Un Mihó Bida—Pronto!

IMAGINA un pronosticador di tempu kende su pronósticonan casi semper ta sali berdad. Si e pronosticá den e noticiero djanochi cu awa lo yobe su siguiente dia, bo no ta duda pa bai cu bo paraplü ora bo sali cas e siguiente mainta. Su registro di pasado a gana bo confiansa. Bo ta actua riba loke e ta bisa.

Awor, con confiabel Jehova su promesa di un mihó bida riba un tera paradísico ta? Wel, kico su registro di pasado ta indicá? E cumplimentu di profecianan di Bijbel ta establecé Jehova su registro claramente. E ta un Dios di exactitud i veracidad infalibel. (Hosué 23:14; Isaías 55:11) Jehova Dios su promesanan ta asina confiabel cu tin biaha e ta papia en realidad di futuro sucesonan primintí como si ya nan a sosodé caba. Por ehempel, despues di primintí un mundu nobo den cua morto i lamento lo no existí mas, nos ta lesa: “Nan [e bendicionnan primintí] a acontecé!” Cu otro palabra, “Nan ta un echo!”—Revelacion 21:5, 6, nota.

Sí, e cumplimentu di Jehova su promesanan di pasado ta duna nos confiansa den e realisacion di su promesa di un mihó bida pa humanidad. Pero na ki tempu e mihó bida aki lo bini?

Un Mihó Bida—Na Ki Tempu?

Un bida muchu mas mihó lo bini pronto! Nos por ta sigur di esei pasobra Bijbel ta bisa cu hopi cos malu lo sosodé riba tera djis promé cu e Paradijs mester introducí un mihó bida. E cosnan malu ei ta tumando lugá awor.

Por ehempel, Jesucristo a pronosticá cu lo tin gueranan grandi. El a bisa: “Nacion lo lanta contra nacion i reino contra reino.” (Mateo 24:7) E profecia aki a cumpli. Durante e añanan di 1914 pa 1945, tabatin dos guera mundial, i esakinan a ser siguí pa un cantidad di otro guera den cua nacionnan a batayá cu otro. “Riba un base di promedio anual, e cantidad di mortonan di guera den e periodo aki [desde Guera Mundial II] tabata mas cu dobel e mortonan den siglo 19 i siete biaha mas tantu cu den siglo 18.”—World Military and Social Expenditures 1993.

E plamamentu di malesa ta un otro evidencia dje proximidad di un mihó bida den Paradijs. Jesus a profetisá cu lo tin ‘pest den un lugá tras di otro.’ (Lucas 21:11) E profecia aki a cumpli? Sí. Despues dje promé guera mundial, e griep spañó [kabouter] a mata mas cu 20 miyon hende. Desde e tempu ei, cancer, malesa di curason, malaria, AIDS i otro enfermedadnan a mata miyones di hende. Den paisnan den desaroyo, malesanan cu ta resultá for di awa contaminá (incluyendo diarea i infeccion di tripa causá dor di bichi) ta exigí miyones di bida tur aña.

Tambe Jesus a bisa: “Lo tin scarcedad di cuminda.” (Mateo 24:7) Manera a ser mencioná den e artículo anterior, e pobernan dje mundu no tin suficiente pa come. Esaki ta un otro parti dje evidencia cu un bida muchu mas mihó den Paradijs lo yega pronto.

“Lo tin temblornan grandi,” Jesus a bisa. (Lucas 21:11) Esaki tambe a cumpli den nos tempu. Desde 1914 destruccion causá dor di temblornan devastador a cobra cientos di miles di bida.

Ademas, Bijbel ta bisa mas aleu cu “e último dianan” lo ta marcá pa un cambio den hende. Nan lo ta “stimador di nan mes” i “stimador di placa,” i yunan lo ta “desobediente na mayornan.” Hende en general lo ta “stimador di placer mas bien cu stimador di Dios.” (2 Timoteo 3:1-5) Bo no ta di acuerdo cu hopi hende ta cuadra cu e descripcion aki?

Segun cu mas i mas hende ta practicá cosnan malu, tin un aumento den maldad. Esaki tambe a ser profetisá. Segun Mateo 24:12, Jesus a papia di un “aumento di maldad.” Probablemente lo bo ta di acuerdo cu crímen awor ta pió cu loke e tabata algun aña pasá. Tur caminda hende tin miedu cu nan lo ser hortá, defraudá of perhudicá den un of otro manera.

Guera, malesa na tur parti, scarcedad di cuminda, temblor, aumento di crímen i deterioro den relacionnan humano—tur esaki ta evidente awe, net manera Bijbel a profetisá. Lo bo puntra, ‘Pero e cosnan aki no a sosodé atrabes di henter historia humano? Kico ta diferente tocante nos tempu?’

Tin algun aspecto sumamente significativo di loke ta sosodiendo awe. Bijbel no ta bisa cu solamente un di cualkier dje rasgonan, manera scarcedad di cuminda, riba su mes lo ta prueba cu nos ta den e tempu di fin i cu un mihó bida ta cerca. E profecianan di Bijbel tocante e tempu di fin mester a cumpli riba un generacion sin dios.—Mateo 24:34-39; Lucas 17:26, 27.

Ademas, ta bastante extraordinario cu algun rasgo di Jesus su profecia—specialmente esnan tocante scarcedad di cuminda i malesa plamá tur caminda—ta cumpliendo awe. Pakico? Pasobra logronan científico nunca tabata mas grandi. Conocimentu médico i formanan di tratamentu nunca tabata mas avansá of mas plamá. Solamente Dios por a profetisá den su Palabra, e Bijbel, cu na un tempu asina, malesa i hamber lo bira pió, no mihó.

Siendo cu tur e profecianan di Bijbel tocante e tempu di fin, of “e último dianan,” ta cumpliendo, kico nos por concluí? Cu un mihó bida ta cerca! Pero con lo e ser realisá?

Un Mihó Bida—Con?

Bo ta kere cu hende por producí Paradijs? Atrabes di historia te n’e dia djawe, tabatin hopi tipo di gobiernu humano. Algun a haci hopi esfuerso pa satisfacé e necesidadnan dje pueblo. No obstante, hopi problema ta birando pió. Tantu den paisnan ricu como den esnan pober, gobiernunan ta lucha cu abusu di droga, vivienda inadecuá, pobresa, crímen, desempleo i guera.

Asta si gobiernunan por a resolvé algun dje problemanan aki, nan nunca lo por percurá libertad completo for di mal salú; ni nan lo no por pone un fin na behes i morto. Claramente anto, hende nunca lo trece un Paradijs riba e tera aki.

Bijbel ta bisa sabiamente: “No pone bo confiansa den e noblenan, ni den e yu di hende terenal, na ken ningun salbacion ta pertenecé.” Den ken, anto, nos mester pone nos confiansa? Bijbel ta contestá: “Felis ta esun kende tin e Dios di Jacob pa su yudansa, kende su speransa ta den Jehova su Dios.” (Salmo 146:3, 5) Si nos pone nos speransa den Jehova Dios, nos nunca lo keda desapuntá.

Siguramente Esun cu e sabiduria i poder pa crea e tera, e solo i e streanan tambe por haci e tera un paradijs. E por permití hende disfrutá di un mihó bida. Kico cu Jehova proponé pa haci, e por i lo logra. Su Palabra ta bisa: “Cu Dios ningun declaracion lo ta un imposibilidad.” (Lucas 1:37) Pero con Dios lo producí un mihó bida?

Jehova lo trece pa humanidad un bida muchu mas mihó mediante su Reino. I kico ta e Reino di Dios? Esei ta un berdadero gobiernu cu un Gobernante nombrá dor di Dios, Jesucristo. E Reino di Dios ta situá den cielu, pero pronto lo e trece bendicionnan maraviyoso i un bida muchu mas mihó p’e habitantenan dje tera paradísico.—Isaías 9:6, 7.

Kisas bo ta familiarisá caba cu Jesus su oracion modelo, hañá den Bijbel na Mateo 6:9-13. Parti dje oracion ei na Dios ta bisa: “Laga bo reino bini. Laga bo boluntad sea cumplí, mescos cu den cielu, tambe riba tera.” Na armonia cu e oracion ei, e Reino di Dios lo “bini” pa efectuá Jehova Dios su propósito p’e tera. I ta su propósito p’e tera bira un paradijs.

Un último pregunta ta surgi: Kico bo mester haci pa disfrutá di un mihó bida den e binidero Paradijs?

Loke Bo Mester Haci

Jehova Dios amorosamente ta extendé e prospecto pa un mihó bida den Paradijs na tur cu ta haci su boluntad. Bijbel ta bisa nos: “E hustunan mes lo poseé e tera, i nan lo biba pa semper riba dje.” (Salmo 37:29) Pero kico ta haci un persona hustu den bista di Dios?

Pa agradá Jehova nos tin cu siña mas tocante loke e kier pa nos haci. Si nos gana conocimentu di Dios i aplik’é den nos bida, nos por biba pa semper. Den un oracion na Dios, Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun kende bo a manda, Jesucristo.”—Juan 17:3.

E buki cu ta bisa nos tocante Jehova Dios i Jesucristo ta e Palabra di Dios, e Bijbel. E ta un di Jehova su donnan di mas precioso. Bijbel ta manera un carta for di un tata amoroso na su yunan. E ta bisa nos tocante Dios su promesa pa realisá un mihó bida pa humanidad i e ta mustra nos con nos por gan’é. Bijbel ta laga nos sa kico Dios a haci den pasado i kico lo e haci den futuro. Tambe e ta duna nos conseho práctico tocante con pa trata cu nos problemanan awor cu éxito. En berdad, e Palabra di Dios ta siña nos con pa haña un midí di felicidad asta den e mundu turbulento aki.—2 Timoteo 3:16, 17.

Testigonan di Jehova gustosamente lo haci areglo cu bo pa un studio di Bijbel grátis na cas. Siña con bo por tin un bida mas felis awor, cu e prospecto di un bida muchu mas mihó den futuro cercano.

[Plachi na página 5]

Profecianan di Bijbel ta indicá cu un mihó bida ta cerca

[Plachi na página 7]

E Reino di Dios lo introducí un mihó bida pa humanidad