, ora nos tabata biba den un lugar chikito yamá Wigmore, Mama a recibi e bishita di un Studiante di Bijbel, e nomber di Testigo di Jehova ne tempo ei. El a acepta e buki pa yuda studiá e Bijbel titulá na inglés Arpa di Dios, i den dje el a cuminza haya contesta pa hopi pregunta bíblico cu e tabatin. Tur siman un tarheta roos cu pregunta skirbí pa cada capítulo a yega den post. E tarheta a mustra també unda den e buki pa haya contesta.
Na 1926 mi mayornan, mi ruman muher menor, Beryl, i mi a bandona e religion anglicano pasobra nos a keda disgustá cu e metemento dje religion den político, i també cu su cantidad di siñanza irrazonabel. Un siñanza prominente tabata cu Dios ta tormenta hende pa tur eternidad den un fiernu di candela. Mi mama, cu realmente tabata busca e berdad bíblico, a keda convencí di cu e religion anglicano no ta e religion berdadero.
Un poco despues, na contesta di oracion sincero di Mama, Sra. Jackson, un studiante di Bijbel, a bishitános. Pa casi dos ora, el a papia cu Mama i mi, contestando nos pregunta, usando e Bijbel. Nos a keda encantá pa siña, entre otro cosnan, cu nos oracion mester ta dirigí na Jehova Dios, e Tata di Jesucristo, i no na un misterioso trinidad. (Salmo 83:18; Juan 20:17) Pero, pa mi, e pregunta di mas inolvidable cu Mama a haci ta lo sigiente: “Kico kier men busca e Reino promé?”—Mateo 6:33.
E contesta fundá ariba e Bijbel a afecta nos bida profundamente. Dje siman ei mes padilanti, nos a cuminza asisti na reunion di Studiante di Bijbel i comparti loke nos a siña cu otro hende. Nos a keda convencí di cu nos a encontrá e berdad. Un poco luna despues, na 1927, Mama a bautiza pa simbolizá su dedicacion ne sirbishi di Jehova Dios, i na 1930, mi a bautiza també.
Drentando den e sirbishi di pionero
Nos famía a asisti ne congregacion di Gillingham, cu a consisti di rond di 25 persona. Varios di nan tabata predicador di tempo completo, yamá pionero, i tur tabatin e speranza celestial. (Filipense 3:14, 20) Nan celo cristian tabata contagioso. Mientras cu mi tabatin 18 aña ainda, mi a sirbi como pionero pa un poco tempo den Bélgica na 1931. Esei a estimulá mi deseo pa mas sirbishi di Reino. Ne tempo ei nos a participa den partimento pa tur clero un copia dje foyeto E Reino, e speranza di mundo.
Cu tempo, nos tata a bira mashá contra nos actividad cristian, i debí en parti na esei, mi a bai biba den Londres na 1932 pa bai colegio. Despues, mi a bira jufrow di scol pa cuater aña i durante e tempo ei mi a asociá cu e congregacion di Blackheath, uno di solamente cuater congregacion den Londres ne tempo ei. Tabata ne tempo ei cu nos a cuminza tende informe di encarcelacion i sufrimento di nos rumanan cristian den e Alemania di Hitler pa motibo cu nan a nenga di apoya esfuerzo di Hitler den e gera.
Na 1938, net den e luna cu mi a caba di paga un debe pa buki cu mi a cumpra, mi a kita for di mi trabao pa cumpli cu mi deseo di bira pionero. Mi ruman muher Beryl a cuminza sirbi como pionero den Londres ne mesun tempo, pero el a biba den un otro cas di pionero. Mi promé compañé pionero tabata Mildred Willet, cu a casa despues cu John Barr, awor un miembro dje Cuerpo Gobernante di Testigo di Jehova. Hunto cu otronan den nos grupo, nos a bai cu bicicleta ne territorio i a pasa e dia, hopi bez apesar di awaceru.
E amenaza di gera tabata den Europa caba. Entrenamento cu máscara di gas tabata duná pa hende civil, i preparacion a cuminza pa hiba muchanan for dje stad na campo of na pueblo chikito si gera a cuminza. Mi tabatin solamente suficiente placa wardá pa cumpra zapato, i no tabatin e posibilidad di yudanza financiero for di mi mayornan. Pero, Jesús no a bisa, ‘Tur e otro cosnan ei lo ser agregá na boso si boso ta busca promé e reino’? (Mateo 6:33) Mi tabatin e plena fe di cu Jehova Dios lo satisface tur necesidad cu mi tabatin, i el a hacié abundantemente pa tur es tempo. Durante e tempo di gera tabatin bez cu mi a aumenta e poco cuminda cu mi tabatin cu berdura cu a cai for di truck. I hopi bez mi a obtene cuminda door di cambia literatura bíblico pa fruta i berdura.
Mi ruman muher menor Sonia a nace na 1928. E tabatin siete aña di edad so ora el a dedica su bida na Jehova. Sonia ta bisa cu asta na tal edad hoven, su meta tabata di bira pionero. Na 1941, pronto despues di a simboliza su dedicacion cu bautismo bao di awa, el a alcanza su meta ora e i Mama tabata asigná como pionero na Caerphilly, Surgales.
Nos ministerio durante e añanan di gera
Den September di 1939, Gera Mundial II a cuminza, i nos rumanan cristian den Britania tabata encarcelá pe mesun motibo cu otro hende creyente tabata encarcelá den Alemania nazista—nan posicion neutral en cuanto participacion den e gera. E bombardeo di Inglaterra a cuminza den Juli di 1940. Anochi tras anochi, e bombardeo a haci hende surdo, pero cu e yudanza di Jehova nos por a drumi un poco i ser refrescá pe trabao di predicá su mañan.
Aveces nos a bai ne territorio asigná na nos pa predicá solamente pa haya mayor parti di cas destruí. Den November di 1940 un bomba a cai un poco meter so for dje cas unda varios di nos tabata biba, kibrando bentana na mil pida. E porta pisa di dilanti a cai cu un boroto, i e chiminea a basha abao. Despues di a pasa e resto dje anochi den proteccion bao di tera, nos a separa i a bai biba den cas di varios ruman.
Un poco tempo despues mi a recibi un asignacion den Croydon, den Londres Principal. E pionera compañera di mi tabata Ann Parkin, kende su ruman menor Ron Parkin despues a bira coordinador dje comité di sucursal den Puerto Rico. Despues, mi a bai biba den Bridgend, Surgales, unda mi a sigi como pionero, bibando den un van di cabai pa seis luna. Nos a bai cu bicicleta pa 6 km ne congregacion grandi di mas cerca, den Port Talbot.
Awor caba e público a bira basta contra nos, i a yámanos conchies (opositor conciencial). P’sei, tabata dificultoso pa nos haya posada, pero Jehova a cuídanos segun su promesa.
Despues, ocho di nos tabata asigná como pionero special den Swansea, un pueblo na costa di Surgales. Mientras mas intenso e gera a bira, mas intenso prehuicio contra nos a bira. E palabra “djaca” i “cobarde” tabata pintá riba muraya di cas di pionero. Informe di curant cu a condenános pa nos posicion neutral tabata principalmente responsabel pe provocacion di tal enemistad. Cu tempo, uno pa uno, siete di nos tabata encarcelá. Mi a pasa un luna den e prisón di Cardiff na 1942, i despues mi ruman Beryl també a pasa tempo ei. Aunque nos tabatin poco cos materialmente i a padece di mofa i reproche, nos tabata ricu spiritualmente.
Mientras tanto, Mama i Sonia tabata pionero den Caerphilly i tabatin experencia similar. Net e promé estudio bíblico cu Sonia a dirigi tabata cu un señora cu el a haci arreglo pa bishita un diabierne atardi. Sonia a tene confianza cu Mama lo bai cuné, pero Mama a splica: “Mi tin un otro compromiso. Bo a haci e arreglo, p’sei bo tin cu bai bo so.” Aunque Sonia tabatin 13 aña di edad so, el a bai su so, i e señora a haci bon progreso spiritualmente i despues a bira un testigo dedicá.
Actividad despues dje gera —Anto Galad
Ora Gera Mundial II a termina na 1945, mi tabata traha den un territorio isolá den Whaley Bridge, Derbyshire. E maínta cu e para fuego tabata anunciá, nos a bishita i a consola hende cu ne tempo ei tabata completamente fadá cu gera—tanto huérfano, biuda, i cadáver mutilá.
Un poco luna despues, e Sociedad a pidi ruman boluntario predicá den Irlanda, e Isla Berde. Ne tempo ei tabatin rond di 140 Testigo di Jehova so riba e isla, di manera cu e tabata considerá como territorio di misionero. Den poco luna, mas cu 40 pionero special tabata asigná ei, i mi tabata hunto cu nan.
Despues di a traha pa un tempo den Coleraine i Cookstown den e nort, mi tabata asigná, hunto cu tres otro, na Drogheda na costa di oost. Aunque irlandés di naturaleza ta mashá cariñoso i hospitalario, prehuicio religioso tabata grandi. P’sei, durante henter un aña, nos por a laga cu e público mashá poco literatura bíblico (realmente un buki so i algun foyeto).
Durante nos tempo den Drogheda, mi tabata corre mi bicicleta di un cunucu pa otro ora un cunuquero hoven a pasa door dje trankera i a sali riba e camina. El a wak pariba i pabao riba e camina, anto a puntra cu un boz abao: “Bo ta un Testigo di Jehova?” Ora mi a contesta cu sí, el a sigi: “Ayeranochi mi tabatin un argumento terribel cu mi novia tocante boso, i nos a termina nos compromiso. El a insisti cu boso ta comunista, manera pastor i curant católico ta bisa, pero mi a persisti cu esei no por ta e berdad di ningun manera, pasobra boso ta bai abiertamente di cas pa cas.”
Mi a duné un foyeto pa leza, locual el a sconde den su sacu, i nos a haci arreglo pa reuni i papia mas den anochi, pasobra el a bisa: “Si nan ta mirámi papia cu bo, lo mi perde mi trabao.” E anochi ei dos di nos a reuni cuné i a contesta hopi pregunta cu e tabatin. El a parce convencí cu esaki ta e berdad, i el a priminti di bini na nos cas un otro anochi pa siña mas. E nunca a bini, p’sei nos a kere cu e promé anochi hende riba bicicleta a reconocele i probablemente el a perde su trabao. Nos ta puntra hopi bez si el a bira un Testigo di Jehova.
Despues di a asisti ne asamblea di districto den Brighton na costa di zuid di Inglaterra na 1949, varios di nos a recibi invitacion ne Scol Bíblico di Galad di Watchtower den estado di New York. Un total di 26 di Britania a asisti na klas di 15, locual a graduá dia 30 di Juli di 1950 durante e asamblea internacional den Yankee Stadium.
Nos ministerio den Brasil
E sigiente aña mi tabata asigná na São Paulo, Brasil, un stad di crecimento mas rápido di mundo. Ne tempo ei e tabatin cinco congregacion so di Testigo di Jehova, pero awor tin casi 600 di nan! Ki un contraste cu e trabao na Irlanda! Hopi cas den nos territorio den São Paulo tabata palacio, cu trankera halto di heru rond di nan i porta di heru labrá. Nos a yama e doño di cas cu batimento di nos man.
Cu pasamento di tempo, nos a recibi asignacion nobo. Mi tabatin e privilegio di yuda forma congregacion nobo den varios lugar den interior dje estado di São Paulo, incluyendo uno den Jundiaí na 1955 i un otro den Piracicaba na 1958. Despues, na 1960, mi ruman Sonia a bira mi misionero compañé, i nos tabata asigná na Pôrto Alegre, e capital dje estado di Rio Grande do Sul. Tal bez bo ta puntra Con Sonia a yega Brasil?
Sonia i Mama a sigi traha hunto como pionero den Inglaterra despues di Gera Mundial II. Pero un poco despues di 1950, Mama a opera pa cáncer locual a lagué mucho swak pa bai di cas pa cas, aunque e por a conduci estudio bíblico i skirbi carta. Sonia a sigi den e trabao di pionero, i ne mesun tempo a yuda cuida Mama. Na 1959, Sonia tabatin e privilegio di asisti na klas di 33 di Galad i tabata asigná na Brasil. Mientras tanto, Beryl a cuida Mama te na su morto na 1962. Ya caba Beryl a casa i e i su famía ta sirbi Jehova Dios fielmente.
Den Brasil, Sonia i mi a yuda varios hende haci dedicacion i bautiza. Sin embargo, un problema cu hopi brasilero tabatin tabata e legalizacion di nan matrimonio. Pa motibo dje dificultad di obtene un divorcio den Brasil, no tabata straño pa pareha biba compañá sin e beneficio di matrimonio. Esei tabata specialmente e caso ora hende casá a separá for di nan excasá legal.
Un señora, yamá Eva, tabata den tal situacion ora mi a conocé. Su casá legal a desparce, pues pa localizé, nos a haci un anuncio na radio. Ora nos a localizá su casá, mi a compañá Eva na un otro stad pa haya su firma riba un documento pa libra Eva pe por a legalizá su enlace cu e soltero cu locual Eva tabata biba. Den e verhoring dilanti huez, e huez a puntra tanto Eva como ami pa splica pakico e kier a drecha su situacion matrimonial. E huez a expresa sorpresa i també satisfaccion ora nos a splica esei na dje.
Na un otro ocasion, mi a bai cu un studiante bíblico di mi pa haci arreglo pa un abogado trata cu su caso. Di nobo un bon testimonio tabata duná tocante matrimonio i e ley moral di Dios. Den e caso ei, e costo dje divorcio tabata asina halto cu e dos persona tabatin cu traha pa paga gasto. Pero, pa tal studiante nobo di Bijbel, e esfuerzo a bale la pena. Sonia i mi tabatin e privilegio di ser testigo di nan matrimonio, i despues, hunto cu nan tres yiu tiener, nos a scucha un breve discurso bíblico den nan cas.
Un bida recompensador ricu
Ora Sonia i mi a dedica nos bida na Jehova Dios i a bira pionero, nos intencion, si di tur manera posibel, tabata pe ministerio di tempo completo ser e bocacion di nos bida. Nos no a pensa mucho riba loke lo pásanos den nos behez ni den e caso di enfermedad of dificultad financiero. Pero, net manera Jehova Dios a priminti, nos nunca tabata bandoná.—Hebreo 13:6.
Ai sí, tabatin bez cu e falta di placa tabata un problema. Na un tempo, mi compañé i mi a come sandwich di peterselie pa henter un aña, pero nos nunca a muri di hamber, ni no a falta necesidad básico.
Segun cu tempo a pasa, nos energía a mengua. Entre 1985 i 1987, nos dos tabatin operacion serio cu a resulta den un dificultad serio pa nos, siendo cu esei a rebaha nos trabao di predicá mashá. Den Januari di 1987, nos tabata invitá pa ser miembro dje personal dje oficina principal di Testigo di Jehova den Brasil.
Nos famía grandi di mas cu mil sirbidor ta situá mas cu 140 km pafó di São Paulo den un compleho bonita di edificio, unda nos ta traha literatura bíblico pa Brasil i otro parti di Suramérica. Nos ta recibi ei e cuido amoroso di sirbidor deboto di Dios. Ora nos a yega Brasil promé na 1951, tabatin rond di 4.000 predicador dje mensahe di Reino, pero awor tin mas cu 366.000! Nos Tata celestial compasivo en berdad a agregá na nos ‘tur otro cos’ pasobra nos a busca promé su Reino.—Mateo 6:33.
[Caption on page 22]
Olivia cu Mildred Willet cant’i un garoshi di informacion, 1939
[Caption on page 25]
Olivia i Sonia Springate