Unda Bo Por Haña Guia Confiabel?

“MI SA masha bon, O Jehova, cu na hende terenal no ta pertenecé su caminda. No ta pertenecé na hende cu ta canando pa ni sikiera dirigí su paso. Corigí mi, O Jehova.”​—⁠Jeremías 10:​23, 24.

E escritor di Bijbel, Jeremías, a skirbi e palabranan ei rond di 25 siglo pasá. E condicion deplorabel di humanidad despues di miles di aña di aplicá guia humano ta proba e berdad irefutabel dje declaracion aki. Pero kisas bo ta puntra, ‘Unda hende por haña guia confiabel?’

E texto citá ariba ta señalá na un fuente di guia i direccion confiabel cu ta hopi mas superior cu hende​—⁠e Creador di hende, Jehova Dios. Siguramente ningun persona conocé e composicion di hende i su necesidadnan mihó cu nos Creador. No obstante, Dios ta interesá den duna nos tal guia i direccion? Con e ta haci’é? E ta práctico pa nos tempu?

Diseñá pa Ricibí Guia Divino

Ta bon-conocí cu un diferencia principal separando hende for di bestia ta drei rond dje structura, capacidad i funcionnan dje celebro humano. Den bestia casi tur e funcionnan celebral a ser programá den loke a bin ta ser yamá sabiduria instintivo. Esaki no ta e caso cu hende.​—⁠Proverbio 30:​24-28.

Distinto for di celebro di bestia, un gran parti dje celebro humano ta liber di instruccion programá. Dios a dota hende cu e facultad di boluntad liber, cua ta permití nan tuma decisionnan inteligente i desplegá cualidadnan superior, manera amor, generosidad, inegoismo, husticia i sabiduria.

Ta lógico pa pensa cu Dios a crea hende cu tal capacidad mental sin proveé algun clase di guia en cuanto con e por ser usá mihó? Dios a duna guia directo n’e promé hendenan. (Génesis 2:​15-17, 19; 3:​8, 9) Asta despues cu hende a cai den picá, Jehova a sigui guia homber i muhernan fiel, mas notablemente mediante su mes Palabra inspirá, e Bijbel. (Salmo 119:105) Esaki a permití hende enfrentá cu éxito e problemanan diario di bida segun cu nan ta usa nan boluntad liber sabiamente.

Fuente Divino di Bijbel

Kico ta haci Bijbel un fuente confiabel di guia? Entre otro, e ta presentá informacion cu solamente e Creador por a proveé. E ta describí e historia di sucesonan cu a tuma lugá hopi tempu promé cu e principio di bida humano. Por ehempel, e ta proveé e historia di con e tera a ser prepará den etapanan sucesivo te ora e tabata cla pa sostené bida humano. (Génesis, capítulo 1, 2) Aunke esaki a ser registrá den Bijbel mas cu 3.000 aña pasá, e ta cuadra cu conceptonan científico moderno.

Hopi promé cu humanidad en general a aceptá cu e tera tabata rondó, Bijbel a declará: “[Dios] ta extendiendo e nort riba e lugá bashí, cologando e tera riba nada.” (Job 26:⁠7) Ademas, Bijbel ta revelá cu “tin Unu kende ta biba riba e círculo dje tera, di cua su habitantenan ta manera dalakochi.” (Isaías 40:22) Solamente Dios, e Creador, por a duna e detaye aki.

E abilidad pa mira delantá loke tin den futuro no ta un don cu a ser duná na hende. Mas bien, e Creador ta pronosticá e futuro mediante e páginanan di Bijbel. Dios a inspirá e profeta Isaías pa skirbi di djE: “Ami ta Esun Divino i no tin otro Dios, ni ningun manera mi; Esun cu ta declará desde e principio e final i desde hopi tempu atras e cosnan cu no a ser hací.”​—⁠Isaías 46:​9, 10.

Bijbel a demostrá cu e por pronosticá e final desde e principio cu exactitud asombroso. Por ehempel, el a pronosticá e lantamentu, e caida i e característicanan dje imperionan mundial principal durante miles di aña di historia humano. E profecianan remarcabel aki a ser skirbí siglonan promé cu nan cumplimentu, den algun caso miles di aña delantá. Asina Bijbel ta pronosticá cu exactitud sucesonan di dia moderno, i tambe nan cumplimentu final. Bijbel ta único tambe pasobra e ta señalá n’e caminda di sobrebibencia durante e destruccion di gobiernu humano imperfecto na Armagedon, “e guera dje gran dia di Dios e Todopoderoso.” E Reino di Dios den man di su Yu, Jesucristo, lo efectuá e gran obra ei.​—⁠Revelacion 16:​14, 16; 17:​9-18; Daniel, capítulo 2, 8.

Semper Beneficioso ​—⁠Nunca Perhudicial

Simpel sabiduria humano ta imperfecto; p’esei, conseho humano no ta semper beneficioso, maske kisas e ta ser duná cu bon intencion. Esaki no ta e caso cu e conseho di Bijbel. Dios mes ta bisa: “Ami, Jehova, ta . . . Esun cu ta siñá bo pa beneficiá bo mes, Esun cu ta hací bo trapa den e caminda den cua bo mester cana. O si bo realmente presta atencion na mi mandamentunan! Anto bo pas lo yega di ta hustamente manera un riu, i bo husticia manera e olanan di laman.”​—⁠Isaías 48:​17, 18.

Guia divino ta yuda nos fiha prioridadnan i pega na balornan superior den bida. Miéntras sociedad moderno ta pone énfasis riba logro i metanan material, Bijbel ta enfatisá ki balioso ta pa nos “fiha nos wowonan, no riba e cosnan cu hende ta mira, sino riba e cosnan cu hende no ta mira. Pasobra e cosnan cu hende ta mira ta temporal, pero e cosnan cu hende no ta mira ta eterno.” (2 Corintio 4:18) Den e manera aki nos ta ser animá pa tene e metanan di mas excelente den bida, esta, metanan spiritual relacioná cu hacimentu dje boluntad di Dios, e meta final siendo esun di bida eterno den un hustu sistema nobo.

Segun cu e hende cristian ta haci esfuerso pa sigui e metanan elevá aki, conseho di Bijbel ta yud’é hiba e mihó clase di bida posibel den e mal sistema di cosnan aki. Sabiduria humano moderno tin tendencia di animá e filosofia di traha ménos posibel i gana mas tantu posibel. N’e otro banda, Bijbel ta bisa nos cu “esun cu ta traha cu un man floho lo ta di poco recurso, pero e man di esun diligente ta loke lo haci un persona ricu.” Apostel Pablo a skirbi n’e cristiannan hebreo: “Nos ta confia cu nos tin un concenshi onrado, pasobra nos kier comportá nos mes onradamente den tur cos.”​—⁠Proverbio 10:4; Hebreo 13:⁠18.

Tambe Bijbel ta duna conseho práctico riba e areglo di famia. E ta establecé specíficamente e papel di tantu e esposo como e esposa den e areglo di matrimonio, i tambe e manera corecto pa cria i educá yunan. E ta bisa: “Esposonan mester stima nan esposa mescos cu nan mes curpa. . . . N’e otro banda, e esposa mester tin respet profundo pa su esposo. Yunan, sea obediente na boso mayornan . . . Boso, tatanan, no iritá boso yunan, sino sigui cria nan den e disiplina i reglamentu mental di Jehova.” Siguiendo e conseho superior dje Creador ta contribuí mashá n’e stabilidad i felicidad di famianan.​—⁠Efesio 5:​21–6:⁠4.

Un Futuro Sigur pa Esnan Cu Ta Sigui Dios Su Guia

E Palabra skirbí di Dios ta señalá n’e solucion cu Dios tin pa tur problema di humanidad. Masha pronto Jehova Dios lo eliminá e sistema di cosnan actual, cu tur su dolor, inhusticia i sufrimentu, i lo reemplas’é cu su hustu sistema nobo. Bijbel ta describí esaki na 2 Pedro 3:​7-10, agregando na versículo 13: “Tin cielu nobo i un tera nobo cu nos ta spera segun su promesa i den esakinan husticia tin cu biba.” Esaki ta encerá en todo caso e mihó bon nobo cu por ser duná n’e famia humano. E ta precisamente e mensahe cu Bijbel ta presentá i cu Testigonan di Jehova ta predicá den mas cu 200 pais i islanan di laman.

Ora e boluntad di Dios ta ser practicá riba tur e tera, henter e famia humano lo beneficiá dor di sigui e guia excelente di su Creador, Jehova. Lo no tin mas problema di pobresa, crímen i droga. Humanidad lo no ser afligí mas cu enfermedad, behes i morto. E famia humano lo ser elevá te n’e perfeccion cu nos promé mayornan tabatin promé cu nan a rebelá contra Dios su guia.

Ki bon e último buki di Bijbel ta resumí e condicion felis di esnan cu ta pone nan confiansa den guia divino! Revelacion 21:​4, 5 ta bisa: “[Dios] lo seca tur lágrima di nan wowo, i morto lo no existí mas, ni yoramentu ni sclamamentu ni dolor lo no existí mas. E promé cosnan a pasa.” Nos Creador a garantisá esei, bisando: “Mira! Mi ta traha tur cos nobo.” E ta agregá: “E palabranan aki ta fiel i berdadero.”

Pa nos ricibí e bendicionnan aki, kico Dios ta spera di nos? Apostel Pablo ta splica cu e boluntad di Dios ta pa “tur sorto di hende ser salbá i yega na un conocimentu exacto dje berdad.” (1 Timoteo 2:⁠4) Testigonan di Jehova ta invitá bo cordialmente pa gana tal conocimentu exacto dje berdad mediante un studio cabal di Bijbel. Dor di siña diligentemente tocante e boluntad divino, abo tambe por haña sa mediante experencia cu sabiduria divino ta e único guia confiabel den e tempu peligroso aki. E urgencia dje tempu ta haci’é mas necesario imperativo cu nunca pa sigui’é!