Testigonan di Jehova Ta un Culto?

JESUCRISTO a ser acusá di ta un buraché, golos, kibrador di Sabat, testigo falsu, blasfemador di Dios i mensahero di Satanas. Tambe el a ser acusá di ta subversivo.​—⁠Mateo 9:34; 11:19; 12:24; 26:65; Juan 8:13; 9:16; 19:⁠12.

Despues di Jesus su morto i resureccion, su disipelnan di igual manera tabata e blanco di acusacion serio. Un grupo di cristian di promé siglo a ser lastrá n’e gobernantenan di stad dor dje pueblo gritando: ‘E hombernan aki a trastorná e tera habitá.’ (Echo 17:⁠6) Na un otro ocasion apostel Pablo i su compañé Silas a ser hibá dilanti autoridad i acusá di a perturbá e stad di Filipos mashá.​—⁠Echo 16:⁠20.

Pablo a ser acusá despues di ta un “pest i cu ta promové lantamentu entre tur e hudiunan na tur parti dje tera habitá” i di ta trata di “profaná e tempel.” (Echo 24:​5, 6) E hombernan principal dje hudiunan na Roma a describí exactamente e situacion dje siguidornan di Jesus ora nan a admití: “Pasobra berdaderamente pa loke ta e secta aki ta conocí pa nos cu na tur parti hende ta papia contra dje.”​—⁠Echo 28:⁠22.

Evidentemente, e grupo nobo aki establecí dor di Jesucristo a ser considerá dor di algun como un grupo religioso cu punto di bista radical i prácticanan cu a choca cu loke a ser aceptá den e dianan ei como comportacion social normal. Sin duda, hopi hende awe lo a considerá e cristiannan un culto destructivo. Hopi biaha e acusadornan tabata miembronan prominente i respetá dje comunidad, i esaki a parce di agregá peso n’e declaracionnan. Hopi hende a kere e acusacionnan contra Jesus i su disipelnan. Tog, manera bo sa probablemente, cada un dje acusacionnan aki tabata falsu! E echo cu hende a bisa e cosnan aki no a haci nan cierto.

Kico djawe? Lo ta corecto pa referí na Testigonan di Jehova como un grupo religioso cu punto di bista radical i prácticanan cu ta choca cu loke ta ser aceptá como comportacion social normal? Testigonan di Jehova ta un culto?

Loke e Evidencia Ta Mustra

Un oficial di gobiernu dje stad di St. Petersburg, Rusia, a splica: “Testigonan di Jehova a ser presentá na nos como un sorto di secta clandestino sintá den scuridad i cu ta sacrificá mucha i cu ta mata nan mes.” Sin embargo, e pueblo di Rusia recientemente a bira mihó familiarisá cu e berdadero naturalesa dje Testigonan. Despues di a traha cu e Testigonan di Jehova en coneccion cu un congreso internacional, e mesun autoridad a comentá: “Awor mi ta mira hende normal, cu un sonrisa, asta mihó cu hopi hende cu mi conocé. Nan ta pacífico i calmu, i nan ta stima otro masha hopi.” El a agregá: “Realmente mi no ta comprendé pakico hende ta gaña riba nan asina.”

Testigonan di Jehova no ta tene reunionnan di rito ritualista, tampoco nan adoracion tin un capa di secrecia. E autor no-Testigo Julia Mitchell Corbett ta skirbi: “Ora nan reuní, generalmente mas cu un bes pa siman, den Salonnan di Reino (nan sitionan di reunion no ta ser yamá misa), mayoria di nan tempu ta ser dedicá na studio i consideracion di Bijbel.” Nan lugánan di reunion ta claramente marcá cu un borchi di “Salon di Reino.” E reunionnan ta habrí i e público general ta ser invitá pa asistí. Invitadonan no-anunciá ta mas cu bonbiní.”

E “Testigonan a gana e reputacion di ta honesto, cortes i industrioso,” Corbett ta agregá den su buki Religion in America. Hopi hende cu no ta Testigo ta cla pa admití cu no tin nada extravagante of straño tocante Testigonan di Jehova. Nan conducta no ta choca cu loke ta ser aceptá como comportacion social normal. The New Encyclopædia Britannica ta declará corectamente cu e Testigonan “ta insistí riba un código moral haltu den conducta personal.”

E director di noticia i proyecto special pa un stacion di television na Merca a skirbi e Testigonan di Jehova como reaccion riba un informe tendencioso infundá tocante e Testigonan den e programa di noticia di television 60 Minutes. El a bisa: “Si mas hende a biba segun boso fe, e nacion aki lo no tabata den e condicion cu e ta awor aki. Mi ta un reportero cu sa cu boso organisacion ta fundá riba amor i un fe firme den e Creador. Mi kier pa boso sa cu no ta tur reportero ta mes tendencioso.”

Un Religion Bon-Conocí

Ta corecto pa bisa cu Testigonan di Jehova ta un grupo religioso chikitu cu punto di bista extremista? Den un sentido, Testigonan di Jehova ta poco na cantidad compará cu algun religion. Sin embargo, corda loke Jesus a bisa: “Smal ta e porta i pertá e caminda cu ta hiba na bida, i poco ta esnan cu ta hañ’é.”​—⁠Mateo 7:​13, 14.

Di tur manera, e Testigonan ta leu di ta un culto chikitu extremista. Den primavera di 1993, mas cu 11 miyon hende a asistí n’e Testigonan su Conmemoracion dje morto di Cristo. Pero mas importante cu nan cantidad ta nan caracter moral i conducta ehemplar cu a resultá den encomendacion mundial pa nan. Sin duda esaki a contribuí n’e echo cu hopi pais a duna nan reconocimentu oficial como un religion conocí i di buena fe.

Notabel ta un reciente decision dje Comision Europeo di Derecho Humano. El a declará cu e Testigonan mester disfrutá di libertad di pensamentu, concenshi i religion i cu nan mester tin e derecho di papia tocante nan fe i siñ’é na otronan. E Comision lo no a declará esaki si e Testigonan di Jehova tabata conocí pa usa técnicanan engañoso i no-ético pa reclutá miembro of si nan a usa métodonan manipulante pa controlá e mente di nan siguidornan.

Hopi hende rond mundu ta bon conocí cu Testigo di Jehova. N’e miyones di hende no-Testigo cu ta studiando Bijbel cu Testigonan of cu a studia cu nan na un tempu of otro, nos ta puntra, Tabatin cualkier intento pa indoctriná [brainwash] persuadí bo? E Testigonan a utilisá técnicanan di control di mente riba bo? “No” bo contesta franco lo ta sin duda. Claramente, si e métodonan aki a ser usá, lo tabatin un cantidad aplastante di víctima na contradiccion cu cualkier argumento na fabor dje Testigonan di Jehova.

“Gusta Yuda Otro Hende”

Miembronan di culto hopi biaha ta isolá nan mes for di famia, amigu i asta sociedad en general. Esei ta e caso cu Testigonan di Jehova? “Mi no ta pertenecé n’e Testigonan di Jehova,” un reportero na República Checo a skirbi. Tog el a agregá: “Ta bisto cu nan [Testigonan di Jehova] tin un fortalesa moral tremendo. . . . Nan ta reconocé autoridadnan gubernamental pero nan ta kere cu ta solamente e Reino di Dios ta capas pa resolvé tur problema humano. Pero paga tinu​—⁠nan no ta fanático. Nan ta personanan cu gusta yuda otro hende.”

I nan no ta biba den comunidad cerá, isolando nan mes for di famia i otro hende. Testigonan di Jehova ta reconocé cu ta nan responsabilidad bíblico pa stima i percurá pa nan famia. Nan ta biba i traha cu hende di tur rasa i religion. Ora di desaster, nan ta lihé pa respondé cu suministro di alivio i otro yudansa humanitario.

Mas importante, nan ta enbolbí den un programa educacional cu no tin comparacion. Cuantu religion tin un sistema organisá pa haci bishita personal na cada individuo den nan comunidad? Testigonan di Jehova ta haci esaki den mas cu 200 pais i den mas cu 200 idioma! Claramente, Testigonan di Jehova “gusta yuda otro hende.”

Apego Estricto na Bijbel

Nos ta admití cu e siñansanan di Testigo di Jehova ta diferente for di esnan cu iglesianan ta duna. Testigonan di Jehova ta kere cu Jehova ta e Dios todopoderoso i cu Jesus ta su Yu, no parti di un divinidad triuno. Nan fe ta ancrá den e creencia cu e Reino di Dios so por trece alivio na sufrimentu di humanidad. Nan ta spierta hende dje destruccion inminente dje sistema di cosnan corupto aki. Nan ta predicá tocante e promesa di Dios di un paradijs terenal pa humanidad obediente. Nan no ta venerá e crus. Nan no ta celebrá Pascu. Nan ta kere cu e alma ta mortal i cu no ta existí fiernu di candela. Nan lo no come sanger, ni aceptá transfusion di sanger. Nan ta abstené for di enbolbimentu den política i participacion den guera. Bo a yega di puntra bo mes pakico e siñansanan di Testigo di Jehova ta asina diferente?

Un corant di Massachusetts, e Daily Hampshire Gazette ta splica cu Testigo di Jehova su “interpretacion estricto di Bijbel ta prohibí hopi actividad cu otronan ta considerá gewoon . . . , tur den un esfuerso pa sigui e ehempel dje cristiannan di promé siglo i e palabra di Bijbel.” The Encyclopedia of Religion ta bai di acuerdo cu “tur loke nan ta kere ta basá riba Bijbel. Nan ta ‘proba cu texto’ (esta, duna un cita bíblico pa apoyá) casi tur declaracion di fe, aceptando sin mas e autoridad di Bijbel, cua ta substituí tradicion henteramente.” E buki Religion in America ta declará: “E grupo nunca a desviá vacilá for di su enfoke riba studio di Bijbel, i su siñansanan ta ser sostené pa un sistema extenso di referencia na scritura.”

Ken Ta Nan Lider?

Ta precisamente debí n’e apego estricto aki na siñansa bíblico cu e veneracion i idolatria di lider humano asina característico di cultonan awe no ta ser hañá entre Testigonan di Jehova. Nan ta rechasá e concepto di un distincion di clero cu laico. The Encyclopedia of Religion aptamente ta declará tocante Testigo di Jehova: “Un clase di clero i títulonan distintivo ta prohibí.”

Nan ta sigui Jesucristo como nan Lider i como Cabes dje congregacion cristian. Tabata Jesus kende a bisa: “Boso no sea yamá Rabi, pasobra un so ta boso maestro, miéntras cu boso tur ta ruman. Ademas, no yama ningun hende boso tata riba tera, pasobra un so ta boso Tata, Esun celestial. Ni no sea yamá ‘lider,’ pasobra un so ta boso Lider, e Cristo.​—⁠Mateo 23:​8-12.

Ta claro cu Testigonan di Jehova ta mes leu for di ta un culto cu Jesus tabata for di ta un golos i un buraché. Ta cierto cu no ta tur hende cu a ser influenciá p’e informenan falsu tocante Jesus i su disipelnan a cai den e trampa di calumni’é. Algun kisas simplemente a ser mal-informá. Si bo tin pregunta tocante Testigo di Jehova i nan creencianan, pakico no busca pa conocé nan mihó? Porta di nan Salon di Reino ta hanchu habrí pa tur cu ta busca e berdad.

Abo tambe por saca beneficio for di nan investigacion cuidadoso pa conocimentu exacto di Bijbel i siña con pa adorá Dios na armonia cu e palabranan di Jesus: “E ora ta bini, i ta awor, ora cu berdadero adoradornan lo adorá e Tata cu spiritu i cu berdad, pasobra, en realidad, e Tata ta busca hende asina pa ador’é.”​—⁠Juan 4:⁠23.