Competencia Ta Clave pa Bon Éxito?

“GANAMENTO no ta tur cos, e ta e único cos.” Awe hopi hende ta biba di acuerdo cu tal palabra, atribuí hopi bez ne entrenador di futbol americano, Vince Lombardi. Awor, país ex-comunista ta participa den dunamento di elogio ne principio di competencia. Segun algun hende, e introduccion di competencia den nan mercado ta loke ta necesario pa logra prosperidad. Den país oriental hopi mayornan ta haci nan yiu competi cu otro mucha i ta mándanan na scol special pa tuma curso cu ta síñanan e maña di pasa examen di matriculacion. Mayornan ambicioso ta keda convencí di cu matriculacion den scol prestigioso ta clave pa un futuro próspero.

Hopi hende ta kere firmemente cu competencia ta clave pa bon éxito. Segun nan kerimento, hende a progresa mediante competencia cu otro. “Competencia pa promocion ta e fuente di vitalidad di compañía haponés,” segun 65,9 porciento di ehecutivo di compañía principal segun un incuesta di e Federacion di Organizacion Económico di Hapón. I ta parce cu compañía haponés a goza bon éxito pa basta tempo. Sin embargo, competencia realmente ta clave pa bon éxito?

Berdaderamente Probechoso?

Hende cu ta competi contra otro ta manifesta egoísmo, un actitud di ami promé. Nan ta feliz ora otro hende ta pasa malu, imaginando cu esei lo resulta den mehoramento di nan mes situacion. Pa nan mes probecho egoísta, nan por usa tacto perhudicial pa otronan. Tal buscamento di bon éxito via competencia lo resulta den kico? Yasuo, cu a ocupele totalmente den e carreda di ser un persona importante den su compañía, ta corda su camina di antes i a bisa: “Yen di spiritu di competencia i idea di promove mi mes, mi a compara mi mes cu otro hende i a sintími superior. Ora tal hende tabata poní den un puesto mas halto cu mi, mi a yora i a keha tur dia tocante e maneho dje compañía di nan personal. Berdaderamente, mi no tabatin ningun amigo.”

E spiritu di competencia també por resulta den morto inoportuno. Di ki manera? E curant haponés na idioma inglés Mainichi Daily News ta relacioná karoshi, of morto resultando di demasiado trabao, cu conducta di tipo A. Tipo A ta detayá e moda di conducta cu ta trata cu presion debí na demasiado preocupacion cu uso efectivo di tempo, competencia, i rivalidad. Cardiólogo americano Friedman i Rosenman ta relacioná conducta di tipo A cu maleza di curazón. Sí, e spiritu di competencia por ta fatal.

Competencia den e lugar di empleo por resulta den otro dificultad fisical i mental també. Un ehempel ta Keinosuke, cu tabata e mihor bendedor di auto pa un agencia principal di auto na Hapón. El a logra un máximo, bendiendo un total di 1.250 auto. Nan a pone su portret den leishi i a colgué den e sala di directiva dje compañía den su oficina central. Aunque e no a gusta usa colega di trabao pa su mes probecho pa alcanza promocion, e compañía a forzé di competi. Como resultado, den un aña el a haya úlcera tanto di stoma como di tripa. E mesun aña, 15 ehecutivo di su compañía tabata hospitalizá, i uno a comete suicidio.

Na cas e actitud di competi cu beciña ta forza hende pa haci exhibicion grandioso di nan medio di biba den un rivalidad sin fin. (1 Juan 2:16) Esei ta probechoso pa comercialismo so, poniendo placa den man di comerciante di mundo.​—⁠Compara cu Revelacion 18:⁠11.

Aunque e spiritu di rivalidad i competencia por produci maña den e trabao, no ta straño cu rey Salomón a bisa: “Mi mes a mira tur e trabao duro i tur e maña den trabao, cu ta nifica rivalidad un pa cu otro; esei també ta banidad i un lucha tras di bientu.” (Eclesiastés 4:⁠4) Pues, con nos por mantene trankilidad mental bibando den un mundo di competencia? Pa nos haya sa, láganos mira promé unda e idea di competencia a cuminza.