Tin un Guia Konfiabel Ku Por Yuda Bo Haña un Futuro Sigur?

Manera nos a mira den e artíkulonan anterior, hende a pone nan konfiansa den vários kos pa purba di haña un mihó futuro. Por ehèmpel, miramentu di destino, edukashon, rikesa i ser un bon hende. Pero si bo usa e kosnan akí pa haña un mihó futuro, ta komo si fuera bo ta usa un mapa robes pa yega un kaminda ku nunka bo a yega di bai promé. Esei ke men ku no tin ningun guia konfiabel ku por yuda nos haña un futuro sigur? Nò! Tin un guia konfiabel.

GUIA FOR DI UN FUENTE SUPERIOR

Ora di tuma desishon, hopi bes nos ta buska konseho serka un persona ku ta mas grandi i mas sabí ku nos. Di mes manera, nos por haña guia konfiabel pa nos futuro for di un Persona ku ta hopi mas grandi i sabí ku nos. Nos por lesa su konseho den un buki ku yama Beibel. E promé parti di e buki akí a ser skirbí mas ku 3.500 aña pasá.

Dikon bo por konfia Beibel? Pasobra su Outor ta e Persona di mas bieu i di mas sabí den henter universo. E ta ser yamá “e Ansiano di Dianan” i e ta eksistí “for di eternidat te na eternidat.” (Daniel 7:9; Salmo 90:2) El “a krea e shelunan . . . E ta e Dios, kende a forma tera.” (Isaías 45:18) E ta bisa nos ku su nòmber ta Yehova.—Revelashon 4:11.

Beibel no ta bisa ku un kultura òf nashonalidat ta mihó ku otro. Dikon nò? Pasobra e Outor di Beibel ta esun ku a krea tur hende. Su konseho semper ta práktiko i ta benefisiá hende di tur pais. Beibel ta e buki mas tradusí i mas distribuí ku kualke otro buki.a Pues, hende tur kaminda por les’é i e por ta un guia pa nan. Esei ta di akuerdo ku loke Beibel mes ta bisa:

“Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.”—ECHONAN 10:34, 35.

Meskos ku un mayor amoroso ta stima i yuda su yunan, Yehova ta un Dios amoroso ku ta yuda nos mediante su Palabra, Beibel. (2 Timoteo 3:16) Bo por konfia su palabra, pasobra ta e a krea nos i e sa kiko lo hasi nos felis.

UN GUIA KU NOS POR KONFIA

Nos por konfia loke Beibel ta bisa tokante futuro, pasobra loke Beibel a bisa mas o ménos 2.000 aña pasá tokante susesonan mundial i komportashon di hende ta tumando lugá awe.

E SUSESONAN MUNDIAL

“Nashon lo lanta kontra nashon i reino kontra reino, i lo tin temblor grandi, i den un lugá tras di otro lo tin pèst i skarsedat di kuminda.”—LUKAS 21:10, 11.

KOMPORTASHON DI HENDE

“Den e último dianan lo bini tempunan krítiko, difísil pa trata kuné. Pasobra hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios.”—2 TIMOTEO 3:1-4.

Kon por ta posibel ku Beibel a predisí eksaktamente loke ta tumando lugá den nos tempu? Sin duda, lo bo ta di akuerdo ku loke Leung di Hong Kong a bisa: “E profesianan di Beibel a ser skirbí hopi tempu pasá. Ta imposibel ku un ser humano por a predisí e kosnan ei ku asina tantu eksaktitut. Beibel mester a bini di un persona ku ta muchu mas sabí ku nos.”

Den Beibel, bo por haña sientos di profesia ku a kumpli kaba.b Eseinan ta duna prueba ku di bèrdat Beibel ta Palabra di Dios. Yehova ta bisa: “Ami ta Dios, i no tin ningun manera mi, kende ta deklará e fin for di prinsipio.” (Isaías 46:9, 10) P’esei, bo tin bon motibu pa konfia loke Beibel ta bisa tokante futuro.

GUIA KU TA BENEFISIÁ BO AWOR I PA SEMPER

Ora bo sigui e guia ku tin den e Santu Skritura, lo bo haña benefisio. Laga nos wak algun ehèmpel.

BON KONSEHO TOKANTE PLAKA I TRABOU

“Un man yen di sosiegu ta mihó ku dos moketa yen di trabou i korementu tras di bientu.”—EKLESIÁSTES 4:6.

UN BIDA DI FAMIA FELIS

“Laga kada un di boso stima su esposa manera e ta stima su mes; di otro banda, e esposa mester tin rèspèt profundo pa su esposo.”—EFESIONAN 5:33.

BON RELASHON KU OTRO HENDE

“Stòp di rabia i laga furia para; no kunsumí—esei ta kondusí na maldat so.”—SALMO 37:8.

Si bo hasi loke Beibel ta bisa, lo bo tin un bon bida awor i un futuro sigur. Den Beibel, nos por haña sa tokante Dios su promesanan maravioso pa futuro. Algun di e promesanan ei ta:

PAS I SIGURIDAT

“[Nan] lo deleitá nan mes den pas abundante.”—SALMO 37:11.

KAS I KUMINDA PA TUR HENDE

“Nan lo traha kas i biba den nan; tambe nan lo planta kunukunan di wendrùif i kome nan fruta.”—ISAÍAS 65:21.

NO TIN MALESA NI MORTO MAS

“Lo no tin morto mas; ni tristesa ni sklamashon ni doló lo no tin mas.”—REVELASHON 21:4.

Kiko bo mester hasi pa haña un futuro asina? Wak e siguiente artíkulo pa haña sa e kontesta.

a Pa mas informashon tokante tradukshon i distribushon di Beibel, bai na www.jw.org i buska bou di SIÑANSA DI BEIBEL > BEIBEL & HISTORIA.

b Pa mas informashon, wak kapítulo 9 di e buki E Bijbel—e Palabra di Dios of e palabra di hende? publiká pa Testigunan di Yehova. E ta disponibel online riba www.jw.org. Bai na BIBLIOTEKA > BUKI I FOYETO.