E No Tabata Muchu Bieu pa Sirbi Jehova

HOPI hende di edad ta sinti cu nan añanan restante tin tiki speransa pa felicidad. Un actris di edad bon-conocí asta a bisa: “Mi a bruha mi bida, i ta demasiado lat pa cambi’é . . . Ora mi bai cana mi so, mi ta pensa bek riba mi bida, i mi no ta felis cu e manera cu mi a haci’é . . . Mi no tin sosiegu ningun caminda i no por establecé mi mes.”

Un muher di edad kende a biba casi 2.000 aña pasá no tabatin tal clase di problema. E tabata un biuda di 84 aña, pero e tabata activo, felis i maraviyosamente faborecí pa Dios. Su nomber tabata Ana i e tabatin un motibu special pa goso. Kico esei tabata?

“Nunca Tabata Falta n’e Tempel”

E escritor di Evangelio Lucas ta cera nos conocí cu Ana. “Awor bon,” e ta bisa, “tabatin un profetisa, Ana, yu muher di Fanuel, dje tribu di Aser” den Israel. Como un profetisa, e tabatin e don di Dios su spiritu santu, of forsa activo, den un sentido special. I Ana tabatin un tremendo oportunidad pa profetisá na un ocasion notabel.

Lucas ta conta: “E muher aki tabata di edad avansá, i a biba cu su esposo pa siete aña desde su virginidad, i awor e tabata un biuda di ochenta i cuater aña di edad.” (Lucas 2:​36, 37) Probablemente, Ana a bira biuda ora e tabata basta yong. Biudanan cristian di cualkier edad sa ki doloroso ta pa perde un esposo stimá den morto. Sin embargo, mescos cu hopi muher piadoso di nos dia, Ana no a laga e experencia tristu aki detené su sirbishi na Dios.

Lucas ta bisa nos cu Ana “nunca tabata falta n’e tempel” den Jerusalem. (Lucas 2:37) El a apreciá profundamente e estado bendicioná cu ta resultá for di sirbishi n’e cas di Dios. Su accionnan a revelá cu e, mescos cu David, e salmista-rey di Israel, tabatin solamente un cos pa pidi Jehova. I kico esei tabata? David a canta: “Un cos mi a pidi di Jehova​—⁠esei ta loke lo mi busca, cu mi por biba den e cas di Jehova tur e dianan di mi bida, pa contemplá e agradabilidad di Jehova i pa mira cu aprecio na su tempel.” (Salmo 27:⁠4) Den e sentido aki, tambe, Ana ta manera muhernan cristian awe kendenan ta haña deleite den asistí regularmente na Jehova su lugá di adoracion.

Ana a rindi sirbishi sagrado na Jehova di dia i anochi. El a haci esaki “cu yunamentu i rogamentu,” indicando lamentacion i anhelo sincero. (Lucas 2:37) E sumision hudiu pa siglonan largu na podernan gentil, huntu cu e condicionnan religioso degenerando cu a alcansá asta e tempel i su sacerdocio, lo por tabata wel responsabel pa Ana su yunamentu i rogamentu na Jehova Dios. Pero tambe e tabatin motibu pa ta felis, specialmente debí na algu extraordinario cu a sosodé riba un dia berdaderamente notabel na aña 2 P.E.C.

Un Bendicion Inesperá

Rib’e dia altamente significativo aki, e criatura Jesus a ser trecí n’e tempel di Jerusalem dor di su mama, Maria, i su tata di criansa, José. Simeon, di edad, a mira e baby i a papia palabranan profético na tal ocasion. (Lucas 2:​25-35) Ana tabata n’e tempel manera custumber. “N’e mésun ora ei,” Lucas ta informá, “el a yega cerca.” (Lucas 2:38) Ki conmoví Ana mester a keda ora su wowonan bieu a contemplá e futuro Mesías!

Cuarenta dia mas promé, e angel di Dios a sorprendé e wardadornan cerca di Betlehem cu e palabranan: “Mira! Mi ta declarando na boso bon nobo di un gran goso cu tur e pueblo lo tin, pasobra a nace na boso awe un Salbador, kende ta Cristo e Señor, den stad di David.” Un multitud dje ehército celestial a alabá Jehova i a agregá: “Gloria den altura na Dios i riba tera pas entre hende di bon boluntad.” (Lucas 2:​8-14) Di igual manera, Ana tabata conmoví awor pa duna testimonio tocante Esun kende lo a bira e Mesías!

Ora el a contemplá e baby Jesus, Ana “a cuminsá duna gradicimentu na Dios i papia tocante e yu na tur esnan cu tabata spera liberacion di Jerusalem.” (Lucas 2:38) Mescos cu Simeon di edad, tambe privilegiá pa mira e baby Jesus n’e tempel, sin duda e tabata deseando, resando i sperando rib’e Libertador primintí. E bon nobo cu Jesus tabata Esun ei tabata demasiado bon p’e ten’é pa su mes.

Aunke Ana kisas no a spera pa ta na bida ora Jesus a crece bira grandi, kico el a haci? Gososamente el a duna testimonio na otronan tocante e liberacion cu pronto mester a ser efectuá mediante e binidero Mesías aki.

Ana Su Ehempel Excelente

Cuantu hende religioso dje mundu lo duna un testimonio asina of ainda lo ta rindiendo adoracion di dia i anochi n’e edad di 84 aña? Probablemente, nan lo a baha cu pension hopi aña caba. Ana i Simeon tabata diferente. Nan a pone ehempel excelente pa tur Jehova su sirbidornan di edad. En berdad, nan a stima Jehova su cas di adoracion i a alab’é cu tur nan curason.

Den Ana nos tin un ehempel sublime di un biuda piadoso. Realmente, Lucas su descripcion dje muher humilde di edad aki ta cuadra bon cu e cualificacionnan di un biuda merecedor describí na 1 Timoteo 5:​3-16. Ei apostel Pablo ta bisa cu un biuda asina “ta persistí den rogamentu i oracion anochi i di dia,” ta “esposa di un solo esposo,” i ‘cu diligencia ta sigui tur bon obra.’ Ana tabata un clase di muher asina.

Awe, nos ta haña biudanan fiel di edad rindiendo sirbishi sagrado na Dios di dia i anochi den miles di congregacion di Testigonan di Jehova rond e tera. Cuantu nos ta apreciá pa tin e “Ananan” moderno aki meimei di nos!

Asta na un edad avansá, hende homber i muher por haci un dedicacion na Dios i simbolisá esaki mediante bautismo bou di awa. Esnan di edad nunca ta muchu bieu pa sirbi Jehova i pa duna testimonio tocante e Reino Mesiánico, awor instalá den cielu i cu pronto lo trece bendicionnan ricu na humanidad obediente. Personanan di edad cu awor ta rindiendo sirbishi sagrado na Dios por duna testimonio di Jehova su bendicion riba nan, net manera Ana tabata specialmente bendicioná siglonan pasá. E no tabata muchu bieu pa sirbi Jehova i alabá su nomber santu​—⁠i esnan di awor tampoco.

[DO NOT SET] References

1. Parade, (Sect. of Staten Island Sunday Advance), (magazine; NY), October 16, 1977, p. 2; [Translator: Walter Scott’s “Personality Parade” quoted Greta Garbo from the German magazine, Bunte Illustrierte, published some weeks before October 16, 1977.]

The Watchtower, (magazine; Brooklyn, NY), November 1, 1982, p. 8.

2. The Watchtower, December 15, 1950, p. 523.

3. Insight on the Scriptures, Watch Tower Bible and Tract Society of Pennsylvania, 1988, (Watchtower Bible and Tract Society of New York, Inc., Brooklyn, NY), Vol. 1, p. 112.

4. The Watchtower, December 15, 1950, p. 523.

5. Insight on the Scriptures, Vol. 1, p. 112.

6. The Watchtower, December 15, 1950, p. 523.

7. Insight on the Scriptures, Vol. 2, p. 1182.