Un mihor mundo ta cerca!
“E ANHELO pa paradijs ta entre otro anhelo fuerte cu ta persisti den mente di ser humano. Esei por ta e anhelo di mas fuerte i mas persistente cu tur. Un cierto anhelo pa paradijs ta bisto den tur nivel di bida religioso,” segun The Encyclopedia of Religion.
Tur cultura ta parce di tene en común e deseo di biba den un mihor mundo, como si nan ta lamenta un ideal original cu no ta existi mas. Esei ta indica e posibilidad di un paradijs original, pero na unda? Un sicoanalista por bisa cu tal aspiracion ta revela e deseo di recobra e siguridad perdí di matriz di mama. Pero, tal splicacion no ta convence homber escolástico cu ta studia e historia di religion.
“Anhelo pa paradijs”—pakico?
Existencia di tal anhelo, manera algun hende ta sugeri, ta sirbi solamente pa haci dificultad i e bida pasahero di hende mas soportabel? Of, tin un otro splicacion?
Pakico hende ta anhela un mihor mundo? E Bijbel ta duna un splicacion cu ta claro i també senciyo: Humanidad a origina den un mihor mundo! E paradijs original realmente a existi. E Palabra di Dios ta pinté como “un hofi” situá na un cierto region den e Medio Oriente, bendicioná cu “tur palu deseabel ne bista di hende i bon pa cuminda.” Dios a confia e cuido di dje ne promé pareha humano. (Génesis 2:7-15) Esei tabata un situacion ideal den locual hende por a keda berdaderamente feliz.
Pakico e paradijs original no a sigi? Pa motibo dje rebelion, locual a cuminza cu un persona spiritual anto despues cu e pareha humano. (Génesis 2:16, 17; 3:1-6, 17-19) Asina, hende a perde no solamente e Paradijs sino també perfeccion, salud, i bida eterna. E situacion cu a cuminza prevalece siguramente no a mehora bida humano. Al contrario, esei a degenera progresivamente te na e culminacion cu nos ta mira actualmente, locual ta hopi mas malu cu nunca na antes.—Eclesiastés 3:18-20; Romano 5:12; 2 Timoteo 3:1-5, 13.
Buscamento pa Paradijs —e historia di un idea
Nos por wel imagina cu e “anhelo pa paradijs” tin un historia mashá largu. Hende sumerio a recorda un tempo ora armonía a prevalece den tur e universo: “No a existi miedu, ningun terror, hende no tabatin rival. . . . Henter e universo, e pueblo di acuerdo, cu un solo lenga a duna alabanza na Elil,” segun un poëma mesopotamio di antigua. Algun hende, manera egipcio di antigua, a spera di alcanza un mihor mundo despues di a muri. Nan a kere cu un alma inmortal a alcanza loke nan a yama e cunucu di Aru. Pero, por lo menos originalmente, tal speranza tabata disponibel solamente pa hende aristocrat; hende pober no por a soña di alcanza un mundo di felicidad.
Den un otro mundo religioso, hende hindú a spera e presentacion di un mihor época (yuga) mundial pa siglonan. Segun siñanza hindú, cuater yuga ta repiti nan mes den un ciclo continuo, i actualmente nos ta biba durante esun di mas malu. Desafortunadamente, e Kali Yuga aki (época di scuridad), cu tur su sufrimento i maldad, lo dura, segun algun hende, pa tanto como 432.000 aña. No obstante, hindú fiel ta spera e época di oro, e Krita Yuga.
En cambio, hende griego i romano a soña di alcanza Isla Afortunada di leyenda, den Lamá Atlántico. I hopi autor, tal como Hesíodo, Virgilio, i Ovid, a mencioná un maraviyoso época di oro original, cu e speranza di su restoracion un dia. Cerca e fin dje promé siglo PEC, Virgilio, e poëta latino a pronostica e yegada pronto di un aetas aurea (época di oro) nobo i eterno. Den siglonan despues, “no menos cu dieseis emperador romano a bisa cu nan reinado a reestablecé e Epoca di Oro,” segun The Encyclopedia of Religion. Pero, manera nos wel sa awe, esei tabata solamente propaganda político.
Hopi hende céltico a aspira na loke nan a kere tabata un tera briyante riba un isla (of grupo di isla) mas ayá cu lamá, unda nan a kere cu hende a biba den felicidad perfecto. Segun un leyenda, rey Arturo, aunque e tabata heridá mortalmente, a sigi biba despues cu el a descubri e maraviyoso isla yamá Avalón.
Den tempo di antigua i den Epoca Mediano, hopi hende a kere cu un hofi di gozo literal, e hofi di Eden, a existi ainda na un parti, “na punta di un montaña inalcanzabel of na otro banda di un lamá imposibel pa cruza,” segun historiador Jean Delumeau. Aunque e poëta italiano Dante a kere den un paradijs celestial, el a imagina cu un paradijs terrenal a existi ainda na punta dje montaña di su Purgatorio, na otro banda di mundo for di Jerusalem. Algun hende a kere cu paradijs por ta hayá den Asia, den Mesopotamia, of den montaña Himalaya. I leyenda di época mediano tocante e paradijs di Eden tabata basta abundante. Hopi hende a kere cu cerca tal paradijs a existi e fabuloso i maraviyoso reino dje pastor santo Juan. [Segun e leyenda e tabata un rey i sacerdote cristian.] Gracias ne cercanía dje paradijs terrenal, bida den e reino di pastor Juan supuestamente tabata largo i gozoso, un fuente continuo di abundancia i riqueza. Otro hende, cordando leyenda griego di antigua, a kere ainda cu isla di paradijs por ta descubrí den Lamá Atlántico. Mapa dje época mediano a mustra cu hende tabata mashá sigur di tal kerimento den e existencia dje hofi di Eden, asta indicando su supuesto sitio.
Den siglo 15 i 16, navegador cu a cruza Lamá Atlántico en efecto tabata busca un mundo cu tabata, ne mesun tempo, tanto nobo como bieu. Nan a kere cu na otro banda di lamá nan por haya no solamente Oost India sino també e hofi di Eden. Por ehempel, Cristóbal Colón a busca e hofi di Eden den montaña di tera templada i tera tropical di Centro i Suramérica. Explorador europeo cu a yega na Brasil a keda sigur cu paradijs perdí mester ta ei pa motibo dje clima suave i e abundancia di cuminda i berdura. Pero, pronto nan a keda obligá di reconoce e realidad cruel.
Utopia—un lugar ideal?
En bez di lucha pa descubri un mundo ideal den un parti remoto di mundo, otro hende a purba di planeá un mundo asina. P’sei, na aña 1516, e humanista inglés Thomas More a detayá e isla di Utopia como un lugar maraviyoso, trankilu, i tolerante, mashá diferente cu e mundo degradá cu el a conoce. Otro hende també a purba di planeá un mihor mundo, un mundo mas feliz: den siglo seis PEC, Platón cu su República; na aña 1602, e frère italiano Tommaso Campanella i su Stad di Solo sumamente organizá; i un poco aña despues, e filósofo inglés Francis Bacon cu su cuenta dje “estado feliz i próspero” di su Atlantis Nobo. Den e transcurso dje siglonan, pensador di tur sorto (sea hende religioso of no) a detayá dozenas tras dozenas di Utopia. Sin embargo, mashá poco, of ningun, tabata aceptá.
Tabatin hende cu a purba di traha nan mes Utopia. Por ehempel, na aña 1824 un homber ricu inglés, Robert Owen, a decidi di imigra na Indiana, EUA, pe realiza su idea di Utopia den e pueblo cu el a yama New Harmony. El a keda convencí di cu den bon circunstancia hende por mehora i el a gasta casi tur recurso cu e tabatin luchando pa establece loke el a imagina tabata un mundo moral nobo. Pero, e resultado a demonstra cu circunstancia nobo di biba no ta suficiente pa produci hende nobo.
Casi tur ideología político ta declara cu hende tin cu planeá e mundo conforme cu nan mes conocimento i nan mes opinion di loke ta cierto afin di introduci e paradijs riba tera di nan soño. No obstante, contradictoriamente, esfuerzo pa realiza tal aspiracion a resulta den gera i revolucion, tal como e Revolucion Francés na aña 1789 i e Revolucion Bolshiviki na aña 1917. En bez di introduci un mundo paradísico, tal esfuerzo hopi bez a resulta den mas dolor i sufrimento.
Aspiracion, plan, Utopia, i esfuerzo pa realizánan—esei ta un historia di un desilusion tras di otro. Actualmente, algun hende ta menciona un “soño frustrá” i e “fin dje época di Utopia,” invitando nos pa siña “biba sin Utopia.” Tin e speranza di mira un mihor mundo, of esei ta destiná di keda simplemente un soño?
Hende cristian i un mihor mundo
Un mundo nobo di ningun manera ta un soño—esei ta un speranza sigur! Jesucristo, e Fundador di cristianismo, tabata sa cu e mundo actual no ta mihor cu tur mundo posibel. El a siña cu hende di genio suave lo hereda e tera i cu e boluntad di Dios lo ser cumplí den dje. (Mateo 5:5; 6:9, 10) Tanto Jesús como su disípelnan tabata sa cu e mundo actual ta bao di control di Satanás e Diabel, enemigo di Dios, i cu esei ta e motibo principal di calamidad humano. (Juan 12:31; 2 Corintio 4:4; 1 Juan 5:19; Revelacion 12:12) Hudío fiel a spera e dia den locual Dios una bez i pa semper lo libra e tera di gera, dolor, i enfermedad afin di yena e tera cu amante di paz i husticia. Di igual manera, hende cristian dje promé siglo a spera cu confianza pe mundo actual ser reemplazá cu un sistema nobo di cosnan, un “cielo nobo i tera nobo.”—2 Pedro 3:13; Salmo 37:11; 46:8, 9; Isaías 25:8; 33:24; 45:18; Revelacion 21:1.
Ora Jesucristo tabata colgá riba e staca di tormento, el a repiti e promesa di un mihor mundo na un malechor cu a manifesta un cierto midí di fe den djE. “[Jesús] a bisé: ‘Berdaderamente mi ta bisábo awe, Lo bo ta cu mi den Paradijs.’ ” (Lucas 23:40-43) Segun e comprendimento dje malechor, kico e palabra ei a nifica? Jesús a bisa cu e malechor lo ta ‘cuné’ den cielo e mesun dia, manera cierto traduccion católico i protestante dje Bijbel ta parce di indica? No, esei no ta loke Jesús a nifica, siendo cu despues di su resureccion, Jesús a bisa María Magdalena cu ‘mi no a subi cerca e Tata ainda.’ (Juan 20:11-18) Aunque Jesús a siña su apóstolnan pa tres aña i mei, promé cu Pentecoste dje aña 33 EC ni sikiera eseinan a spera un paradijs celestial. (Echo 1:6-11) E malechor a comprende loke e mayoría grandi di hudío cu a biba ne tempo ei por a comprende: Jesús tabata priminti un mihor mundo binidero riba un tera paradísico. Un escolástico alemán a admiti: “E siñanza di castigo den un otro bida simplemente no ta existi den e Testament Bieu.”
Den su carta skirbí na hebreo, apóstol Pablo a confirma e echo di cu lo tin un paradijs riba tera. Ora el a anima otro hende creyente pa no ‘neglisha e gran salbacion cu a cuminza ser declará mediante Jesucristo,’ Pablo a declara cu Jehova Dios a duna Jesús autoridad riba e “tera habitá [griego, oi·kou·meʹne] cu ta bini.” (Hebreo 2:3, 5) Den e Scritura Griego Cristian, e palabra oi·kou·meʹne semper ta referi ne tera yená cu ser humano, i no na un mundo celestial. (Compara cu Mateo 24:14; Lucas 2:1; 21:26; Echo 17:31.) Pues, e Reino di Dios cu Cristo Jesús lo goberna lo eherce dominio riba e tera habitá. Esei realmente lo ser un lugar ideal pa biba den dje!
Aunque e Reino mes ta celestial, lo e metele toch den asunto dje tera. Cu cua resultado? Enfermedad, crimen, pobreza, i morto lo bira un memoria leu atrás. Asta frustracion i descontentu lo desparce. (Revelacion 21:3-5) E Bijbel ta bisa cu ‘Dios lo habri su man i satisface e deseo di tur cos bibiente.’ (Salmo 145:16) Problema tal como desempleo i contaminacion dje ambiente lo tin un solucion practico i permanente. (Isaías 65:21-23; Revelacion 11:18) Pero sobre todo, gracias ne bendicion di Dios, lo tin un triunfo di berdad, husticia, i paz—calidad cu ta parce di casi no existi mas!—Salmo 85:7-13; Galatio 5:22, 23.
Tur esei ta un soño, un Utopia? No, e tempo di mas crítico cu nunca den locual nos ta biba ta demonstra cu nos ta den e “último dianan” dje mundo aki i cu p’sei e mundo nobo ta cerca. (2 Timoteo 3:1-5) Bo kier biba den e mundo nobo? Siña con esei ta posibel, studiando e Bijbel cu Testigo di Jehova. Un mihor mundo ta cerca, hopi mas mihor cu nos hamás a soña. Esei no ta un Utopia—esei ta un realidad!
[Caption on page 7]
Un mihor mundo—pronto un realidad