Un mihor mundo​—⁠un soño so?

SI BO tabata un sigidor di zoroastrismo cu e profeta iranio Zoroastro a predica, bo por a spera e dia ora e tera lo a bolbe na su boniteza original. Si bo a biba den Grecia di antigua, kizás bo por a soña di alcanza Isla Afortunada paradísico of a mira e bolbimento dje Epoca di Oro cu poëta Hesíodo a detayá den siglo ocho PEC. Indjan guaraní di Suramérica tal bez ta buscando e Tera sin Maldad ainda. Bibando den nos tempo, tal bez bo ta spera pe mundo mehora debí na un ideología político of como resultado di reconocimento dje estado ecológico djawe.

Epoca di Oro, Isla Afortunada, Tera sin Maldad​—⁠eseinan ta entre otro nomber cu hende ta usa pa pinta e mesun anhelo, e speranza di un mihor mundo.

E mundo aki, nos mundo, siguramente no ta un lugar ideal. Crimen cu ta aumenta den brutalidad, gera cu violencia sin igual, unda ruman ta mata ruman, genocidio, indiferencia en cuanto sufrimento di otro hende, pobreza i hamber, desempleo i falta di solidaridad, problema ecológico, maleza incurabel cu ta afligi miyones di hende​—⁠e lista di calamidad actual ta parce sin fin. Pensando riba gera cu ta ser bringá actualmente, un periodista italiano a bisa: “Pregunta cu hende naturalmente ta haci ta si e sintimento di enemistad no ta e sintimento di mas fuerte di nos tempo.” Tumando na cuenta e situacion, bo ta kere cu ta realista pa aspira na algo diferente, algo mihor? Of tal aspiracion ta simplemente un anhelo pa Utopia, un isla paradísico, un soño cu nunca lo ser realizá? Nos ta biba den e mihor mundo hamás posibel?

Esei no ta un interés nobo. Pa siglonan hende a soña di un mundo den locual armonía, husticia, prosperidad, i amor ta prevalece. Den e transcurso di tempo, varios filósofo a expresá en detaye nan concepto di un situacion ideal, un mihor mundo. Pero, lastimosamente, nan nunca por splica con pa hacié funciona cu bon éxito.

Tal lista siglonan bieu, di soño, Utopia, i aspiracion pa un mihor mundo por síñanos algo?

[Caption on page 3]

Esaki ta e mihor mundo hamás posibel?