Fruta​—⁠bon I Malu

“Jehova a mustrámi, i, mira! dos macuto di figu . . . En cuanto un macuto, figu tabata mashá bon, manera figu temprán; i en cuanto e otro macuto, figu tabata mashá malu, di manera cu hende no por cómenan pe malu cu nan tabata.”​—⁠JEREMÍAS 24:​1, 2.

TABATA aña 617 PEC. Tabata net diez aña promé cu e huicio merecí di Jehova tabata ehecutá contra Jerusalem i su pueblo. Jeremías a predica vigorosamente pa 30 aña caba. Tuma nota di detaye bibo cu Esdras a duna dje situacion, locual ta hayá den 2 Crónica 36:15: “Jehova e Dios di nan antepasado a sigi manda [aviso] contra nan pa medio di su mensaheronan, mandando bez tras bez, pasobra el a sinti compasion pa su pueblo i pa su habitacion.” I kico tabata e resultado di tanto esfuerzo? Lamentablemente, Esdras a sigi relatá den versículo 16: “Pero nan tabata burla continuamente di mensahero dje Dios berdadero i despreciá su palabra i tene mofa di su profetanan, te cu e furia di Jehova a subi contra su pueblo, te cu no tabatin curacion.”

² Esei kier men cu e nacion di Hudá tabata completamente exterminá? Pa haya e contesta, láganos considera un vision importante cu tabata duná ne tempo ei na Jeremías i skirbí den capítulo 24 dje buki cu ta carga su nomber. Dios a usa dos macuto di figu den e vision pa simboliza sosodimento den su pueblo di pacto. Dos sorto di fruta distinto a simbolizánan, bon i malu.

³ Jeremías capítulo 24, versículo 1 i 2, ta duna detaye di loke e profeta di Dios a mira: “Jehova a mustrámi, i, mira! dos macuto di figu poní dilanti dje tempel di Jehova, despues cu Nabucodonosor e rey di Babilonia a hiba preso Jeconías e yiu di Jehoiaquim, e rey di Hudá, i prinz di Hudá i artisano i constructor di bolwerk, foi Jerusalem pe híbanan na Babilonia. En cuanto un macuto, figu tabata mashá bon, manera figu temprán; i en cuanto e otro macuto, figu tabata mashá malu, di manera cu hende no por cómenan pe malu cu nan tabata.”

Bon figu dje vision

⁴ Despues di a puntra Jeremías tocante loke el a mira, Jehova a sigi bisa den versículo 5 te 7: “Manera bon figu, asina lo mi considera preso di Hudá, cu lo mi manda foi dje lugar aki ne tera di caldeo, di bon manera. I lo mi fiha mi wowo riba nan di bon manera, i siguramente lo mi hácinan bolbe ne tera aki. I lo mi edificánan, i lo mi no kibra; i lo mi plántanan, i lo mi no roza. I lo mi dúnanan un curazón pa conocémi, cu mi ta Jehova; i nan mester bira mi pueblo, i mi mes lo bira nan Dios, pasobra nan lo bolbe cerca mi cu tur nan curazón.”

⁵ Pues, segun loke Jehova a bisa ei, ta parce cu un mihor tempo tabatin cu bini, cu e nacion di Hudá lo no ser exterminá completamente. Pero, kico ta e nificacion dje macuto di bon figu?

⁶ Jeconías, of Jehoiaquin, tabata rey riba Hudá pa tres luna i diez dia so promé cu el a entrega Jerusalem boluntariamente na rey Nabucodonosor. Hunto cu esnan hibá preso cuné den destierro tabata Daniel i su tres compañé hebreo, Hananías, Misael, i Azarías, i també Ezekiel. E rey di Babilonia a conserba e bida di tal catibo, di manera cu Jeremías por a bisa cu Jehova a considera cu nan tabata mandá di bon manera ne tera di caldeo. Bo a ripara cu Jehova també a priminti di ‘fiha su wowo riba nan di bon manera’? Con esei tabata cumplí? Na aña 537 PEC, 80 aña despues, Jehova a haci rey Ciro saca un decreto cu a permiti un resto di nan desendiente bolbe ne tera di Hudá. Tal hudío fiel a reedifica e stad di Jerusalem; nan a edifica un tempel nobo pe adoracion di nan Dios, Jehova; i nan a bolbe na dje cu tur nan curazón. Pues, den tur esei, pa Jehova tal catibo i nan desendiente a parce mashá figu temprán di mashá bon calidad.

⁷ Tal bez bo ta corda cu den e artículo anterior tocante e palabra profético di Jeremías, nos a siña cu nan tin un nificacion pa nos siglo 20. I capítulo 24 no ta diferente. Durante e añanan scur di Gera Mundial I, hopi sirbidor dedicá di Jehova a háyanan bao di influencia di Babilonia e Grandi di un manera of otro. Pero e wowo vigilante di Jehova ‘tabata riba nan di bon manera.’ P’sei, mediante Ciro Mayor, Cristo Jesús, Jehova a kibra e poder di Babilonia e Grandi riba nan i gradualmente a híbanan na un paradijs spiritual. Tal israelita spiritual a reacciona i a bolbe na Jehova cu tur nan curazón. Anto, na 1931, nan a acepta cu gusto e nomber Testigo di Jehova. Berdaderamente, nan por a bisa ne tempo ei cu nan a bira manera un macuto di mashá bon figu den bista di Jehova.

⁸ I Testigo di Jehova no a perde e propósito dje bondad inmerecida di Dios pa su liberacion di nan for di Babilonia e Grandi. Nan no a warda pa nan mes e dulzura di figu dje mensahe di bon nobo di Reino, sino a proclamé na tur parti di acuerdo cu e palabra di Jesús den Mateo 24:14: “E bon nobo di reino lo ser predicá den tur e tera habitá como testimonio pa tur nacion.” I cu ki resultado? Mas cu 4.700.000 hende semehante di carné cu no ta israelita spiritual a sali liber for di Babilonia e Grandi!

Figu malu dje vision

⁹ Pero, kico dje macuto di figu malu den e vision di Jeremías? Awor Jeremías a fiha su atencion riba e palabra di Jehova hayá den Jeremías capítulo 24, versículo 8 te 10: “Mescos cu figu malu cu hende no por come pe malu cu nan tabata, esaki realmente ta loke Jehova a bisa: ‘Asina lo mi duna Sedequías rey di Hudá i prinz di dje i e resto di Jerusalem cu ta resta den e tera aki i esnan cu ta biba den e tera di Egipto​—⁠lo mi dúnanan també pa un temblamento, pa calamidad, den tur reino dje tera, pa reproche i pa declaracion proverbial, pa desprecio i pa maldicion, den tur lugar na locual lo mi plámanan. I lo mi manda spada contra nan, hamber i pest, te cu nan ta caba for dje tera cu mi a dúnanan i nan antepasado.’ ”

¹⁰ Asina Sedequías berdaderamente a resulta di ser un ‘figu malu’ den e bista di Jehova. E no solamente a rebela contra rey Nabucodonosor, kibrando e huramento di lealtad cu el a haci ne rey den e nomber di Jehova sino també el a rechaza completamente e compasion cu Jehova a extende na dje mediante Jeremías. Realmente, e asta a bai asina leu cu el a encarcela Jeremías! No ta straño cu Esdras a duna e resumen dje actitud dje rey cu el a skirbi den 2 Crónica 36:12: “El a sigi haci loke tabata malu den bista di Jehova su Dios. E no a humiya su mes.” Den e bista di Jehova Sedequías i hende cu a resta den Jerusalem tabata manera un macuto di figu malu i putrí!

Figu putrí simbólico den nos tempo

¹¹ Awor, tira un bista riba e mundo djawe. Bo ta kere cu nos por haya un macuto simbólico di figu malu? Láganos considera e echonan comparando nos tempo cu e tempo di Jeremías. Den siglo 20 aki, Jehova Dios a usa e grupo cu Jeremías a simboliza, e resto ungí, pa adverti e nacionan continuamente di su binidero furia den e tribulacion grandi. El a urgi grupo nacional pa duné e gloria cu su nomber ta merece, pa adoré cu spiritu i berdad, i pa reconoce su Yiu reinante, Cristo Jesús, como Gobernante propio dje tera. Kico ta nan reaccion? Mescos cu den e tempo di Jeremías. E nacionan ta sigi haci loke ta malu den e bista di Jehova.

¹² Ken ta esnan cu ta instiga tal actitud rebelioso? Ken ta sigi haci burla di mensahero di Dios semehante di Jeremías, dudando nan autoridad di actua como sirbidor di Dios? Ken ta sigi desprecia e Palabra di Dios? Ken awe ta responsabel pa tur e persecucion di Testigo di Jehova? E contesta ta keda bisto pa tur hende mira​—⁠esei ta cristiandad, i specialmente e clero! I mira tur e fruta malu i putrí di cristiandad cu nos a considera den e artículo anterior. Ai sí, siguramente ta existi un macuto simbólico di figu malu den e mundo djawe. Realmente, Jehova Dios ta bisa cu hende “no por cómenan pe malu cu nan tabata.” E palabra di Jehova mediante Jeremías ta klink te na nos dia: ‘Nan lo yega na nan fin’! E rabia di Jehova contra cristiandad lo no haya curacion.

Un les spiertador pa nos

¹³ Ora nos ta examina e nificacion dje mensahe spiertador inspirá di Jeremías, e palabra di apóstol Pablo den 1 Corintio 10:11 ta klink den nos orea: “Awor e cosnan ei a sigi sosodénan como ehempel, i nan tabata skirbí como spiertamento pa nos riba ken e fin dje sistema di cosnan a yega.” Nos personalmente ta tuma na pecho e spiertamento indicá pa nos den e vision dje dos macuto di figu? Loke nos a considera ta un parti esencial di loke a pasa Israel como un ehempel spiertador pa nos.

¹⁴ Finalmente, láganos corda e palabra di Jehova duná na rey David en cuanto Israel, hayá den 2 Samuel 7:10: “Lo mi siguramente siñalá un lugar pa mi pueblo Israel i plántanan.” Jehova a cuida tiernamente su pueblo, Israel, di tur manera. Tabatin tur motibo pa israelita produci bon fruta durante nan bida. Nan tabatin cu solamente scucha e siñanza divino di Jehova i warda su mandamento. Pero, un poco so di nan a haci esei. E mayoría tabata asina obstiná i rebelde cu nan a produci fruta malu i putrí.

¹⁵ Pues, anto, kico di nos dia? Jehova a mustra hopi compasion pa su resto di Israel spiritual i nan compañénan semehante di carné. Su wowo tabata riba nan constantemente desde nan liberacion spiritual na 1919. Manera el a profetiza mediante Isaías, nan ta recibi instruccion divino diariamente for dje Maestro mas importante di universo, Jehova Dios. (Isaías 54:13) Tal siñamento divino, cu su Yiu stimá, Jesucristo, ta dirigi, a resulta den paz abundante den nan i a trécenan na un relacion cada bez mas íntimo cu Jehova Dios. Ki un ambiente spiritual maraviyoso esei ta percura pa nos tur conoce Jehova, scuché, i sigi produci bon fruta den nos bida​—⁠fruta cu ta duna alabanza na Jehova! Esei ta nifica nos bida mes!

¹⁶ Pero, apesar di tur e bondad inmerecida di Dios, tin ainda algun cu ta bira rebelde i cu curazón duro, mescos cu hopi hende a haci den Hudá di antigua, i cu ta produci fruta malu i putrí den nan bida. Ki trágico esei tá! Láganos nunca perde bista dje les spiertador siñá na nos mediante e dos macuto di figu cu nan fruta​—⁠bon i malu. Segun cu e huicio merecí di Jehova contra cristiandad apóstata ta acelerá, láganos tuma na pecho e conseho di apóstol Pablo: “Boso camna digno di Jehova afin di agradé plenamente mientras cu boso ta sigi produci fruta den tur bon obra.”​—⁠Colosense 1:⁠10.

[Study Questions]

1. Con Jehova a mustra compasion pa su pueblo, Israel, pero con nan a reacciona?

2, 3. Duna detaye dje vision notable cu Jehova a mustra Jeremías.

4. Cua mensahe di consuelo e vision di figu a contene pa fiel israelita?

5, 6. (a) Di ki manera algun israelita tabata ‘mandá pa bai di bon manera’ na Caldea? (b) Con Jehova a ‘fiha su wowo di bon manera’ riba fiel israelita preso?

7. Na ki tempo i di ki manera e wowo di Jehova tabata riba e grupo moderno cu Jeremías a simbolizá “di bon manera”?

8. Di ki manera Testigo di Jehova a proclama e dulzura manera figu dje mensahe di Reino?

9. Figu malu dje vision di Jeremías a representa ken, i kico tin cu pásanan?

10. Pakico Jehova a calcula Sedequías di ser un ‘figu malu’?

11, 12. Ken den e dia djawe ta ser identificá como figu malu, i kico lo pásanan?

13. Den bista dje palabra di Pablo hayá den 1 Corintio 10:​11, con nos mester considerá e vision dje dos macuto di figu?

14. Con Israel a reacciona ne cuido tierno di Jehova?

15. Con Israel spiritual djawe i nan compañénan semehante di carné a reacciona ne compasion di Jehova?

16. Cua aplicacion personal cada un di nos por haci dje vision di dos macuto di figu?

[Caption on page 15]

Manera bon figu, e pueblo di Dios a produci fruta di Reino dushi

[Caption on page 15]

Cristiandad a resulta di ser manera un macuto di figu malu

[Caption on page 16]

Repaso di

“Fruta​—⁠bon i malu” i paragraf 1-4 di “E cuestion entre Jehova Dios i e nacionan”

◻ Kico macuto di bon figu ta representa?

◻ Con e vision dje macuto di figu malu a sali na cla?

◻ Cua les spiertador e mensahe di Jeremías ta percura pa nos?

◻ Kico tabata significante tocante e aña 607 PEC? i 1914 EC?