Trankilidad di curazón den un mundo di competencia
JESUCRISTO a duna e sigiente conseho na su apóstolnan: “Si uno kier bira promé, e mester bira e último di tur i sirbidor di tur.” E apóstolnan tabata debati en cuanto cua di nan tabata mayor. Nan tabata sa cu Jesús no a gusta tal clase di spiritu. Jesús nunca a pone su disípel competi cu otro como un manera pa promove progreso spiritual.—Marco 9:33-37.
Promé cu el a bini na mundo, Jesucristo a participa den e creacion dje promé pareha humano i a conoce nan composicion. (Colosense 1:15, 16) E promé hendenan tabata creá cu e capacidad di progresa sin competi cruelmente cu otronan. Hende no tabatin cu bringa cu otro pa determina ken tabata nan cabez, ni nan no tabatin cu competi cu bestia den un lucha pa sobrebiba.—Génesis 1:26; 2:20-24; 1 Corintio 11:3.
E origen dje spiritu di competencia
Di ki manera, anto, e spiritu di competicion cruel a bira asina un forza dominante den humanidad? E promé caso di asesinato den historia humano ta duna un idea. Un spiritu di competencia di parti di Caín, e yiu mayor dje promé pareha humano, a resulta den tragedia. Caín a mata su ruman Abel pasobra e sacrificio di Abel a agrada Dios, pero esun di Caín no a agradé. I e Bijbel ta bisa cu Caín “a origina cu e malbado i a mata su ruman.”—1 Juan 3:12; Génesis 4:4-8.
Sí, e malbado, Satanás e Diabel, ta originador i promovedor dje spiritu di competencia. Aunque e tabata un yiu angelical di Dios cu privilegio halto, el a deseá mas. (Compara cu Ezekiel 28:14, 15.) Ora el a seduci Eva, el a revela su mes deseo. El a bisa cu door di come e fruta prohibí, Eva “mester bira manera Dios.” (Génesis 3:4, 5) Realmente, Satanás a deseá di ser manera Dios, un rival di Jehova. Un spiritu di competencia contra Dios a instigué pa rebela.—Santiago 1:14, 15.
Tal spiritu ta contagioso. Bao di influencia di Satanás, e paz cu Dios a duna ne arreglo original di famía tabata perdí. (Génesis 3:6, 16) Desde su rebelion contra Dios, Satanás e Diabel a domina humanidad, criando un spiritu di competencia, asta gañando hende homber i muher pa kere cu competencia cruel ta clave pa bon éxito. Sin embargo, e Bijbel ta splica: “Unda cu tin envidia i pleitu, tin desordu i tur cos baho.” (Santiago 3:14-16) Asina Satanás a horta hende di nan felicidad i trankilidad di curazón.
Bon éxito sin competencia
Na contraste cu e contencion di Satanás, e Bijbel ta duna ehempel di bon éxito sin competencia. E ehempel principal ta esun di Jesucristo. Aunque el a existi den e forma di Dios, e nunca a pensa di ser igual cu Dios sino a tuma forma di esclabo i a bini na mundo. Mas cu esei, el a humiya su mes i a bira obediente te na morto riba e staca di tormento. Tal actitud obediente, sin ningun spiritu di rivalidad, a resulta den su ganamento di fabor divino. “P’sei mes també Dios a halzé te na un puesto superior i bondadosamente a duné e nomber cu ta mas halto cu tur otro nomber.” (Filipense 2:5-9) Cua éxito mayor cu esei cualkier persona por alcanzá? El a agrada su Tata te ne grado cu ningun otro persona por haci, i el a haci esei sin ningun spiritu di rivalidad of competencia.—Proverbio 27:11.
E cantidad di angel fiel den cielo ta demonstra e mesun actitud. Aunque Jesús, cu tabata cabez dje angelnan, a bira un poco mas inferior cu nan ora el a bini na mundo, e angelnan boluntariamente a satisface su necesidadnan. Claramente, ningun idea di probecha dje situacion pa reemplazé como Arcangel a drenta nan mente.—Mateo 4:11; 1 Tesalonicense 4:16; Hebreo 2:7.
Nan disgusto dje actitud di competencia ta keda asta mas bisto ora nos ta considera e manera cu nan a reacciona ne propósito di Dios di halza algun hende imperfecto te na bida inmortal spiritual, den cua estado nan “lo huzga angel.” (1 Corintio 6:3) Angel tin un abundancia di experencia den e sirbishi di Jehova i ta hopi mas capaz cu hende imperfecto pa haci bon. Sin embargo, angel ta sirbi fielmente e ungínan riba tera, i nunca ta envidiá loke nan lo recibi. (Hebreo 1:14) Nan actitud excelente sin competencia ta haci posibel pa nan sigi sirbi dilanti dje trono di Señor Soberano Jehova.
Anto, corda fiel sirbidor di Dios di antigua cu lo ser resusitá riba tera. Abraham tabata un ehempel sobresaliente di fe i tabata yamá “tata di tur hende cu tin fe.” (Romano 4:9, 11) Job a pone un ehempel excelente di awante. (Santiago 5:11) Moisés cu, “tabata hopi mas manso cu tur hende cu tabata riba e superficie dje tera,” a hiba e nacion di Israel na libertad. (Número 12:3) Ken den humanidad imperfecto a pone un mihor ehempel di fe, awante, i humildad cu e hendenan ei? Sin embargo, nan ta puesto pa hereda e dominio terrenal dje Reino di Dios. (Mateo 25:34; Hebreo 11:13-16) Mescos cu Juan bautista, nan lo ser calificá mas inferior cu “un persona cu ta un menor den e reino di cielo.” (Mateo 11:11) Nan sikiera lo pensa di keha, insistiendo cu nan fe, awante, of humildad ta igual of den algun caso ta superior cu loke esnan duná bida celestial tin? Claro cu no! Nan lo ser ciudadano terrenal feliz dje Reino di Dios.
Awe, també, hende sin e actitud di competencia ta compañía agradabel. Yasuo, mencioná den e promé artículo, a hayé cu debe grandísimo debí na speculacion den oro i a perde tur su propiedad. Su “amigonan” a bandoné. Siendo cu su esposa a cuminza studia e Bijbel cu Testigo di Jehova, el a bai na nan reunion cu un sintimento di remordimento pe sufrimento cu el a causa su famía. Cu tempo, el a libré di actitud di competencia i a bira un Testigo di Jehova. Awor e ta feliz den compañía di amigo cristian, e sorto cu ta dispuesto pa yudé den tempo di afliccion.
Con pa mantene trankilidad di curazón
No ta semper fácil pa mantene trankilidad di curazón den un mundo practicando competencia sin piedad. Ta mashá consehabel pa tuma nota di loke e Bijbel ta condená: “Enemistad, pleitu, jaluzi, atake di rabia, contencion, desunion, secta, envidia” como “obra di carni” cu ta stroba hende di hereda e Reino di Dios. Tur obra asina ta traha hunto cu e spiritu di competencia. No ta straño cu apóstol Pablo a anima galatio pa: “Láganos no bira egotista, instigando competencia un cu otro, envidiando otro.”—Galatio 5:19-21, 26.
Den su contexto, e carta di Pablo a mustra loke ta clave pa enfrenta competencia egotista. El a bisa: “Fruta di spiritu ta amor, gozo, paz, gran pacenshi, bondad, husticia, fe, suavidad, dominio propio. No tin ley contra tal cosnan.” (Galatio 5:22, 23) Fruta di spiritu ta yúdanos libra nos mente di rivalidad. Considera por ehempel, e calidad di amor. Pablo a splica cu “Amor no ta jaluz, no ta gaba, no ta hincha cu orguyo, no ta comportele indecentemente, no ta busca su mes interés, no ta bira provocá.” (1 Corintio 13:4-7) Cu nos cultivacion di amor, nos por vence jaluzi, un forza cu ta provoca e spiritu di competencia. Otro fruta di spiritu també ta yúdanos laba nos curazón i mente limpi di cualkier retazo dje spiritu di competencia cruel. Sí, cu dominio propio cualkier impulso cu ta nace pa competi contra otro pa nos gana cueste loke cueste por ta sofocá pronto!—Proverbio 17:27.
Sin embargo, pa nos cultiva tal calidad, nos mester laga e spiritu di Dios obra den nos. Nos por anima tal desaroyo saludable di spiritu santo door di persevera den oracion i pidi e spiritu di Dios yúdanos. (Lucas 11:13) Contestando nos oracion, kico Dios lo dúnanos? E Bijbel ta contesta: “No keda ansioso riba nada, sino den tur cos via oracion i súplica hunto cu agradicimento, duna di conoce boso peticion na Dios; i e paz di Dios cu ta surpasa tur pensamento lo warda boso curazón i boso facultad mental mediante Cristo Jesús.”—Filipense 4:6, 7.
Esei tabata bisto den e caso dje apóstolnan di Jesús. Asta despues cu Jesús a iniciá e Cena di Señor durante su último anochi cu e apóstolnan, nan tabata pleita ainda tocante cua di nan a parce di ser mayor. (Lucas 22:24-27) Jesús na diferente ocasion a purba di yúdanan corrigi nan pensamento, pero tal spiritu di competencia tabatin raíz profundo den nan. (Marco 9:34-37; 10:35-45; Juan 13:12-17) Pero, una bez cu nan a recibi e spiritu santo mas cu 50 dia despues dje pleitu ei, nan actitud a cambia. No tabatin argumento en cuanto ken lo representánan pa papia cu e multitud curioso cu a reuni riba e dia di Pentecoste.—Echo 2:14-21.
No tabatin lugar pa dominacion humano riba e congregacion cristian. Ora nan tabatin cu resolve e problema tocante circuncision, Santiago, cu ni sikiera tabata un disípel ne tempo dje morto di Jesús, a presidi ne reunion importante. No tin indicacion di pleitu riba ken lo hiba e delantera na tal reunion dje cuerpo gobernante dje congregacion cristian. Ki un cambio for dje tempo ora e apóstolnan tabata contaminá cu e spiritu di competencia! Cu e yudanza dje spiritu santo, nan a corda e siñanza di Jesús i a cuminza capta e sentido di su les.—Juan 14:26.
Mescos por ta cierto cu nos. Cu e yudanza dje spiritu santo, nos por vence cualkier impulso cu ta resta pa hácinos competi cu otronan afin di haci progreso riba nan custía. Mas bien, nos por gana e trankilidad di curazón cu ta surpasa tur pensamento. E Bijbel ta dúnanos e siguranza di cu e fuente di competencia cruel, Satanás e Diabel, lo ser tirá den e abismo pronto, hací inactivo. (Revelacion 20:1-3) Rivalidad entre próhimo lo no existí mas. Esei lo ser un mundo sin progreso? Di ningun manera! Hende lo alcanza perfeccion, no pa medio di competencia un cu otro, sino pa medio dje aplicacion dje sacrificio di rescate di Jesús na nan.—1 Juan 2:1, 2.
Keinosuke, mencioná anteriormente, cu na antes a experimenta e gloria di bon éxito den e mundo aki, bendiendo un cantidad máximo di auto, a gasta su mes mental i físicamente, pero finalmente el a kita for di su trabao. El a bisa, “Awor mi bida ta yen di berdadero gozo.” El a yega di mira pakico berdadero éxito a destacá e bida di Jesús. Awor e ta haya refrescamento den cualkier cos cu e por haci den e congregacion mundial di Dios. Asina e ta ser prepará pe mundo nobo, locual lo ser sin competencia. Abo també por haya un prevista dje arreglo dje mundo nobo, bishitando un Salón di Reino den bo becindario i asociando cu Testigo di Jehova.
[Caption on page 7]
Humanidad por disfruta di paz i cooperacion den e mundo nobo di Dios