Informe di Proclamadónan di Reino

Latvia Ta Reaccioná Faborabel Riba e Bon Nobo

BIJBEL ta mustra bon cla cu e boluntad di Dios ta pa “tur clase di hende ser salbá i yega na un conocimentu exacto dje berdad.” (1 Timoteo 2:4) Esnan cu pa hopi aña a ser privá dje oportunidad di tende e bon nobo ta tendiendo e awor! Na Latvia, mescos cu na otro parti di mundu, hende di tur edad i di diferente antecedencia ta reaccionando faborabel riba e mensahe, manera e siguiente experencianan ta mustra.

• Na Rēzekne, un pueblo den oost di Latvia, un mama cu su yu muher tiener a pidi un señora riba caya splica nan con pa yega un caminda. Despues cu el a duna nan e informacion, e señora, cu pa casualidad tabata un Testigo di Jehova, a invitá nan pa asistí n’e reunionnan di Testigonan di Jehova.

Ya cu tantu e mama como e yu muher tabatin inclinacion religioso, nan a dicidí di bai e reunion. Riba caminda nan a cumbiní cu otro cu si nan haña cualkier cos inapropiado n’e reunion, nan lo sali bai mesora. Sin embargo, e reunion tabata asina interesante cu niun ora so nan no a pensa di bai. Nan a aceptá ora un hende a ofrecé nan pa studia Bijbel, i a cuminsá asistí n’e reunionnan regularmente. Den tres luna so, nan a expresá nan deseo di participá den e trabou di predicá, i ta anhelá pa bautisá.

• Na un stad den west di Latvia, un Testigo a topa Anna di 85 aña di edad, cu a mustra un berdadero interes i a aceptá pa studia Bijbel. Su yu muher i otro miembronan di su famia a opon’é fuertemente. Pero Anna no a permití ni esei ni su edad avansá i su mal salú, kit’é di sigui cu su studio di Bijbel.

Un dia Anna a bisa su yu muher cu e ta bai bautisá. Su yu muher a respondé: “Si bo bautisá mi ta manda bo un cas di cuido.” Pero e menasa aki no a tene Anna atras. Pa motibu di su estado físico, el a bautisá na su cas mes.

Con Anna su yu muher a reaccioná riba esaki? Su actitud a cambia, i el a prepará un cuminda special pa su mama despues dje bautismo. Anto el a puntra su mama: “Awor cu bo ta bautisá, con bo ta sinti?” Con Anna a contestá? “Manera un baby recien nací!”

• Na december 1998, dos Testigo a topa un oficial di ehército penshoná di ex-Union Soviético. Como cu e tabata kere den un Creador, el a aceptá un studio di Bijbel, i despues su casá a djoin e. Nan a progresá lihé, i den poco tempu nan a bira publicadó no-bautisá. Pa e siguiente zomer, ya e ex-oficial tabata bautisá. E gran amor cu e pareha aki tin pa cos spiritual ta un animacion pa tur hende den e congregacion. Ademas, nan a traha duru den e trabou di remodelá un cas local pa hacié un excelente Salon di Reino.